“Mizeezo yakoonana ilaboola cakutayeeyela alimwi ilakatazya kugusya. Ndilaakulimvwa mbuli kuti tandili ndime.”—Vera.

 “Kuboneka mbuli kuti tacikonzyeki kuleka kuyeeya makani aakoonana. Mane buya akusola kuuluka ncuuba-uba kwiinda kuleka kuyeeya makani aakoonana.”—John.

 Sena andinywe mulimvwa mbuli Vera naa John? Ikuti kacili boobo, cibalo eeci cilamugwasya.

•  Nkaambo nzi ncotuteelede kuyeeya makani aakoonana?

•  Nkaambo nzi ncocili ciyumu kugusya mizeezo yakoonana?

•  Ncomweelede kucita

•  Nzyobaamba beenzinyoko

 Mukubusi umwi wazina lya Alex wakaamba kuti: “Baacisya bakandaambila kuti nikwali kuti Leza taayandi makani aakoonana, nkokuti naatakandilenga kuti kandilombozya koonana.”

 Kulubazu lumwi ncobakaamba baacisyanyina Alex cililuzi, kuli kaambo Leza ncaakatulenga kuti katulombozya koonana. Nikwali kuti kunyina koonana, nokunga kunyina bantu munyika. Aboobo nkaambo nzi ncociyandika kugusya mizeezo yakoonana? Ntootu twaambo tobilo itumvwika:

•   Bbaibbele liyiisya kuti Leza uyanda kuti koonana kakucitwa buyo akati kamwaalumi amukaintu ibakwetene.—Matalikilo 1:28; 2:24.

   Aboobo ikuti kamucilemeka ceelelo eeci, kuyeeya makani aakoonana inga kwaile kumutyompya buyo ikuti kamutakwete naa kamutakwetwe. Eeci inga capa kuti musunkwe kucita bwaamu, icintu icibapa kuusa bantu banji.

•   Kuleka kuyeeya makani aakoonana ncitondezyo cabube buyandika kapati bwakulilesya.—1 Bakorinto 9:25.

 Bube oobu bulayandika kapati kutegwa muzwidilile, lino alimwi akumbele. Mubwini, buvwuntauzi bumwi bwakatondezya kuti bana ibalilesya tabaciswi-ciswi tabajisi mapenzi aamali alimwi baakukomena tabakajaniki amulandu kupolisi. a

 Tukkala munyika iisumpula makani aakoonana mpoonya alimwi mahomoni mumubili aalo apa kuti ciindile kuyuma kugusya mizeezo yakoonana.

 “Kulibonya mbuli kuti mapulogilamu aa TV oonse atondezya kuti tacilubide koonana amuntu ngomutakwetene limwi. Ncuuba-uba kuba amizeezo iitali kabotu ikuti koonana kutali kwamumulawo kakubonwa kuti kunyina bubi.”—Ruth.

 “Kumulimo, ndilamvwa bantu kabaamba cisapi, lino nzyobaamba zipa kuti ndiyande kuzyiba mbocibede. Kucita bwaamu kubonwa mbuli kuti ncintu cili buyo kabotu cakuti nciyumu kucibona kuti taciluzi.”—Nicole.

 “Ncuuba-uba kucegwa ikuti kolanga zifwanikiso zitali kabotu aintaneti. Cifwanikiso comwe ciletela muzeezo wakoonana cilakonzya kukkalilila mumizeezo yanu cakuti inga camuyumina kuciluba!”—Maria.

 Twaambo mbuli tootu itwaambwa tulakonzya kupa kuti mulimvwe mbuli mwaapostolo Paulo. Wakalemba kuti: “Ciindi nendiyanda kucita cibotu, icibi cilaandime.”—Baroma 7:21.

