Milawo Iili Kkumi milawo Leza njaakapede cisi ca Israyeli cansiku. Milawo eeyi alimwi yiitwa kuti Majwi Aali Kkumi, kweelana abusanduluzi bwamabala aa Chihebrayo aakuti ʽaseʹreth had·deva·rimʹ. Bbala eeli lilajanika ziindi zyotatwe mumabbuku osanwe aakusaanguna mu Bbaibbele. (Kulonga 34:28; Deuteronomo 4:​13; 10:4) Mabala aakozyenye aamu Chigriki, deʹka (kkumi) loʹgous (majwi), nkolyakazwa bbala lya Cingisi lyakuti “Decalogue.”

 Leza wakalemba Milawo Iili Kkumi amabwe obilo akupa musinsimi wakwe Musa a Cilundu ca Sinai. (Kulonga 24:12-​18) Milawo Iili Kkumi ililembedwe kulugwalo lwa Kulonga 20:​1-​17 a Deuteronomo 5:​6-​21.

•  Mulongo wa Milawo Iili Kkumi

•  Nkaambo nzi milongo ya Milawo Iili Kkumi ncoyiindene?

•  Ino Milawo Iili Kkumi yakajisi makanze nzi?

•  Sena Banakristo baleelede kubamba Milawo Iili Kkumi?

•  Sena Milawo Iili Kkumi ilayandika mazuba aano?

•  Njiisyo zili mu Milawo Iili Kkumi mbozitondezyedwe mu Cizuminano Cipya

1.   Kokomba Jehova Leza alikke.​—Kulonga 20:3.

2.   Utakombi mituni.​—Kulonga 20:​4-6.

3.   Utabelesyi zina lya Leza munzila iiteelede.​—Kulonga 20:7.

4.   Kobamba buzuba bwa Sabata.​—Kulonga 20:​8-​11.

5.   Kolemeka bazyali bako.​—Kulonga 20:12.

6.   Utajayi.​—Kulonga 20:13.

7.   Utaciti bumambe.​—Kulonga 20:14.

8.   Utabbi.​—Kulonga 20:15.

9.   Utabejelezyi.​—Kulonga 20:16.

10.   Utanyonokeli.​—Kulonga 20:17.

 Bbaibbele talyaambi cacigaminina mboyeelede kutobelana milawo. Aboobo, kuli kwiindana kwamizeezo kujatikizya mboyeelede kutobelana milawo. Mulongo uuli atala aawa utondezya mboitobelana kanji-kanji milawo eeyi. Pele bamwi baitobelanya munzila iindene. Kwiindana kujatikizya mulawo wakusaanguna, wabili alimwi awamamanino. a

 Milawo Iili Kkumi yakali cibeela ca Mulawo wa Musa. Wakajisi milawo yiinda ku 600 alimwi mpaakayeeme cizuminano akati ka Leza acisi ca Israyeli cansiku. (Kulonga 34:27) Leza wakasyomezya bana Israyeli kuti bakali kuyoozwidilila ikuti bautobela Mulawo wa Musa. (Deuteronomo 28:​1-​14) Pele makanze mapati aa Mulawo ooyu akali aakugwasya bana Israyeli kuti balibambile kuboola kwa Mesiya naa Kristo.​—Bagalatiya 3:​24.

 Peepe. Leza wakapa Mulawo wakwe, kubikkilizya a Milawo Iili Kkumi, cacigaminina kucisi ca Israyeli cansiku. (Deuteronomo 5:​2, 3; Intembauzyo 147:19, 20) Mulawo wa Musa taubajatikizyi Banakristo, alimwi nobaba Banakristo ba Juda ‘bakaangununwa ku Mulawo ooyu.’ (Baroma 7:6) b Mulawo wa Musa wakanjililwa busena ‘amulawo wa Kristo,’ walo uubikkilizya zintu zyoonse Jesu nzyaakalailila basikumutobela.​—Bagalatiya 6:2; Matayo 28:19, 20.

 Inzya. Akaambo kakuti Milawo Iili Kkumi iyubununa kuyeeya kwa Leza, tulakonzya kugwasyigwa kuti twaizyiba. (2 Timoteyo 3:​16, 17) Milawo Iili Kkumi iyeeme anjiisyo ziyandika kapati zitakonzyi kucinca. (Intembauzyo 111:​7, 8) Mane buya bunji bwanjiisyo zijanika mucibeela ncobaita kuti Cizuminano Cipya ziyeeme a Milawo Iili Kkumi​—Amubone katwe kakuti “ Njiisyo zili mu Milawo Iili Kkumi mbozitondezyedwe mu Cizuminano Cipya”

 Jesu wakayiisya kuti Mulawo woonse wa Musa kubikkilizya a Milawo Iili Kkumi ziyeeme amilawo yobilo iiyandika kapati. Wakati: “‘Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.’ Ooyu ngomulawo mupati alimwi ngonguwe wakusaanguna. Alimwi ngooyu wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’ Amilawo eeyi yobilo mpaayeeme Mulawo woonse.” (Matayo 22:34-​40) Aboobo nokuba kuti Banakristo tabeelede kubamba Mulawo wa Musa, baambilwa kuti beelede kuyanda Leza alimwi abantunyina.​—Johane 13:34; 1 Johane 4:​20, 21.