Tok i Go Pas
“Bihainim pasin bilong ol man husat i bilip na i no les kwik na long dispela rot ol i kisim ol samting God i tok promis long en.”—HIBRU 6:12.
1, 2. Wanpela wasman raun i gat wanem tingting long ol bilipman na meri em Baibel i stori long ol? Wai na ol dispela manmeri i gutpela pren?
Bihain long wanpela meri Kristen i harim wanpela wasman raun husat i gat bikpela krismas i mekim wanpela tok, meri i tok: “Em i stori long ol dispela manmeri long Baibel olsem ol i olpela pren bilong em.” Na dispela tok i stret, inap planti yia brata i bin stadi long Baibel na yusim long skulim ol narapela, olsem na em i save gut long stori bilong ol bilipman na meri long Baibel, i olsem ol i olpela pren bilong em na em i save gut long ol.
2 Yu ting em bai gutpela long kamap pren bilong planti bilong ol manmeri Baibel i stori long ol? Yu tingim ol olsem ol manmeri i stap tru? Piksaim hau bai yu pilim taim yu wokabaut na toktok wantaim ol, long lusim sampela taim long save long manmeri olsem Noa, Abraham, Rut, Elaija, na Esta. Tingim samting ol inap mekim long laip bilong yu—ol inap givim ol gutpela edvais na tok bilong strongim yu!—Ritim Provep 13:20.
3. (a) Taim yumi kisim save long ol bilipman na meri Baibel i stori long ol, hau bai dispela i helpim yumi? (b) Bai yumi skelim wanem ol askim?
3 Tru tumas, long taim bilong “kirap bek bilong . . . ol stretpela man,” dispela kain pasin pren bai i stap tru. (Apo. 24:15) Tasol long nau, yumi ken kisim helpim long rot bilong kisim save long ol bilipman na meri em Baibel i stori long ol. Hau bai yumi kisim helpim? Aposel Pol i bekim olsem: “Bihainim pasin bilong ol man husat i bilip na i no les kwik na long dispela rot ol i kisim ol samting God i tok promis long en.” (Hib. 6:12) Taim yumi kirap long kisim save long ol bilipman na meri, yumi mas skelim ol askim em tok bilong Pol i kirapim yumi long tingim: Bilip em wanem samting? Wai yumi nidim bilip? Hau bai yumi bihainim bilip bilong ol manmeri bilong bipo?
Bilip—Em Wanem Samting na Wai Yumi Nidim Bilip
4. Ol man i gat wanem tingting long bilip? Bilong wanem tingting bilong ol i no stret?
4 Bilip em wanpela gutpela pasin, em samting olgeta man na meri bai yumi kisim save long ol long dispela buk i tingim tru. Planti man long nau i no save bilip tru i makim wanem samting, ol i ting dispela i makim bilip i no gat evidens. Tasol tingting bilong ol i no stret. Bilip i no olsem man i bilip nating; em i no wanpela filings tasol; planti samting i insait long en. Pasin bilong bilip nating inap bagarapim man. Wanpela filings nating inap kamap na pinis, na tu, bilip tasol long God i no inap bikos “ol spirit nogut tu i bilip olsem, na ol i guria.”—Jems 2:19.
5, 6. (a) Wanem tupela samting yumi no inap lukim i insait long bilip bilong yumi? (b) Bilip bilong yumi i mas strong olsem wanem? Stori long dispela.
5 Bilip tru i winim pasin bilong bilip nating. Tingim tok Baibel i kamapim. (Ritim Hibru 11:1.) Pol i tok i gat tupela samting i insait long bilip em yumi no inap lukim. Namba 1, em ol samting i stap tru long nau “maski yu no lukim long ai.” Ai bilong yumi i no inap lukim ol samting i stap long ples spirit—olsem Jehova God, Pikinini bilong em, o Kingdom nau i mekim wok bos long heven. Namba 2, em “ol samting yu bilip na wet long en”—ol samting i no kamap yet. Nau yumi no inap lukim nupela taim em klostu nau Kingdom Bilong God bai kamapim. Yu ting, dispela i makim olsem bilip bilong yumi long ol samting i stap tru na ol samting yumi bilip na wetim i no gat as bilong en?
