1, 2. Noa na famili bilong em i insait long wanem projek? Ol i feisim wanem sampela salens?

 NOA i sanap na stretim baksait na ol masol bilong em i pen. Piksaim long tingting em i sindaun long bikpela hap plang, malolo liklik na lukluk long traipela sip em i wokim. Strongpela smel bilong kolta i stap long win; pairap bilong ol tul bilong wokim ol samting long diwai. Long hap Noa i sindaun long en, em inap lukim ol pikinini man bilong em i wok strong long wokim ol bun na ol narapela hap bilong sip. Ol pikinini man bilong em, ol meri bilong ol, na meri bilong Noa yet, ol i wok wantaim em long wokim dispela sip inap planti yia pinis. Ol i wokim pinis bikpela hap bilong sip, tasol i gat planti wok i stap yet.

² Ol manmeri long hap bilong ol i ting ol i longlong. Taim isi isi sip i wok long kamap, ol manmeri i lap moa yet taim ol i tingim dispela tok long bikpela tait wara bai karamapim olgeta hap bilong graun. Ol i ting bikpela bagarap Noa i tok lukaut long en i olsem stori nating tasol na i no inap kamap tru! Ol i no inap bilip olsem wanpela man inap westim nating laip bilong em—na bilong famili bilong em—long kain longlong wok olsem. Tasol long ai bilong God bilong Noa, em Jehova, Noa i no longlong man.

3. Long wanem rot Noa i wokabaut wantaim God?

³ Baibel i tok: “Noa i wokabaut wantaim God tru.” (Ritim Stat 6:9.) Dispela i makim wanem samting? I no olsem God i bin kam long graun, o Noa i go long heven, nogat. Noa i bihainim olgeta tok bilong God bilong em na laikim em tru na i olsem em na Jehova i wokabaut wantaim olsem ol pren. Sampela tausen yia bihain, Baibel i tok long Noa olsem: “Long . . . bilip bilong em, em i soim olsem ol manmeri bilong dispela graun i gat asua.” (Hib. 11:7) Em i mekim olsem wanem? Long nau, bilip bilong em inap skulim yumi long wanem samting?

4, 5. Long taim bilong Noa, hau na pasin nogut i go nogut moa?

⁴ Noa i go bikpela namel long ol lain em pasin bilong ol i wok long go nogut moa. Long taim bilong tumbuna bilong em Enok, em narapela stretpela man husat i wokabaut wantaim God, ol man i bin mekim tu ol pasin nogut. Enok i bin tok profet long wanpela de bilong kot bai painim ol manmeri bilong graun i givim baksait long God. Tasol long taim bilong Noa, pasin bilong ol man i go nogut moa yet. Tru  tumas, long ai bilong Jehova, graun i bagarap pinis, bikos pasin bilong pait na bagarapim man i pulap. (Stt. 5:22; 6:11; Jut 14, 15) Wanem samting i mekim na pasin nogut i go nogut moa?

⁵ Wanpela samting nogut tru i wok long kamap namel long ol pikinini spirit bilong God, ol ensel. Wanpela bilong ol i bin bikhet pinis long Jehova, na em i kamap Satan dispela Devil taim em i krungutim gutnem bilong God na pulim Adam na Iv long mekim sin. Long taim bilong Noa, sampela ensel moa i bikhet long Jehova na stretpela wok bos bilong em. Ol i lusim wok God i bin givim long ol long heven, ol i kam daun long graun, tanim i kamap man, na ol i maritim ol naispela meri. Ol dispela bikhet ensel i gat pasin antap i tingim ol yet tasol, na pasin nogut bilong ol i wok long pulim ol manmeri.​—Stt. 6:1, 2; Jut 6, 7.

6. Pasin bilong ol Nefilim i mekim wanem long ol manmeri? Jehova i tingting pinis long mekim wanem?

⁶ Na tu, ol dispela ensel i maritim ol meri bilong graun na kamapim ol pikinini man i traipela longpela man na ol i gat bikpela strong tru. Baibel i kolim ol Nefilim, em ol man bilong pait na bagarapim ol narapela. Ol Nefilim, ol i man bilong buli tru, ol i mekim pasin nogut bilong graun i go nogut moa. Olsem na Man Bilong Wokim olgeta samting i lukim “pasin bilong ol manmeri long graun i go nogut tru, na oltaim ol i tingting tasol long mekim pasin nogut.” Jehova i tingting pinis long em bai pinisim ol dispela manmeri nogut bihain long 120 yia.​—Ritim Stat 6:3-5.

7. Noa na meri bilong em i feisim wanem hevi taim ol i protektim ol pikinini bilong ol long ol pasin nogut bilong dispela taim?

