1. Stori long bel hevi bilong Marta.

 MARTA inap piksaim long tingting—matmat bilong brata bilong em, em wanpela keiv i gat bikpela ston i pasim ai bilong en. Bel bilong em i hevi nogut tru. Em i no inap bilip olsem gutpela brata bilong em Lasarus i no stap moa. Insait long 4-pela de we Lasarus i bin dai, ol i krai sori, na planti visita i kam bilong tok sori na strongim bel bilong ol.

2, 3. (a) Taim Marta i lukim Jisas, ating dispela i mekim wanem long em? (b) Bikpela tok Marta i mekim i kamapim klia em i wanem kain meri?

² Na nau, gutpela pren tru bilong Lasarus i sanap long ai bilong Marta. Taim Marta i lukim Jisas dispela i mekim bel hevi bilong em i go bikpela tru, long wanem, Jisas em wanpela man tasol long graun olgeta husat inap seivim brata bilong em. Tasol Marta i bel isi liklik taim em i stap wantaim Jisas ausait long liklik taun Betani i stap long ol ples maunten. Long dispela liklik haptaim Marta i stap wantaim Jisas, em i amamas long gutpela pasin bilong Jisas long pilim tru hevi bilong em na dispela i strongim em. Jisas i givim ol askim long Marta bilong helpim em long putim tingting i go long bilip bilong em na long kirap bek. Toktok i kamap namel long tupela i kirapim Marta long mekim wanpela bikpela tok: “Mi bilip pinis olsem yu Krais, Pikinini Bilong God, dispela man husat i mas i kam na stap namel long ol manmeri.”​—Jon 11:27.

³ Ol dispela tok i kamapim olsem Marta em meri i gat strongpela bilip. Sotpela stori Baibel i mekim long gutpela pasin bilong Marta inap helpim yumi long strongim bilip bilong yumi yet. Bilong save long dispela, yumi ken tingim fes taim Baibel i stori long Marta.

4. Olsem wanem famili bilong Marta i narapela kain? Ol i gat wanem kain pasin pren wantaim Jisas?

⁴ Sampela mun paslain long dispela. Lasarus i stap laip na em i no gat sik. Klostu nau em bai kisim nambawan gutpela visita, Jisas Krais, long haus bilong em long Betani. Famili bilong Lasarus, Marta, na Maria i narapela kain, tripela bratasusa i bikpela pinis i stap wantaim long wanpela haus. Sampela saveman i tok Marta i  fesbon, long wanem, em i save go pas long mekim gut long ol visita, na sampela taim Baibel i kolim nem bilong em fes long tupela. (Jon 11:5) I no gat rot long save sapos wanpela bilong ol i bin marit o nogat. Tasol yumi save olsem ol i gutpela pren tru bilong Jisas. Taim Jisas i mekim wok autim tok long Judia, we planti manmeri i birua long em na i no laik harim tok, em i save stap long haus bilong ol. Yumi ken save olsem em i tingim dispela haus olsem ples bilong kisim bel isi na helpim.

5, 6. (a) Wai na Marta i bisi tru long fes visit bilong Jisas? (b) Maria i mekim wanem taim Jisas i go long haus bilong ol?

⁵ Marta i save wok strong long lukautim gut ol man i kam long haus na bai ol i ken stap bel isi. Em i meri bilong wok, na planti taim i luk olsem em i bisi long mekim ol samting. Em i mekim olsem tu taim Jisas i bin visitim ol. Em i plen long redim spesel kaikai bilong dispela nambawan gutpela visita, na ating ol poroman bilong em i raun wantaim em. Long dispela taim bipo, pasin bilong lukautim gut ol visita i bikpela samting tru. Taim visita i kamap, ol i givim kis long em bilong welkamim em, rausim sandel bilong em, wasim lek bilong em, na welim het bilong em long oil i gat gutpela smel. (Ritim Luk 7:44-47.) Ol i save mekim gut olgeta samting na bai visita i gat gutpela ples slip na kaikai.

⁶ Marta na Maria i gat planti wok long mekim. Yumi ken ting olsem Maria—em meri bilong pilim gut tingting bilong ol narapela na tingim gut ol samting—i bin helpim susa bilong em paslain long Jisas i kam kamap. Tasol taim Jisas i kamap, ol samting i senis. Jisas i lukim olsem dispela i gutpela haptaim bilong skulim ol manmeri—na tru tumas em i mekim olsem! Jisas i no olsem ol bikman bilong lotu long taim bilong em, em i rispektim ol meri na i redi long skulim ol long Kingdom Bilong God, em bikpela tok em i autim. Maria i amamas long dispela, olsem na em i sindaun klostu long lek bilong Jisas na putim gut yau long olgeta tok em i mekim.

7, 8. Wai na Marta i kros? Olsem wanem em i kamapim kros bilong em?