6 Nogat tru! Pol i tok bilip tru i gat as bilong en. Taim em i tok pasin bilong bilip i olsem “yu save tru olsem ol samting . . . bai kamap tru,” em i yusim wanpela tok em ol inap tanim tu olsem “taitol pepa.” Tingim olsem wanpela i laik givim haus long yu. Em inap givim taitol pepa bilong dispela ples na tok, “Em nupela haus bilong yu.” Dispela i no makim olsem yu bai stap long dispela pepa; em i makim olsem dispela pepa i stret long ai bilong gavman olsem dispela haus i bilong yu. Olsem tasol, ol evidens i strongim tru bilip bilong yumi, i olsem ol samting yumi bilip long en i kamap pinis.
7. Wanem samting i insait long bilip tru?
7 Ol save yumi kisim i as bilong strongpela bilip bilong yumi na yumi putim tingting long Jehova God. Bilip i kirapim yumi long tingim em olsem Papa i gat pasin laikim na yumi trastim em olsem olgeta tok promis bilong em bai kamap tru. Tasol planti samting i insait long bilip tru. Yumi mas mekim samting na bai bilip i stap strong. Bilip i mas kamap ples klia long ol wok yumi mekim, sapos nogat em bai dai.—Jems 2:26.
8. Wai na bilip i bikpela samting?
8 Wai na bilip i bikpela samting? Pol i kamapim wanpela gutpela bekim. (Ritim Hibru 11:6.) Sapos yumi gat bilip, yumi inap i go klostu long Jehova o amamasim em. So bilip i bikpela samting sapos yumi laik inapim dispela bikpela wok, em wok i gat nem man inap mekim: long i go klostu na givim glori long Papa bilong yumi long heven, Jehova.
9. Hau Jehova i soim olsem em i save yumi nidim bilip?
9 Jehova i save yumi nidim bilip, so em i kamapim ol eksampel bilong skulim yumi long hau yumi inap kisim na soim bilip. Em i blesim kongrigesen Kristen na givim ol man i stap gutpela eksampel long go pas long yumi. Baibel i tok: “Bihainim pasin bilong ol long bilip.” (Hib. 13:7) Na em i givim planti eksampel moa. Pol i stori long “bikpela klaut . . . olsem witnes,” em ol man na meri bilong bipo em ol i stap gutpela eksampel long bilip. (Hib. 12:1) Pol i raitim lista bilong ol bilipman na meri long Hibru sapta 11, na i gat planti i stap yet. Baibel i pulap long planti gutpela stori bilong ol man na meri, yangpela na lapun, bilong kain kain sindaun, ol i gat strongpela bilip na ol inap skulim yumi long planti samting long dispela taim we ol man i no gat bilip.
Hau Yumi Inap Bihainim Bilip Bilong Ol Narapela?
10. Hau stadi bilong yumi yet inap helpim yumi long bihainim pasin bilong ol bilipman na meri long Baibel?
10 Long bihainim pasin bilong wanpela man, pastaim yu mas save gut long em. Taim yu ritim dispela buk, yu bai luksave olsem ol i bin mekim planti wok painimaut bilong helpim yu long save gut long ol dispela bilipman na meri. Yu yet i ken mekim sampela wok painimaut moa. Long stadi bilong yu yet, yusim gut Baibel na ol tul yu gat pinis long mekim wok painimaut. Taim yu tingim tingim long bel samting yu stadim, piksaim ples na bekgraun bilong dispela stori bilong Baibel. Piksaim dispela ples, harim saun, na smelim ol samting, olsem yu stap long hap. Bikpela samting moa, traim long pilim filings bilong ol man insait long stori. Taim yu save gut long ol dispela bilipman na meri, bai yu tingim ol olsem lain i stap tru—yu inap tingim sampela olsem ol olpela pren bilong yu.
