Sikulwana Kristo tali buyo muntu omwe naa kabunga akaambo kakuti Bbaibbele lyaamba kuti kuli “basikulwana Kristo banji.” (1 Johane 2:​18) Muciindi caboobo, ibbala lya Chigiriki ilyakasandululwa kuti “sikulwana Kristo” lyaamba muntu uuli woonse uucita zintu zitobela:

•   Uukaka kuti Jesu ngu Kristo (Mesiya) naa kukaka kuti Jesu Mwana wa Leza.​—1 Johane 2:​22.

•   Uukazya Kristo, Munanike wa Leza.​—Intembauzyo 2:​1, 2; Luka 11:23.

•   Uulyaamba kuti ngu Kristo.​—Matayo 24:24.

•   Uupenzya basikutobela Kristo, mbwaanga Jesu ubona nzyobabacita basikumutobela kuti bazicita kulinguwe.​—Milimo 9:5.

•   Uulyaamba kuti Munakristo pele uucita zibi naa silweeno.​—Matayo 7:​22, 23; 2 Bakorinto 11:13.

 Kunze lyakwaamba bantu bali boobu kuti mbasikulwana Kristo, boonse antoomwe Bbaibbele alimwi libaamba kuti “sikulwana Kristo.” (2 Johane 7) Sikulwana Kristo wakalibonya ciindi cakusaanguna mumazuba aabaapostolo alimwi wali kubeleka kuzwa leelyo. Bbaibbele lyakaambila limwi kuti mbociyooba oobu.​—1 Johane 4:3.

•   Bayiisya njiisyo zyakubeja kujatikizya Jesu. (Matayo 24:​9, 11) Mucikozyanyo, aabo bayiisya njiisyo ya Butatu naa ibaamba kuti Jesu ngu Leza Singuzuzyoonse mubwini bakazya njiisyo zya Jesu iwakaamba kuti: “Taata mupati kwiinda ndime.”​—Johane 14:28.

•   Basikulwana Kristo balakaka ncaakaamba Jesu kujatikizya mbobubeleka Bwami bwa Leza. Mucikozyanyo, basololi bazikombelo bamwi baamba kuti Kristo ubelesya mfwulumende zyabantu kweendelezya bantu. Pele eeci taceendelani ancaakaamba Jesu naakati: “Bwami bwangu tabuzwi munyika eeyi pe.”​—Johane 18:36.

•   Baamba kuti Jesu Mwami wabo, pele tabaitobeli milawo yakwe, kubikkilizya amulawo wakukambauka makani mabotu aa Bwami.​—Matayo 28:19, 20; Luka 6:​46; Milimo 10:42.