Mumabbuku aa Makani Mabotu kwaambidwe mwaalumi wazina lya Johane Mubbapatizi, iwakali kukambauka ku Judaya kujatikizya Bwami bwa Leza. Sena makani aajatikizya mwaalumi ooyu balaazuminizya basyaazibwene mumakani aakaindi? Amubone twaambo tutobela:

•   Bbaibbele lyaamba kuti: “Johane Mubbapatizi wakaboola akukambauka munkanda ya Judaya kuti: ‘Amweempwe, nkaambo Bwami bwakujulu bwaswena afwaafwi.’” (Matayo 3:1, 2) Sena makani aaya balaazumina basyaazibwene mumakani aakaindi? Inzya.

   Syaazibwene mumakani aakaindi wamumwaanda wamyaka wakusaanguna Flavius Josephus wakaamba zyamwaalumi wazina lya “Johane Mubbapatizi, iwakakulwaizya ba Juda kupona buumi bwabululami, kulyaaba kuli Leza, akubbapatizyigwa.”—Jewish Antiquities, Book XVIII.

•   Bbaibbele lipandulula kuti Johane wakamunyemena Heroda Antipa, iwakali mweendelezi wacilikiti ca Galilaya a Pereya. Heroda wakali kulyaamba kuti wakali mu Juda iwakali kutobela Mulawo wa Musa. Johane wakamusinsa Heroda akaambo kakukwata mukamwanookwabo Herodiya. (Marko 6:18) Kaambo aaka kalaambidwe amumabbuku aamwi kunze buyo lyamu Bbaibbele.

   Syaazibwene mumakani aakaindi Josephus wakaamba kuti Antipa “wakatalika kumunyomenena Herodiya” aboobo “cabusicamba wakamwaambila kuti uyanda kumukwata.” Herodiya wakazumina mpoonya wakazwa kucikwati akuyookwatwa kuli Antipa.

•   Bbaibbele lyaamba kuti “bantu bamu Jerusalemu amu Judaya moonse amuminzi yoonse yeengelede Jordano bakali kuunka kuli [Johane], eelyo wakali kubabbapatizya mu Mulonga wa Jordano.”—Matayo 3:5, 6.

   Josephus awalo wakaazuminizya makani aaya naakaamba kuti bantu bakaboola kabali “tubunga” kuli Johane akuti “bakajatikizyigwa kapati azintu nzyaakabayiisya Johane.”

 Cilasalala kuti, syaazibwene mumakani aakaindi wamumwaanda wamyaka wakusaanguna Josephus wakali kubona Johane Mubbapatizi kuti wakaliko ncobeni. Andiswe tulijisi lusyomo oolu.