Bbaibbele lyaamba kuti: “Baumi balizi kuti balafwa, pele bafwide tabezi cintu niciba comwe.” (Mukambausi 9:5; Intembauzyo 146:4) Aboobo, notwafwa tulaleka kupona. Bafwide tabakonzyi kuyeeya, kucita cintu cimwi, naa kumvwa cili coonse.

“Kubulongo nkoelede kupiluka”

 Leza wakapandulula cicitika notwafwa naakaambaula amuntu wakusaanguna, Adamu. Akaambo kakuti Adamu tanaakamvwida, Leza wakamwaambila kuti: “Uli bulongo buyo, akooko kubulongo nkoelede kupiluka.” (Matalikilo 3:19) Leza katanalenga Adamu kuzwa ‘kubulongo bwaansi,’ Adamu tanaakaliko. (Matalikilo 2:7) Mbubwenya buyo, Adamu naakafwa, wakapiluka kubulongo aboobo wakaleka kupona.

 Eeci ncecicitika kuli baabo bafwa mazuba aano. Kujatikizya bantu alimwi abanyama, Bbaibbele lyaamba kuti: “Bakazwa kubulongo, alimwi balapiluka kubulongo.”​—Mukambausi 3:​19, 20.

Lufwu taali ngamamanino aazyintu zyoonse

 Kanji-kanji Bbaibbele lyeezyanisya lufwu kuŋonzi. (Intembauzyo 13:3; Johane 11:​11-14; Milimo 7:60) Muntu uuli muŋonzi, tazyi cicitika. Mbubwenya buyo, abalo bafwide tabazyi cili coonse. Nokuba boobo, Bbaibbele liyiisya kuti Leza ulakonzya kubabusya bafwide mbuli kuti ubusya muntu uuli muŋonzi alimwi akubapa buumi alimwi. (Jobu 14:​13-15) Kuli baabo ibabusyigwa a Leza, lufwu taali ngamamanino aazyintu zyoonse.