 Amubikkile maano kuzintu zimbi buyo. Amusole kubikkila maano kuzintu zimbi buyo kutali makani aakoonana. Mulakonzya kuyeeya zintu nzyomuyandisya kucita, cisobano, kunyanyaasya mubili, naa cintu cili coonse cikonzya kumupa kugusya mizeezo yakoonana. Mukaintu umwi mwana-mwana wazina lya Valerie wakaamba kuti “Kubala Bbaibbele kulagwasya. Lijisi mizeezo iisumpukide kapati, aboobo ciindi nomuba amizeezo iili mulindilyo, kanji-kanji munyina ciindi cakuyeeya zintu zitagwasyi.”

 Masimpe, tacilubide kuba amizeezo yakoonana. Pele mukuli wanu kuzyiba cakucita amizeezo eeyo. Ikuti mwaba amizeezo yakoonana, mulijisi nguzu zyakugusya mizeezo eeyo. Pele mweelede kulisalila kucita boobo.

 “Ciindi mizeezo yangu noitalika koongelezyegwa amakani aakoonana, nditalika kuyeeya zintu zimbi buyo. Kunze lyaboobo ndilasola kuzyiba icapa kuti nditalike kuyeeya boobo, ikuti naa ndwiimbo naa ncifwoto, ndilacigusya.”—Helena.

 Njiisyo yamu Bbaibbele: “Kufwumbwa zintu ziyandika kapati, kufwumbwa zintu ziluleme, kufwumbwa zintu zisalala,  . . kamuzumanana kuziyeeyesya zintu eezyi.”—Bafilipi 4:8.

 Amusale balongwe bali kabotu. Ikuti balongwe banu lyoonse baamba buyo makani aakoonana, inga camuyumina kuleka kuyeeya makani aakoonana.

 “Nondakali mukubusi, cakandiyumina kugusya mizeezo iitali kabotu akaambo kakuba abalongwe batali kabotu. Ikuti koli abantu bakulwaizya zisusi zibyaabi, cipa kuti ubikkile maano mbolimvwa, cili mbuli kutila paraffin amulilo.”—Sarah.

 Njiisyo yamu Bbaibbele: “Ooyo weenda abasongo ulaba musongo, pele ooyo uuyanzana abafwubafwuba ulajana mapenzi.”—Tusimpi 13:20.

 Amuzitantamuke zyakulikondelezya zitali kabotu. Bantu boonse balizyi kuti zyakulikondelezya zyoonse mazuba aano zisumpula makani aakoonana. Nicole wakaamba kuti “Mebo cintu cindoongelezya kapati ninyimbo. Zilandinjila mumoyo cakuti inga ndilasakana kuyeeya.”

 “Ndakatalika kweebelela mafilimu aajisi zintu ziletela muzeezo wakoonana. Cakutazyiba ndakalijana buyo kuti mizeezo yakoonana yakomena mulindime. Cakali cuuba-uba kuzyiba cakapa kuti nditalike kuba amizeezo yakoonana. Mbondakacileka kweebelela mafilimu aayo, ndakacileka kuyeeya makani aakoonana. Kusala zyakulikondelezya zili kabotu kulagwasya kulwana mizeezo iitali kabotu.”—Joanne.

 Njiisyo yamu Bbaibbele: “Bwaamu abusofwaazi bwamusyobo uuli woonse naa busyaacivwulemwangu tazyeelede nokuba kwaambwa akati kanu pe.”—Baefeso 5:3.

 Masimpe ngakuti: Bantu bamwi bayeeya kuti luunyaunya lwabo lulayandika kapati cakuti tabeelede kulijata alimwi akuti tacikonzyeki buya kulyeendelezya. Pele Bbaibbele talyaambi boobo pe. Lilabalemeka bantu nkaambo liyiisya kuti inga twayeendelezya mizeezo yesu, calo citondezya kuti nzyotucita zilayandika kuli Leza.

 Njiisyo yamu Bbaibbele: “Amuzumanane kubukulusya mizeezo iimweendelezya lyoonse.”—Baefeso 4:23.