Aisaia 19:1-25
19 Dispela em wanpela strongpela tokaut long samting bai painim Isip:+
Lukim! Jehova i sindaun antap long wanpela klaut i spit tru na i wok long i kam long Isip.
Ol yusles god bilong Isip bai pret na guria long ai bilong em,+Na bel bilong ol Isip bai pret nogut tru.
2 “Mi bai kirapim ol Isip long birua long ol yet,Na bai ol i pait long narapela narapela,Wanpela brata bai pait long brata bilong em na wanpela neiba bai pait long neiba bilong em,Wanpela taun bai pait long narapela taun, na wanpela kingdom bai pait long narapela kingdom.
3 Na tingting bilong Isip bai paul olgeta,Na bai mi paulim ol plen bilong em.+
Bai ol i tanim i go long ol yusles god,Long ol posinman, long ol man i save toktok wantaim daiman na long ol man bilong tokaut long ol samting bai kamap bihain.+
4 Mi bai putim Isip long han bilong wanpela hatpela bosman,Na wanpela hatpela king bai bosim ol,”+ Bikpela, Jehova, bosman bilong bikpela lain ami, i mekim dispela tok.
5 Wara bilong solwara bai drai,Na wara bai drai olgeta na i no ron moa.+
6 Na ol wara bai sting;Ol hanwara bilong Wara Nail long Isip bai go daun na drai olgeta.
Ol pitpit na longpela gras bai sting na bagarap.+
7 Ol gras na plaua samting i gro arere long Wara Nail, long maus bilong Wara Nail,Na olgeta graun em ol i planim ol sid long en arere long Wara Nail+ bai drai.+
Win bai karim i go na i no stap moa.
8 Na ol man bilong kisim pis bai krai sori,Ol man i tromoi huk long Wara Nail bai bel hevi na krai,Na namba bilong ol man i save tromoi umben bilong kisim pis bai go daun.
9 Ol man i save komim na stretim gut ol tret fleks,*+Na ol man i save wokim ol waitpela laplap long masin bilong lumim laplap, ol bai sem nogut tru.
10 Ol man i save wivim tret long Isip, bel bilong ol bai bagarap stret;Na olgeta wokman ol i haiarim bai krai sori.
11 Ol prins bilong Soan+ i longlong lain.
Ol nambawan edvaisa bilong Fero* i save givim ol kranki edvais.+
Hau na yupela inap tokim Fero:
“Mi wanpela tumbuna pikinini bilong ol saveman tru,Mi wanpela tumbuna pikinini bilong ol king bilong bipo tru”?
12 Orait, we stap ol saveman bilong yu?+
Larim ol i tokim yu sapos ol i save long samting em Jehova, bosman bilong bikpela lain ami, i tingting pinis long mekim long Isip.
13 Ol prins bilong Soan i mekim longlong pasin;Ol prins bilong Nof*+ i giamanim ol yet;Ol hetman bilong ol traib long Isip i mekim na ol manmeri i paul nabaut.
14 Jehova i mekim na tingting bilong Isip i paul olgeta;+Na ol i mekim Isip i paul nabaut long ol samting em i mekim,Olsem wanpela spakman i krungutim traut bilong em yet na i laik pundaun.
15 Na Isip i no inap mekim wanpela samting,I no gat wanpela samting em het o tel, o nupela kru o longpela gras* inap mekim.
16 Long dispela taim, Isip bai kamap olsem ol meri, em bai pret na guria, long wanem, Jehova, bosman bilong bikpela lain ami, i apim han bilong em long mekim save long em.+
17 Na graun bilong Juda bai kamap samting em Isip bai pret nogut tru long en. Ol bai pret taim ol i harim nem bilong Juda, long wanem, Jehova, bosman bilong bikpela lain ami, i mekim disisen pinis long samting bai painim ol.+
18 Long dispela taim, 5-pela taun long Isip bai mekim tokples bilong Kenan+ na ol bai mekim tok tru antap long stap gut long Jehova, bosman bilong bikpela lain ami. Ol bai kolim nem bilong wanpela taun olsem Taun Bilong Brukim i Go Daun.
19 Long dispela taim, bai i gat wanpela alta bilong Jehova long namel bilong graun bilong Isip na wanpela strongpela pos bilong givim ona long Jehova long boda bilong Isip.
20 Ol bai stap olsem wanpela mak na witnes long Jehova, bosman bilong bikpela lain ami, long graun bilong Isip; long wanem, ol arapela bai daunim ol na bai ol i singaut long Jehova, na em bai salim wanpela seivia, wanpela bikman, i kam kisim bek ol.
21 Na Jehova bai mekim ol Isip i save long em, na ol Isip bai save long Jehova long dispela taim, na ol bai ofaim ol sakrifais na givim ol presen na mekim ol promis long Jehova na bai ol i inapim ol dispela promis.
22 Jehova bai mekim save long Isip,+ em bai mekim save long ol na mekim ol i kamap orait; na ol bai kam bek long Jehova, na em bai harim singaut bilong ol na oraitim ol gen.
23 Long dispela taim, bai i gat wanpela bikrot+ long Isip i go aut long Asiria. Na bihain Asiria bai kam long Isip, na Isip bai go long Asiria, na Isip na Asiria wantaim bai lotuim God.
24 Long dispela taim, Israel bai stap namba 3 lain bihain long Isip na Asiria,+ em bai stap olsem wanpela blesing long graun,
25 long wanem, Jehova, bosman bilong bikpela lain ami, bai blesim ol na tok: “Ol manmeri bilong mi, Isip, na ol samting mi wokim long han bilong mi, Asiria, na lain bilong mi yet, Israel, yupela i ken kisim blesing.”+
Ol Futnot
^ Em wanpela plaua ol i planim long taim bipo. Ol i save yusim ol bun bilong en long wokim laplap linen.
^ O, “Memfis.”
^ O ating, “brens bilong diwai pam o pitpit.”