11, 12. (a) Hau yu inap pilim wankain olsem Abram na Sarai? (b) Hau yu inap kisim helpim long eksampel bilong Hana, Elaija, na Samuel?
11 Taim yu save gut long ol, yu bai laik bihainim pasin bilong ol. Eksampel, tingim olsem yu kisim wanpela nupela wok. Long rot bilong oganaisesen bilong Jehova, yu kisim invatesen long mekim sampela wok moa. Ating ol i askim yu long muv i go long wanpela teritori i nidim sampela moa pablisa, o ating yu kisim invatesen long traim sampela kain wei bilong autim tok em yu no bin mekim bipo o i hatwok. Taim yu tingting long dispela wok na beten, yu ting eksampel bilong Abram inap helpim yu? Em na Sarai i redi long lusim gutpela sindaun long Ur na ol i kisim planti blesing. Taim yu bihainim lek mak bilong ol, yu bai bilip tru olsem nau yu save gut long ol winim bipo.
12 Olsem wanem sapos wanpela yu save gut long em i no mekim gut long yu na yu bel hevi—ating yu tingting long stap long haus na i no go long ol miting? Sapos yu tingim eksampel bilong Hana na samting em i mekim taim Penina i mekim nogut long em, dispela bai helpim yu long mekim gutpela disisen—na yu bai tingim Hana olsem gutpela pren bilong yu. Na tu, sapos yu bel hevi na pilim olsem yu samting nating, yu bai pilim wankain olsem Elaija taim yu stadi long hevi i painim em na rot Jehova i mekim gut long em. Na ol yangpela i karim hevi long ol wanskul i pulim ol long mekim pasin i no stret, inap pilim wankain olsem Samuel taim ol i stadi long samting em i mekim long sakim pasin nogut bilong tupela pikinini bilong Eli long haus lotu sel.
13. Taim yu bihainim bilip bilong ol manmeri em Baibel i stori long ol, yu ting dispela i mekim na bilip bilong yu i olsem samting nating? Stori long dispela.
13 Taim yu bihainim bilip bilong ol manmeri em Baibel i stori long ol, yu ting dispela i mekim na bilip bilong yu i olsem samting nating? Nogat tru! Tok Bilong Jehova i kirapim yumi long bihainim ol bilipman na meri. (1 Kor. 4:16; 11:1; 2 Tes. 3:7, 9) Narapela samting, sampela bilong ol bilipman em yumi bai stadi long ol long dispela buk i bihainim pasin bilong ol bilipman i stap paslain long ol. Kain olsem, yumi lukim long Sapta 17, tok bilong Maria i soim klia olsem em i kolim ol tok bilong Hana, em i tingim Hana olsem gutpela eksampel. Yu ting dispela i mekim na bilip bilong Maria i no strong? Nogat! Eksampel bilong Hana i helpim Maria long kisim bilip na bai em inap i gat gutnem long ai bilong Jehova God.
14, 15. Wanem sampela samting i stap long dispela buk, na hau yumi inap yusim gut?
14 Ol i wokim dispela buk long helpim yu long strongim bilip bilong yu. Ol sapta i kamap bihain ol i kisim long ol atikol “Bihainim Bilip Bilong Ol” long Wastaua bilong 2008 i go 2013. Tasol ol i putim sampela samting moa. I gat ol askim bilong ol stori na hau yumi inap bihainim. Na i gat planti kala kala piksa, na ol piksa i stap pinis ol i wokim i go bikpela na i klia moa. Ol narapela samting tu inap helpim yu, olsem taimlain na ol mep. Buk Bihainim Bilip Bilong Ol em wanpela tul ol i wokim bilong yumi ken mekim pesenel stadi, famili lotu, na stadi bilong kongrigesen. Ating planti famili bai amamas long ritim ol dispela stori.
15 Dispela buk i ken helpim yu long bihainim bilip bilong ol wokman husat i stap gut long Jehova long bipo. Na em inap helpim yu long kamap strong long bilip taim yu go klostu moa long Papa bilong yu long heven, Jehova!
