Cakutadooneka mulizyi kuti zyakulya zitajisi busani zilakonzya kunyonganya buumi bwanu. Muntu uulya zyakulya zitajisi busani ciindi nacili mwana, ulalangilwa kuzumanana kulya zyakulya zitajisi busani ciindi aakukomena, aboobo cilayandika kuba acilengwa cakulya zyakulya zijisi busani lino.

•  Ino zyakulya zijisi busani nzinzi?

•  Mbuti mbondikonzya kuzumanana kulya zyakulya zijisi busani?

•  Nzyobaamba beenzinyoko

 Bbaibbele litwaambila kuti tatweelede ‘kuciindizya muzilengwa,’ alimwi eeci cilabikkilizya ambotulya. (1 Timoteyo 3:11) Katuyeeyede njiisyo eeyi, ncibotu kuzyiba kuti . . .

•   Zyakulya zijisi busani zilabikkilizya amisyobo yoonse yazyakulya zili kabotu. Misyobo yazyakulya iili 5 ilabikkilizya azyakulya zipangwa kumukupa, zijisi ma protein, micelo, zisyumani, alimwi amapopwe. Bantu bamwi balacileka kulya zyakulya zimwi, bayeeya kuti, kucita boobo cilabagwasya kucesya mubili. Pele kuti mwacita oobo mubili wanu inga wabula busani bumwi buyandika kutegwa mube abuumi buli kabotu.

   Amusole nzila eeyi: Amuvwuntauzye naa kubuzya dokota kutegwa muzyibe ncociyandika kulya zyakulya zimwi. Mucikozyanyo:

   Ma carbohydrate alakonzya kumupa nguzu. Ma protein alakonzya kugwasya mubili wanu kulwana tuzunda alimwi akuyaka mubili mpoonya akubambulula ma tissue. Mafwuta aamwi mumubili aelede alakonzya kucesya malwazi aakumoyo alimwi akumupa nguzu ziyandika.

   “Inga ndilasola kulya zyakulya zijisi busani zyamisyobo yoonse. Ndisyoma kuti tacilubide zimwi ziindi kulya zyakulya mbuli maswiiti ama chips. Pele eeci taceelede kunooba boobo lyoonse. Ncibotu kutaciindizya.

•   Zyakulya zijisi busani zikasya kuciindizya. Eeci cilakonzya kubikkilizya akutalya kapati, kuliimya kulya mpoonya akulya zyakulya zinji aciindi comwe kwainda ciindi, naa kulikasya kulya zintu nzyomuyandisya.

   Amusole nzila eeyi: Kwamwezi, amuzibikkile maano zintu nzyomulya. Ino nziindi zinji buti nomuciindizya kweelana abukkale bwaambwa atala? Ino nkucinca nzi nkomukonzya kucita kutegwa kamulya zyakulya zijisi busani?

   “Kuli mazuba nondakali kuciindizya kulya zyakulya zyakajisi mafwuta manji mpoonya amazuba aagaminide nondakali kuciindizya kulya zyakulya zyakajisi mafwuta masyoonto kapati. Aboobo ndakasala kucileka kulanga-langa mafwuta aakali mucakulya ncondakali kulya, akutaciindizya kulya alimwi akucileka kulya ikuti ndakkuta. Eeci cakatola ciindi, pele lino ndilya zyakulya zijisi busani.”—Hailey.

•   Amuyeeyele limwi ncomuyanda kulya. Bbaibbele lyaamba kuti: “Makanze aabankutwe masimpe apa kuzwidilila.” (Tusimpi 21:5) Kuti kamuyanda kuba acilengwa cakulya zyakulya zijisi busani, mweelede kulibambila kabotu.

   “Kuyandika kulibambila kabotu kutegwa kamulya zyakulya zijisi busani, alimwi kanji-kanji zyakulya zibotu nzyeziya nzyomulijikila. Nokuba kuti tacili cuuba-uba, cilagwasya kapati, alimwi cilakonzya kupa kuti mutanyonyooni mali manji.”—Thomas.

•   Amweelebe kulya zyakulya zitajisi busani. Bbaibbele lyaamba kuti: “Kobambilila busongo bugwasya.” (Tusimpi 3:21) Busongo bugwasya buyoomugwasya kuba munkutwe alimwi akujana nzila zikonzya kumubelekela kabotu.

   “Buzuba bumwi abumwi, ndakatalika kulya cakulya cijisi busani, mubusena bwacakulya citajisi busani. Mucikozyanyo, muciindi cakumumunya nswiiti, ndakali kulya apo. Mumazuba buyo masyoonto, ndakacinca zyakulya zinji!”—Kia.

•   Mutanoolipenzi. Bbaibbele lyaamba kuti: ‘Amulye cakulya canu kamukkomene.’ (Mukambausi 9:7) Kulya cakulya cijisi busani taceelede kumulesya kukkomana ciindi nomulya, alimwi taceelede kumupa kulibilika kujatikizya zyakulya nzyomulya. Nokuba kuti muyandika kucesya mubili, kamuyeeyede kuti makanze ngakuti mube abuumi buli kabotu. Aboobo mutanoolipenzi.

   “Caino-ino ndakacesya mubili ama kg aali 13.5, alimwi kunyina nondakali kulipenzya, kucileka kulya zyakulya zimwi naa kulipa mulandu akaambo kakulya zyakulya zilweela. Ndakalizyi kuti kucesya mubili tiikwakali kuyoocitika mpoonya-mpoonya alimwi akuti ndakeelede kucinca zyakulya nzyondilya.”—Melanie.