Micito ipa yooyo wabisya kuti atakonzyi kulekelelwa a Leza. Ino micito eeyo inga yaba buti?

 Leza ulabalekelela aabo beempwa kuzibi zyabo, batobela zyeelelo zyakwe mubuumi bwabo, alimwi akutondezya lusyomo muli Jesu Kristo. (Milimo 3:​19, 20) Nokuba boobo, muntu inga wazyibila kucita cibi cakuti inga takonzyi kucinca micito naa bukkale bwakwe. Bbaibbele lipandulula muntu uuli boobu kuti ujisi ‘moyo mubi’ walo “uuyumya moyo akaambo kakweenwa anguzu zyacibi.” (Bahebrayo 3:​12, 13) Mbubwenya mbuli bulongo bwaumpwa mumulilo bwalo butakonzyi kubambululwa, muntu ooyo uba sinkondonyina Leza. (Isaya 45:9) Muntu uuli boobu takonzyi kulekelelwa, nkaambo ujisi mulandu wacibi citakonzyi kulekelelwa.​—Bahebrayo 10:26, 27.

 Basololi bacikombelo ba Juda bamuciindi ca Jesu bakacita cibi citakonzyi kulekelelwa. Bakalizyi kuti muuya uusalala wa Leza nguwakali kugwasya Jesu kucita maleele, nokuba boobo, cakusampaula bakaamba kuti nguzu nzyaakali kubelesya zyakali kuzwa kuli Saatani Diabolosi.​—Marko 3:​22, 28-​30.

Zikozyanyo zyazibi zikonzya kulekelelwa

•  Kusampaula Leza akaambo kakutazyiba. Aciindi cimwi mwaapostolo Paulo wakali sikusampaula Leza, pele mukuyakwaciindi wakaamba kuti: “Ndakafwidwa luse, nkaambo ndakacita zintu cakutazyiba alimwi ndakanyina lusyomo abuniini.”​—1 Timoteyo 1:​13.

•  Bumambe. Bbaibbele lilaamba bantu bamwi ibakacita bumambe aciindi cimwi pele ibakacinca bukkale bwabo alimwi bakalekelelwa a Leza.​—1 Bakorinto 6:​9-​11.

“Sena ndakacita cibi citakonzyi kulekelelwa?”

 Ikuti naa kuzwa ansi aamoyo mwacileka kucita zibi nzyomwakali kucita kaindi akuyanda kucinca, nkokuti tiimwakacita cibi citakonzyi kulekelelwa. Leza ulakonzya kumulekelela nokuba kuti mwacita cibi ncimunya ziindi zinji, kufwumbwa buyo kuti tiimwazumanana kuyumya moyo wanu kulinguwe.​—Tusimpi 24:16.

 Bantu bamwi balimvwa kuti ambweni bakacita cibi citakonzyi kulekelelwa akaambo kakuti balapenga mumizeezo lyoonse kujatikizya zibi nzyobakacita kaindi. Nokuba boobo, Bbaibbele liyiisya kuti tatweelede kusyoma mizeezo yesu lyoonse. (Jeremiya 17:9) Leza tatupede nguzu zyakubeteka muntu uuli woonse​—nokuba kulibeteka tobeni. (Baroma 14:​4, 12) Ulakonzya kutulekelela nokuba kuti moyo wesu inga kaucitupa mulandu.​—1 Johane 3:​19, 20.

Sena Judasi Isikariote wakacita cibi citakonzyi kulekelelwa?

 Inzya. Bulyato bwakwe bwakamupa kuti abbe mali alo aakasangidwe kuti abelesyegwe mumulimo uusetekene. Mane buya wakalicengeezya kuti wakali kubabikkila maano bacete, kakuli wakali kuyanda buyo kuti abbe mali manji. (Johane 12:​4-8) Akaambo kakuti wakalizyibizya kucita cibi, wakaaba Jesu amali aansiliva aali 30. Jesu wakalizyi kuti Judasi kunyina naakali kukonzya kweempwa ncobeni kucibi ncaakacita, aboobo wakamwaamba kuti “mwana walunyonyooko.” (Johane 17:12) Eeci cakali kwaamba kuti ciindi Judasi naakafwa, wakali kuyoofwidilila, katajisi bulangizi bwakubusyigwa.​—Marko 14:21.

 Judasi kunyina naakeempwa ncobeni kucibi ncaakacita. Wakalyaambilila cibi cakwe ikutali kuli Leza, pele kubasololi bazikombelo balo mbaakapangene limwi.​—Matayo 27:​3-5; 2 Bakorinto 7:​10.