⁷ Ating em i hatwok tru long ol papamama i mekim bikpela long ol pikinini long dispela kain taim! Tasol Noa i bin mekim olsem. Em i maritim wanpela gutpela meri. Taim Noa i winim pinis 500 krismas,  meri bilong em i karim 3-pela pikinini man—Siem, Ham, na Jafet. a Papa na mama wantaim i mas lukautim gut ol pikinini bilong ol na bai ol pasin nogut i no ken pulim ol. Ol liklik mangi i save amamas long lukim na bihainim pasin bilong ol man i gat “bikpela strong” na “biknem”—na ol Nefilim i kain man olsem. Tru, Noa na meri bilong em i no inap banisim ol pikinini bilong ol long harim ol kain stori long ol samting nogut ol dispela traipela man i mekim, tasol tupela inap skulim ol long gutpela tok i tru long Jehova God, em man i heitim tru olgeta kain pasin nogut. Ol i mas helpim ol pikinini bilong ol long save olsem Jehova i save bel hevi tru taim em i lukim ol man i pait na bagarapim narapela na mekim pasin bikhet.​—Stt. 6:6.

8. Olsem wanem ol papamama i gat savetingting inap bihainim eksampel bilong Noa na meri bilong em?

⁸ Ol papamama long nau inap pilim hatwok bilong Noa na meri bilong em. Pasin bilong pait na bagarapim man na bikhet i olsem marasin nogut i wok long bagarapim ol man. Ol taun i save pulap long ol geng bilong ol bikhet mangi. Na ol piksa ol i wokim bilong ol yangpela i pulap long pasin bilong pait na bagarapim man. Ol papamama i gat savetingting i save mekim olgeta samting ol inap mekim bilong helpim ol pikinini long sakim ol dispela pasin, long rot bilong skulim ol long God bilong bel isi, Jehova, husat bai pinisim tru pasin bilong pait na bagarapim man long bihain. (Sng. 11:5; 37:10, 11) Gutpela samting inap kamap! Noa na meri bilong em i bin skulim gut ol pikinini bilong ol. Ol pikinini man bilong ol i go bikpela na kamap gutpela man, na ol i maritim ol meri em ol tu i amamas long putim God tru, Jehova, i stap namba 1 long laip bilong ol.

9, 10. (a) Wanem tok Jehova i mekim i senisim i stap bilong Noa? (b) Jehova i tokim Noa long wokim sip olsem wanem? Wai na em i mas wokim sip?

⁹ Wanpela taim, i stap bilong Noa i senis olgeta. Jehova i tokim dispela wokman em i laikim tumas olsem em i tingting pinis long pinisim ol pasin nogut bilong dispela taim. God i tokim Noa: “Yu mas kisim plang bilong gutpela diwai na wokim wanpela sip.”​—Stt. 6:14.

¹⁰ Dispela sip em i no wanpela sip tru, olsem sampela i ting. Em i no gat poret, baksait, stia, kil o propela samting, na em i no luk olsem sip. Em i wanpela traipela bokis. Jehova i kolim stret sais, longpela na bikpela bilong sip, sampela tok long disain bilong en, na givim daireksen long Noa long penim insait na ausait long kolta. Na em i tokim Noa long risen: “Mi bai mekim bikpela tait wara i kamap long graun . . . Olgeta samting long graun bai pinis.” Na Jehova i mekim kontrak wantaim Noa: “Yu mas go insait long sip, yu wantaim  ol pikinini man bilong yu, meri bilong yu, na ol meri bilong ol pikinini man bilong yu.” Noa i mas kisim tu sampela bilong olgeta kain animal i go insait. Ol samting i stap insait long sip, ol tasol bai abrusim bagarap long Bikpela Tait bai kamap!​—Stt. 6:17-20.

11, 12. Noa i gat wanem bikpela wok tru, na hau em i feisim ol dispela salens?

¹¹ Noa i gat bikpela wok tru. Dispela sip i mas traipela tru—longpela bilong en inap olsem 133 mita, bikpela bilong en i olsem 22 mita, na em i go antap inap 13 mita. Em i bikpela tru, winim olgeta sip ol i bin wokim long plang long bipo na long nau tu. Yu ting Noa i surik na toktok planti long ol hatwok bilong wokim dispela sip o surikim mak i go liklik na bai isi long em i wokim? Baibel i tok: “Noa i mekim olgeta samting em God i tokim em long mekim. Em i bihainim olgeta tok bilong God.”​—Stt. 6:22.