⁷ Yumi ken piksaim long tingting olsem Marta i pilim bikpela presa. Em i mas redim planti kaikai na mekim ol narapela wok bilong lukautim ol visita, olsem na em i tingting planti na i no putim yau long Jisas. Taim em i bisi na i go i kam long mekim wok, na lukim susa bilong em i sindaun na i no helpim em, yu ting pes bilong em i senis na em i soim olsem em i no amamas? Yumi no kirap nogut sapos em i mekim olsem. Em yet i no inap mekim olgeta wok!

⁸ Nau Marta i no inap holimpas moa kros bilong em. Em i katim tok bilong Jisas, na i tok: “Bikpela, yu no wari olsem susa bilong mi i larim mi tasol long mekim ol samting? Tokim em long  kam helpim mi.” (Luk 10:40) Dispela em ol strongpela tok. Sampela Baibel i tanim dispela askim bilong em olsem: “Bikpela, . . . ating yu no tingting long dispela?” Orait nau em i askim Jisas long stretim Maria na tokim em long go bek na mekim wok.

9, 10. (a) Jisas i bekim wanem tok long Marta? (b) Yu ting Jisas i no tingim hatwok bilong Marta?

⁹ Ating bekim bilong Jisas i mekim Marta i kirap nogut, na ol man bilong ritim Baibel tu i kirap nogut long en. Long pasin isi em i tok: “Marta, Marta, yu tingting planti na wari long planti samting. Yumi no gat wok long planti samting, ating wanpela samting tasol em inap long yumi. Maria i bin makim gutpela samting long mekim, na dispela samting i no inap tekewe long em.” (Luk 10:41, 42) Wanem insait bilong tok bilong Jisas? Yu ting em i kolim Marta olsem meri bilong tingim ol samting bilong skin? Em i no tingim hatwok bilong Marta long redim gutpela kaikai?

¹⁰ Nogat. Jisas i luksave olsem Marta i gat pasin laikim na stretpela tingting. Na tu, Jisas i no ting pasin bilong redim planti kaikai i no stret, nogat. Paslain liklik em i go long “bikpela kaikai” em Matyu i bin redim bilong em. (Luk 5:29) Jisas i no toktok long kaikai Marta i redim; em i toktok long samting Marta i tingim olsem nambawan samting. Em i tingting tumas long dispela bikpela kaikai na em i no tingim samting i mas i stap nambawan. Em wanem samting?

11, 12. Long pasin isi olsem wanem Jisas i stretim Marta?

¹¹ Jisas, dispela wanpela Pikinini Bilong Jehova God, i stap long haus bilong Marta bilong skulim ol long tok i tru. Olgeta narapela samting, na tu, gutpela kaikai na ol samting Marta i redim, ol i no bikpela samting. Tru, Jisas i bel hevi olsem Marta i no putim yau long ol gutpela tok bilong strongim bilip bilong em, tasol em i larim Marta yet i makim samting em i laik mekim. a Na tu, i no stret long Marta i askim Jisas long tokim Maria long mekim samting Marta i laikim.

¹² Olsem na long pasin isi em i stretim Marta, em i kolim gen nem bilong Marta bilong mekim isi bel bilong em, na strongim em olsem i no gat wok long “tingting planti na wari long planti samting.”  Pasin bilong redim wanpela o tupela kain kaikai tasol em inap, na moa yet long taim rot i op bilong kisim ol gutpela tok long Jisas. Olsem na Jisas i no inap tekewe “gutpela samting” Maria i bin makim—em long kisim skul long Jisas!

13. Yumi inap kisim wanem skul long pasin bilong Jisas long stretim Marta?

¹³ Dispela stori bilong ol samting i kamap long haus bilong Marta, i gat planti skultok bilong helpim ol disaipel bilong Krais long nau. Yumi no ken larim wanpela samting i pasim yumi long “kisim save long God.” (Mat. 5:3) Yumi laik bihainim pasin bilong Marta long givim samting na mekim wok, tasol yumi no ken “tingting planti na wari” long ol liklik samting long pasin bilong lukautim ol narapela na lus long kisim ol bikpela samting. Yumi bung wantaim ol wanbilip bilong strongim narapela narapela na givim  ol presen i kam long God, na yumi no bung wantaim ol bilong givim o kisim kaikai samting na em tasol, nogat. (Ritim Rom 1:11, 12.) Long taim bilong strongim narapela narapela, liklik kaikai tasol em inap.

