Bbaibbele litondezya kuti cili kabotu, mane buya cilayandika, kuliyanda tobeni, pesi kutali kuciindizya. Luyando luli boobo lubikkilizya kulilanganya kabotu, kulilemeka, akulimvwa kuti mulayandika. (Matayo 10:31) Muciindi cakutembaula muuya wakuliyanda uutali kabotu, Bbaibbele lilaamba mbotweelede kuliyanda munzila iili kabotu.

Nguni ngotweelede kusaanguna kuyanda?

1.   Tweelede kusaanguna kuyanda Leza mumyoyo yesu. Bbaibbele litondezya kuti mulawo mupati ngwakuti: “Weelede kuyanda Jehova Leza wako amoyo wako woonse.”​—Marko 12:28-​30; Deuteronomo 6:5.

2.   Mulawo wabili ngwakuti: “Weelede kuyanda simukobonyoko mbuli mboliyanda omwini.”​—Marko 12:31; Levitiko 19:18.

3.   Nokuba kuti mu Bbaibbele kunyina mulawo wacigaminina waamba kuti katuliyanda, mulawo wakuti “kuyanda simukobonyoko mbuli mboliyanda,” utondezya kuti tacilubide pe kuliyanda alimwi cilagwasya kucita boobo, citayandiki nkuciindizya.

Nguni ngwaakasaanguna kuyanda Jesu?

 Jesu wakatondezya mbociyandika kuyanda Leza, kuyanda basimukoboma, alimwi akuliyanda tobeni. Kunze lyaboobo, wakalailila basikwiiya bakwe kutobela cikozyanyo cakwe.​—Johane 13:34, 35.

1.   Wakasaanguna kuyanda Jehova Leza akulitakata kubeleka mulimo wakwe. Wakaamba kuti: “Ikutegwa nyika izyibe kuti ndilamuyanda Taata, ndilacita mbubonya Taata mbwaakandilailila kuti ndicite.”​—Johane 14:31.

2.   Jesu wakali kubayanda basimukobonyina, alimwi wakatondezya oobo kwiinda mukubapa nzyobakali kuyandika mane buya akwaaba buumi bwakwe.​—Matayo 20:28.

3.   Wakatondezya kuti wakali kuliyanda kwiinda mukujana ciindi cakupumuna, kulya, alimwi akuyanzana abasikumutobela abaabo bakazooba basikwiiya bakwe.​—Marko 6:​31, 32; Luka 5:​29; Johane 2:​1, 2; 12:2.

Sena kuyanda bamwi muciindi cakuliyanda kuyoopa kuti mutajani lukkomano naa bulemu?

 Peepe, akaambo kakuti tulengedwe mucinkozya ca Leza, siluyando. (Matalikilo 1:​27; 1 Johane 4:8) Eeci caamba kuti mbotulengedwe buya kuti katubayanda bamwi. Kuliyanda tobeni, kulayandika. Pele tulajana lukkomano lunji ikuti twasaanguna kuyanda Leza akubikkila maano kucitila bamwi zintu zibotu. Mbubwenya Bbaibbele mbolyaamba, “kupa kulakkomanisya kapati kwiinda kupegwa.”​—Milimo 20:35.

 Mazuba aano, bantu banji baamba kuti lukkomano luboola ikuti koliyanda omwini. Kubantu bali boobu, “kuliyanda omwini” kwakanjila mubusena “bwakuyanda simukobonyoko.” Pele basyaazibwene mazuba aano bajana kuti lukkomano alimwi abuumi bubotu zilaboola kuli baabo batobela lulayo lwabusongo lwamu Bbaibbele lwakuti: “Umwi aumwi kayandisya kugwasya bamwi ikutali buyo kuligwasya lwakwe mwini.”​—1 Bakorinto 10:24.