Pilai Long Sem—Olsem Wanem Mi Ken Lusim Dispela Pasin?

“Mi kirap pilai long sem bilong mi taim mi gat 8-pela krismas. Bihain mi kisim save long tingting bilong God long dispela samting. Bel bilong mi i bagarap stret taim mi pundaun na mekim gen dispela pasin. Mi askim mi yet, ‘Olsem wanem bai God i laikim kain man olsem mi?’”​—Luiz.

TAIM yu wok long kamap bikpela, laik bilong skin long mekim maritpasin bai kamap strong. Dispela inap mekim na yu kirap pilai long sem bilong yu. * Ating planti man bai tok i no gat rong long mekim olsem. Ol i tok, “Dispela i no nogutim ol narapela.” Tasol i gat gutpela risen long sakim dispela pasin. Aposel Pol i tok: “Yupela i mas kilim i dai ol laik i stap long ol hap bilong bodi bilong yupela olsem, . . . bel i kirap strong long mekim pasin pamuk.” (Kolosi 3:5) Pasin bilong pilai long sem i no kilim i dai pasin bilong bel i kirap, nogat, em i kirapim dispela laik long i go bikpela moa. Na skelim tu ol dispela samting:

● Pasin bilong pilai sem i kirapim man long tingim em yet tasol. Olsem, taim man o meri i mekim dispela pasin, em i tingting tasol long ol amamas em i kisim long skin bilong em.

● Pasin bilong pilai long sem i givim tingting long man long tingim ol meri olsem ol i samting bilong inapim laik bilong man tasol.

● Dispela pasin bilong pilai long sem inap mekim na man i tingim laik bilong em yet na i hatwok long em i kisim amamas long mekim maritpasin insait long marit bilong em.

Yu mas wok strong long bosim bodi na sakim dispela laik bilong pilai long sem bilong yu. (1 Tesalonaika 4:4, 5) Bilong helpim yu, Baibel i tok yu mas abrusim ol samting we inap mekim bel bilong yu i kirap. (Provep 5:8, 9) Tasol olsem wanem sapos yu kalabus yet long dispela pasin? Ating yu bin traim long lusim tasol i hatwok. Em isi long kisim tingting olsem yu no inap long senis, na yu no inap long bihainim ol lo bilong God. Yangpela mangi Pedro i kisim kain tingting long em yet. Em i tok, “Taim mi pundaun gen na mekim dispela pasin, bel bilong mi i bagarap stret. Mi ting olsem mi no inap stretim dispela rong mi bin mekim. Mi pilim hatwok long beten.”

Sapos yu pilim olsem, strongim bel. Yu inap long lusim dispela pasin. Planti yangpela—na ol bikpela manmeri tu—i bin lusim dispela pasin. Yu tu inap mekim olsem!

Taim Bel i Kotim Yu

Olsem yumi stori pinis, ol lain i save pilai long sem bilong ol yet, planti taim bel bilong ol i save kotim ol. Taim ‘bel hevi bilong yu i stret wantaim laik bilong God,’ dispela inap kirapim yu long lusim dispela pasin. (2 Korin 7:11) Tasol sapos bel i wok yet long kotim yu na yu bel hevi moa yet, dispela inap nogutim yu. Em inap daunim yu na yu pilim olsem yu no inap winim dispela hevi.—Provep 24:10.

So yu mas i gat stretpela tingting. Pasin bilong pilai long sem, em i pasin doti. Em inap mekim yu “kalabus long kain kain laik na amamas,” na inap givim sampela tingting nogut long yu. (Taitus 3:3) Tasol pasin bilong pilai long sem em i no pasin pamuk. (Jut 7) Sapos yu gat hevi long pasin bilong pilai sem bilong yu, yu no ken ting olsem yu mekim wanpela rong em God i no inap lusim tingting long en. Bikpela samting em yu mas daunim dispela laik bilong pilai long sem bilong yu yet na no ken les long mekim olsem!

Sampela taim bai yu bel hevi taim yu pundaun na mekim gen dispela pasin. Sapos yu pundaun na mekim gen dispela pasin, dispela i no makim olsem yu man nogut. Olsem na no ken givap. Skelim wanem ol samting i bin kirapim yu long mekim dispela pasin, na sakim ol dispela samting.

Lusim haptaim long tingim tingim long bel pasin laikim na pasin marimari bilong God. Man bilong raitim song, em Devit, em tu i bin i gat hevi, em i tok: “Papa i save soim pasin marimari long ol pikinini man bilong em, olsem tasol Jehova i save soim pasin marimari long ol man i pret long em. Em i save gut tru long olsem wanem em i bin wokim yumi, na em i tingim yumi i olsem das tasol.” (Buk Song 103:13, 14) Yes, Jehova i save yumi sinman tasol na em i “redi long fogivim ol sin” bilong yumi. (Buk Song 86:5) Tasol em i laik yumi mas wok strong long mekim ol samting bilong lusim dispela pasin. So wanem sampela samting yu ken mekim bilong lusim dispela pasin?