¹² Dispela wok i winim planti yia tru, ating 40 i go 50 yia. Ol i mas katim ol diwai, pulim i kam, katim ol plang samting, sapim long mak bilong sip, na skruim wantaim. Sip i mas i gat 3-pela plua, planti rum, na wanpela dua long sait bilong sip. I luk olsem i gat ol windo long antap, na rup em wanpela sait bilong en i go antap liklik long namel na bai wara i ken ron i go daun.​—Stt. 6:14-16.

13. Wanem wanpela wok bilong Noa we i gat bikpela salens long en winim wok bilong wokim sip? Ol man i mekim wanem taim Noa i autim tok long ol?

¹³ Ol yia i kam i go pinis na wok bilong wokim sip i kamap gutpela, ating Noa i amamas tru long famili i sapotim em gut long wok! Na i gat narapela wok we ating i gat bikpela salens long mekim, winim wok bilong wokim sip. Baibel i tok Noa em i “man bilong tokaut long stretpela pasin.” (Ritim 2 Pita 2:5.) Olsem na Noa i go pas long famili long givim tok lukaut long ol man nogut i givim baksait long God olsem bikpela bagarap i laik kamap. Ol i mekim wanem taim ol i harim dispela tok lukaut? Bihain Jisas Krais i tingim bek dispela taim, na em i tok ol dispela manmeri “i no luksave long ol samting i wok long kamap.” Em i tok ol i tingting tasol long ol samting bilong wan wan de—ol i kaikai, dring, na marit—olsem na ol i no putim yau long tok bilong Noa. (Mat. 24:37-39) Yumi ken save, planti i tok bilas long em wantaim famili bilong em; ating sampela i tok long kilim em i dai na ol i mekim pasin birua long em. Ating ol i bin traim long bagarapim wok bilong ol long wokim sip.

14. Ol famili Kristen long nau inap kisim wanem skul long Noa na famili bilong em?

¹⁴ Tasol Noa wantaim famili bilong em i no lusim dispela wok. Maski ol i stap namel long ol lain em ol i tingting tasol long inapim laik bilong ol, em tingting bilong ol i paul na ol i ting wok bilong wokim sip em wok i no gat as bilong en, Noa na famili i stap gut long dispela wok. Ol famili Kristen long nau inap kisim gutpela skul long bilip bilong Noa na famili bilong em. Long wanem, yumi stap  long taim Baibel i kolim olsem “taim bilong las de” bilong dispela graun. (2 Tim. 3:1) Jisas i tok, taim bilong yumi bai i wankain olsem long taim Noa i bin wokim sip. Taim ol Kristen i autim tok bilong Kingdom Bilong God na ol man i les long harim, tok bilas, o birua long ol, ol i mas tingim pasin bilong Noa. Ol Kristen i no fes lain long feisim ol dispela kain salens.

15. Taim Noa i gat klostu 600 krismas, em i karim wanem hevi?

¹⁵ Planti yia i go pinis na klostu ol i pinisim wok bilong wokim sip. Klostu long taim Noa i gat 600 krismas, em i bin karim hevi long sampela long famili i dai. Papa bilong em, Lamek i dai. b Faivpela yia bihain, papa bilong Lamek, Metusela, em tumbuna papa bilong Noa, em i dai taim em i gat 969 krismas—long Baibel i no gat wanpela man i stap longpela taim tru olsem. (Stt. 5:27) Metusela na Lamek i bin i stap long taim fes man, Adam, i stap laip yet.

16, 17. (a) Taim Noa i gat 600 krismas, em i kisim wanem nupela tok? (b) Stori long samting Noa na famili bilong em i bin lukim na ol i no inap lusim tingting long en.

¹⁶ Taim Noa i gat 600 krismas, em i kisim nupela tok i kam long Jehova God: “Yu na famili bilong yu, yupela i mas go insait long sip.” Long seim taim, God i tokim Noa long kisim olgeta kain animal i go insait long sip—7-pela 7-pela bilong ol klinpela animal, ol i gutpela inap long mekim ofa, na 2-pela 2-pela bilong olgeta narapela animal.​—Stt. 7:1-3.

 ¹⁷ Ating ol i no inap lusim tingting long samting ol i bin lukim. Long longwe yet planti tausen i wok long kam—ol i wokabaut, flai, krol, na kalap kalap—olgeta i gat kain kain sais, seip, na pasin. Yumi no ken ting Noa i hatwok long kontrolim na subim ol dispela animal bilong bus i go insait long liklik spes bilong ol long sip. Baibel i tok ol “i go insait long sip we Noa i stap.”​—Stt. 7:9.

18, 19. (a) Hau bai yumi inap bekim gut askim em sampela man i mekim long ol samting stori bilong Noa i kamapim? (b) Olsem wanem yumi inap lukim savetingting bilong Jehova long pasin bilong em long makim rot bilong seivim ol animal samting?