14. Hau na yumi save Marta i stap gutpela eksampel long pasin bilong kisim tok bilong stretim yumi?

¹⁴ Yu ting Marta i orait long tok bilong Jisas long stretim em na kisim skul long dispela? Yumi save em i bin mekim olsem. Taim aposel Jon i raitim stori bilong brata bilong Marta, em i tok: “Jisas i laikim tru Marta na susa bilong em na Lasarus.” (Jon 11:5) Sampela mun i go pinis taim Jisas i go long Betani olsem yumi stori pinis. I klia olsem Marta i no bel hevi; em i no tingim tingim na bel nogut long gutpela tok bilong Jisas long stretim em. Em i kisim tok bilong stretim em. Long dispela samting tu, em i stap gutpela eksampel long pasin bilong bilip, long wanem, sampela taim yumi olgeta i mas kisim tok bilong stretim yumi.

15, 16. (a) Marta i mekim wanem taim brata bilong em i sik? (b) Bilong wanem tingting bilong Marta na Maria i bagarap tru?

¹⁵ Taim brata bilong em i sik, Marta i bisi long lukautim em. Em i mekim olgeta samting bilong mekim isi bel bilong Lasarus na helpim em long kamap orait. Tasol sik bilong Lasarus i go bikpela moa. Inap planti aua na planti de, ol susa bilong em i stap klostu long em bilong lukautim em. Ating planti taim Marta i lukluk long pes bilong brata bilong em, em i tingim planti yia ol i bin stap wantaim na ol amamas na bel hevi ol i karim wantaim!

¹⁶ Taim Marta na Maria i lukim olsem ol i no inap moa long helpim Lasarus, ol i salim tok long Jisas. Jisas i autim tok long wanpela ples i stap longwe long Betani inap tupela de bilong wokabaut. Ol i salim tok olsem: “Bikpela, harim! dispela man yu laikim tumas, em i sik.” (Jon 11:1, 3) Ol i save olsem Jisas i laikim tru brata bilong ol, na ol i bilip olsem em bai mekim ol samting bilong helpim pren bilong em. Olsem wanem? Ol i tingting strong olsem Jisas bai kamap paslain long brata bilong ol i dai? Sapos olsem, tingting bilong ol i bagarap tru. Lasarus i dai pinis.

17. Marta i tingting planti long wanem samting? Em i mekim wanem taim em i harim olsem Jisas i kam klostu pinis long taun?

¹⁷ Marta na Maria i krai sori long brata bilong ol, ol i redim ol samting bilong planim em na planti lain bilong Betani na ol ples i stap klostu i kam lukim ol. Ol i no harim wanpela tok yet long Jisas. Sampela de i lus pinis na ating Marta i tingting planti. Nau, 4-pela de bihain long Lasarus i dai, Marta i harim olsem Jisas i kam klostu pinis long taun. Em i meri bilong wok, na maski em i bel  hevi tru, em i hariap long go bungim Jisas na em i no toksave long Maria.​—Ritim Jon 11:18-20.

18, 19. Marta i kamapim bilip bilong em long wanem samting? Wai na bilip bilong em i narapela kain?

¹⁸ Taim Marta i lukim Bikman bilong em, em i tokaut long samting em yet na Maria i bin wari long en inap sampela de, em i tok: “Bikpela, sapos yu bin stap long hia, brata bilong mi i no inap i dai.” Marta i bilip na wet long gutpela samting bai kamap bihain. Em i tok moa: “Tasol mi save olsem nau yet ol samting yu askim God long en, God bai givim long yu.” Wantu Jisas i mekim wanpela tok bilong strongim bilip bilong em: “Brata bilong yu bai kirap bek.”​—Jon 11:21-23.

¹⁹ Marta i ting Jisas i toktok long kirap bek bai kamap long bihain, so em i tok: “Mi save em bai kirap bek long las de.” (Jon 11:24) Bilip bilong em long dispela tok i strong tru. Sampela hetman bilong lotu Juda, em ol Sadyusi, i no bilip olsem bai i gat kirap  bek, maski Baibel i tokaut long dispela. (Dan. 12:13; Mak 12:18) Tasol Marta i save olsem Jisas i bin skulim ol man long bilip bilong kirap bek na em i bin kirapim bek sampela man—maski em i no bin kirapim bek wanpela husat i dai inap sampela de pinis olsem Lasarus. Marta i no save long samting bai kamap.

20. Stori long mining bilong bikpela tok Jisas i mekim long Jon 11:25-27. Bekim bilong Marta i kamapim wanem samting?

²⁰ Nau Jisas i mekim wanpela bikpela tok: “Kirap bek em mi yet na laip em mi yet.” Tru tumas, Jehova God i givim namba long Pikinini bilong em long kirapim bek olgeta daiman long bihain. Jisas i askim Marta: “Yu bilipim dispela tok?” Nau Marta i bekim tok i stap long kirap bilong dispela sapta. Em i bilip olsem Jisas em i Krais, o Mesaia, em i Pikinini Bilong Jehova God, na em i dispela man ol profet i bin tokaut olsem em bai kam long dispela graun.​—Jon 5:28, 29; ritim Jon 11:25-27.