Skelim ol amamas yu save kisim. Yu save watsim ol muvi o TV program o go long ol Web sait we i mekim bel yu i kirap? Man bilong raitim song i beten long God olsem: “Helpim mi na ai bilong mi i no ken lukluk long ol samting i no gutpela.”​—Buk Song 119:37.

Putim tingting bilong yu long ol narapela samting. Wanpela Kristen nem bilong em William i tok: “Taim mi laik slip long nait, mi save ritim ol buk samting bilong Baibel. Taim yu laik slip, ol tok bilong Baibel i mas stap long tingting bilong yu. Dispela em i bikpela samting.”—Filipai 4:8.

Toktok wantaim wanpela long dispela hevi. Ating yu pilim sem long toktok wantaim wanpela long dispela hevi bilong yu. Tasol sapos yu mekim olsem, dispela inap helpim yu long daunim dispela pasin! Em samting wanpela Kristen nem bilong David i mekim. Em i tok: “Mi toktok wantaim papa bilong mi long dispela hevi bilong mi. Ol gutpela tok papa i givim long mi, mi no inap lusim tingting long en. Em i mekim gut long mi na em i tok, ‘Yu kamapim dispela hevi long mi na mi amamas tru long yu.’ Papa i save, mi hatwok tru long kamapim dispela hevi bilong mi long em. Taim em i tok olsem long mi, dispela i strongim tru bel bilong mi, na mi strong moa long daunim dispela pasin.

“Nau papa i soim sampela tok bilong Baibel long mi bilong helpim mi na bai mi ken save, mi no nogut olgeta—mi inap senisim pasin bilong mi. Na em i ritim sampela tok moa bilong Baibel na bai mi ken save, dispela pasin mi bin mekim em pasin nogut. Em i makim wanpela taim bihain na bai mitupela i toktok gen long dispela samting, na em i tok, insait long dispela taim mi mas i stap stret na no ken mekim dispela pasin. Tasol em i tok, sapos mi pundaun wanpela taim, mi no ken bel hevi olgeta na bel i bagarap—mi mas makim wanpela haptaim, olsem longpela taim liklik, na insait long dispela taim mi mas wok strong long sakim dispela pasin.” Olsem wanem dispela i helpim David? Em i tok: “Samting i bin helpim mi tru long lusim dispela pasin, em mi bin kamapim dispela hevi bilong mi long wanpela man, na nau em i helpim mi.”

[Futnot]

BIKPELA SKRIPSA

“Ranawe long ol laik i save kamap long bel bilong ol yangpela. Wok strong long bihainim stretpela pasin, pasin bilong bilip, pasin laikim, bel isi, na yu mas mekim olsem wantaim ol arapela man husat i gat klinpela bel na i singaut long Bikpela.”—2 Timoti 2:22.

TRAIM DISPELA

Paslain long laik bilong bel i kamap strong moa, beten long God i helpim yu. Askim Jehova God long givim yu “strong i winim strong bilong yumi ol man” long sakim dispela laik nogut.—2 Korin 4:7.

YU SAVE LONG DISPELA . . . ?

Man i no gat strongpela bel em i save larim laik bilong bel i kirap. Tasol man i gat strongpela bel em i save bosim laik bilong skin, na em i mekim olsem tu long taim em wanpela i stap.

EKSEN PLEN!

Mi ken tingting long ol samting i klin sapos mi ․․․․․

Mi bai i no larim laik bilong bel i kirapim mi, mi bai ․․․․․

Mi laik askim papamama bilong mi long dispela topik ․․․․․

YU TING WANEM?

● Wai na em i bikpela samting long tingim olsem Jehova i “redi long fogivim ol sin” bilong yumi?—Buk Song 86:5.

● God i wokim ol manmeri na i putim dispela laik long skin bilong mekim maritpasin, tasol em i tok tu olsem yu mas bosim gut bodi bilong yu. So God i save olsem yu inap mekim wanem?

[Bikpela Tok]

Mi daunim pinis dispela pasin na nau mi pilim olsem mi no gat asua long ai bilong Jehova na bel bilong mi i no gat tok moa, na dispela em i bikpela samting tru long mi, winim olgeta narapela samting!’’​—Sarah

[Piksa]

Sapos yu ron na yu pundaun dispela i no makim olsem yu mas go bek long kirap na stat gen long ron, nogat—na i wankain tu sapos yu pundaun gen na pilai long sem bilong yu, dispela i no makim olsem ol samting yu mekim pinis bilong lusim dispela pasin i lus nating, nogat