¹⁸ Sampela man bai tok: ‘Hau na kain samting inap kamap? Na olsem wanem olgeta animal inap stap isi wantaim long liklik spes olsem?’ Tingim dispela: Yu ting Krieta bilong yunives i no gat bikpela strong inap long bosim ol animal em yet i bin wokim, o mekim ol i stap isi olsem ol animal bilong ples? Tingim, Jehova em God husat i wokim ol animal. Planti yia bihain, em i bin brukim Solwara Retsi na mekim san i sanap i stap. Yu ting em i no inap mekim olgeta samting em stori bilong Noa i kamapim? Tru tumas, em inap, na em i bin mekim!

¹⁹ Tru God inap makim narapela rot bilong seivim ol animal samting. Tasol long savetingting bilong em, em i makim rot we i kirapim yumi long tingim wok em i bin givim pastaim tru long ol manmeri, em long lukautim olgeta samting i gat laip long graun. (Stt. 1:28) Long nau, planti papamama i save kamapim stori bilong Noa long ol pikinini bilong skulim ol, olsem Jehova i save tingim gut ol animal na ol manmeri em i bin wokim.

20. Ating Noa na famili bilong em i bin bisi tru long wanem ol wok long laspela wik paslain long Bikpela Tait?

²⁰ Jehova i tokim Noa, wanpela wik moa na Bikpela Tait bai kamap. Ating em wanpela taim we famili i mas hariap hariap long  mekim ol samting. Tingim bikpela wok ol i mas mekim long putim ol animal, na tu, kaikai bilong ol animal na bilong famili long ples stret, na ol i mas karim olgeta samting bilong ol i go insait long sip. Ating meri bilong Noa, na meri bilong Seim, Ham, na Jafet i bisi tru long stretim gut ol samting long sindaun bilong ol insait long sip.

21, 22. (a) Wai na yumi no kirap nogut long pasin bilong ol man long taim bilong Noa long les long harim tok? (b) Tok bilas em ol neiba i mekim long Noa na famili bilong em i pinis long wanem taim?

²¹ Olsem wanem long ol lain i stap long hap bilong ol? Ol “i no luksave long ol samting i wok long kamap”—maski i klia tru olsem Jehova i blesim Noa na ol wok bilong em. Ol i bin lukim ol animal i go insait long sip. Tasol yumi no kirap nogut long pasin bilong ol long les long harim tok. Long nau tu, ol man i no luksave long ol mak i soim klia olsem yumi stap long taim bilong las de bilong dispela graun. Na olsem aposel Pita i tok profet, ol man bilong tok bilas bai kamap, na tok bilas long ol man i putim yau long tok lukaut bilong God. (Ritim 2 Pita 3:3-6.) Dispela i wankain long ol manmeri i bin tok bilas long Noa na famili bilong em.

²² Wanem taim tok bilas bilong ol i pinis? Baibel i tok, taim Noa i bringim famili bilong em na ol animal i go insait long sip, “Jehova i pasim dua.” Sapos sampela man bilong tok bilas i stap klostu, dispela samting God i mekim i pasim maus bilong ol. Sapos nogat, yumi save ren yet i pasim maus bilong ol—bikos bikpela ren tru i bin pundaun! Na ren i wok long pundaun, i go i go—inap tait wara i karamapim graun olgeta, olsem Jehova i bin tok pinis.​—Stt. 7:16-21.

23. (a) Hau na yumi save olsem Jehova i no amamas taim ol man nogut i dai long taim bilong Noa? (b) Wai na em i savetingting long bihainim bilip bilong Noa long nau?

²³ Yu ting Jehova i amamas long ol dispela man nogut i dai? Nogat! (Ese. 33:11) Inap longtaim tru em i bin givim rot long ol long senisim pasin bilong ol na mekim pasin i stret. Yu ting ol inap mekim olsem? Pasin bilong Noa i bekim dispela askim. Noa i wokabaut wantaim Jehova, bihainim tok bilong God bilong em long olgeta samting, na long dispela rot em i soim olsem ol man inap abrusim bagarap. Na i olsem bilip bilong em i kamapim olsem ol man long taim bilong em i gat asua; bilip bilong Noa i kamapim klia pasin nogut bilong ol manmeri long taim bilong em. Bilip bilong em i seivim em na famili bilong em. Sapos yu bihainim bilip bilong Noa, yu tu inap seivim yu yet na ol manmeri yu laikim. Olsem Noa, yu inap wokabaut wantaim Jehova God olsem Pren bilong yu. Na pasin pren bilong yupela inap i stap oltaim oltaim!