21, 22. (a) Hau Jisas i soim olsem em i pilim bel hevi bilong ol man i krai sori? (b) Stori long kirap bek bilong Lasarus.

²¹ Yu ting Jehova God na Pikinini bilong em, Jisas Krais, i amamas long kain bilip olsem bilong Marta? Ol samting nau Marta bai lukim i bekim ol dispela askim. Em i go hariap long kisim susa bilong em. Marta i lukim olsem bel bilong Jisas i bagarap tru taim em i toktok long Maria na ol manmeri i krai sori. Marta i lukim aiwara long ai bilong Jisas i soim olsem em i pilim tru bikpela bel hevi em dai i save kamapim. Em i harim Jisas i tok long ol i mas rausim ston long matmat bilong brata bilong em.​—Jon 11:28-39.

²² Tingting bilong Marta i stret taim em i tok bodi bilong Lasarus bai smel bikos em i dai inap 4-pela de i go pinis. Tasol Jisas i tokim em: “Mi bin tokim yu pinis olsem sapos yu bilip, yu bai lukim glori bilong God.” Em i bilip, na tru tumas em i lukim glori bilong Jehova God. Long dispela taim stret, Jehova i givim strong long Pikinini bilong em long kirapim bek Lasarus! Tingim, ol samting i kamap long dispela taim i mas stap strong tru long tingting bilong Marta i go inap em i dai: Jisas i singaut olsem “Lasarus, yu kam ausait!”; nois i kamap long keiv taim Lasarus i kirap na laplap i karamapim yet bodi bilong em, isi isi em i kam ausait long dua bilong keiv; Jisas i tok long ol i mas “rausim ol laplap na larim em i go”; na bikpela amamas tru i kamap taim Marta na Maria i ron i go holimpasim brata bilong ol. (Ritim Jon 11:40-44.) Marta i no bel hevi moa!

23. Jehova na Jisas i laik mekim wanem long yu? Yu mas mekim wanem?

²³ Dispela stori i soim olsem kirap bek bilong ol man i dai pinis i no driman nating tasol; em i wanpela gutpela tok bilong Baibel na i bin kamap tru long bipo. (Jop 14:14, 15) Jehova na Pikinini  bilong em i amamas long givim ol gutpela samting long ol man i bilip, olsem ol i mekim long Marta, Maria, na Lasarus. Ol bai givim ol gutpela samting long yu tu, sapos yu kisim strongpela bilip.

24. Wanem laspela taim Baibel i stori long Marta?

²⁴ Baibel i stori gen long Marta. Em long kirap bilong laspela wik bilong Jisas long graun. Jisas i save long ol bikpela hevi bai painim em, olsem na em i go gen long dispela haus long Betani we em i save kisim bel isi long en. Long dispela ples, em bai wokabaut inap 3 kilomita bilong i go long Jerusalem. Jisas na Lasarus i kaikai i stap long haus bilong lepraman Saimon, em laspela taim we Baibel i stori long Marta, na i tok: “Marta i wok long skelim kaikai.”​—Jon 12:2.

25. Bilong wanem em i gutpela samting long i gat ol meri olsem Marta i stap long kongrigesen?

²⁵ Em pasin bilong dispela meri long bisi long wok! Fes taim yumi bin ritim stori bilong em long Baibel, em i wok; laspela taim yumi ritim stori bilong em, em i wok yet, em i wok strong long lukautim gut ol manmeri i stap wantaim em. Long ol kongrigesen bilong ol disaipel bilong Krais long nau, i gat planti meri olsem Marta—ol i gat strongpela bel na pasin bilong givim samting, olgeta taim ol i kamapim bilip bilong ol long rot bilong givim taim na strong bilong ol bilong helpim ol narapela. Yu ting Marta i bin wok long mekim olsem? I luk olsem. Sapos olsem, em i bihainim savetingting, long wanem, dispela bai helpim em long karim hevi long bihain.

26. Bilip bilong Marta i helpim em long mekim wanem?

²⁶ Bihain long sampela de, Marta i mas karim bel hevi bilong dai bilong Bikman bilong em, Jisas. Na tu, ol dispela man nogut husat i kilim i dai Jisas ol i tingting strong long kilim i dai Lasarus tu, long wanem, kirap bek bilong Lasarus i strongim bilip bilong planti manmeri. (Ritim Jon 12:9-11.) Na tru tumas, bihain dai i pinisim pasin laikim namel long Marta na bratasusa bilong em. Yumi no save olsem wanem o wanem taim dispela samting i kamap, tasol yumi save: Gutpela bilip bilong Marta i helpim em long sanap strong i go inap long em i dai. Olsem na i gutpela long ol Kristen long nau i bihainim bilip bilong Marta.