1, 2. Wai na i bikpela samting long yumi mas strongim bilip long nau? Stori long dispela.

 BILIP. Em i naispela tok, dispela tok i makim wanpela gutpela pasin tru. Tasol taim yumi harim dispela tok, i gutpela yumi tingim narapela tok: “Hariap!” Sapos yumi no gat bilip, yumi mas kirap hariap long kisim bilip. Na sapos yumi gat bilip, yumi mas kirap hariap long protektim na strongim. Wai na yumi mas mekim olsem?

² Piksaim long tingting yu raun long wanpela bikpela ples nating. Yu nidim tru wara. Taim yu painim pinis sampela wara, yu mas protektim long san. Na yu mas wok long pulapim gen bambai em i stap yet inap yu kamap long hap yu laik go long en. Long nau, long sait bilong lotu i olsem yumi stap long wanpela bikpela ples nating, na bilip tru—olsem dispela wara—i hatwok long painim na inap pinis wantu taim san i holim, olsem na yumi mas wok long protektim na pulapim gen. Yumi mas wok strong; yumi nidim wara bilong stap laip, wankain olsem yumi nidim bilip bambai pasin pren bilong yumi wantaim Jehova i no ken bagarap.​—Rom 1:17.

3. Jehova i kamapim wanem samting bilong helpim yumi long strongim bilip? Yumi mas tingting long mekim wanem tupela samting?

³ Jehova i save olsem yumi mas hariap long kisim bilip, na em i save i hatwok long strongim na lukautim bilip long nau. Em risen na em i kamapim ol eksampel we yumi ken bihainim. Jehova i stiaim aposel Pol long tok: “Yupela i mas bihainim pasin bilong ol man husat i bilip na i no les kwik na long dispela rot ol i kisim ol samting God i tok promis long en.” (Hib. 6:12) Olsem na oganaisesen bilong Jehova i kirapim yumi long wok strong long bihainim eksampel bilong ol bilipman na meri, olsem lain yumi skelim stori bilong ol long dispela buk. Tasol nau yumi mas mekim wanem? Yumi mas tingim tupela samting: (1) Wok yet long strongim bilip bilong yumi; (2) Wok yet long putim ol samting yumi bilip na wet long en i stap klia long tingting.

4. Satan i mekim wanem na em i stap olsem birua bilong bilip? Wai na yumi no ken tingting planti?

⁴ Wok yet long strongim bilip bilong yu. Bilip i gat wanpela bikpela birua—Satan. Bosman bilong dispela graun i mekim ol samting bilong dispela taim nau i kamap olsem bikpela ples nating we i hatwok long yumi holimpas bilip. Em i gat bikpela strong moa winim yumi. Yu ting yumi mas tingting planti bikos yumi no inap kisim na strongim bilip bilong yumi? Nogat tru! Jehova em i nambawan Pren bilong olgeta man husat i laik kisim bilip tru. Em i strongim yumi olsem Em i stap long sait bilong yumi, olsem na yumi inap sakim Devil na em bai lusim yumi na ranawe! (Jems 4:7) Yumi sakim em taim yumi makim haptaim long olgeta de bilong strongim bilip bilong yumi. Hau bai yumi mekim olsem?

5. Olsem wanem ol bilipman na meri long Baibel i kisim bilip? Stori long dispela.

 ⁵ Olsem yumi lukim, ol bilipman na meri long Baibel i no bon wantaim bilip. I stap bilong ol i kamapim klia olsem bilip em wanpela pasin holi spirit bilong Jehova i kamapim. (Gal. 5:22, 23) Ol i beten bilong kisim helpim, na Jehova i wok long strongim bilip bilong ol. Yumi mas bihainim pasin bilong ol, yumi no ken lusim tingting olsem Jehova i save givim holi spirit bilong em long ol man i askim em na ol i mekim ol samting i stret wantaim beten bilong ol. (Luk 11:13) I gat sampela samting moa yumi ken mekim?

6. Olsem wanem pasin bilong stadi gut long ol stori bilong Baibel inap helpim tru yumi?

⁶ Long dispela buk, yumi bin stori long sampela eksampel bilong ol man na meri husat i gat strongpela bilip. Tasol i gat planti moa! (Ritim Hibru 11:32.) Olgeta wan wan—i gat pasin bilong ol yet—inap helpim yumi taim yumi stadi na tingim tingim ol skul yumi kisim long eksampel bilong ol. Sapos yumi hariap tasol long ritim ol stori bilong ol bilipman na meri long Baibel, yumi no inap strongim bilip bilong yumi yet. Bilong helpim yumi, taim yumi rit yumi mas lusim haptaim long skelim gut ol narapela narapela ves, na bekgraun bilong ol stori bilong Baibel. Sapos oltaim yumi tingim olsem ol dispela man na meri i no gutpela olgeta i “man wankain olsem yumi,” eksampel bilong ol bai helpim tru yumi. (Jems 5:17) Yumi inap pilim hevi bilong ol, taim yumi piksaim long tingting filings bilong ol taim ol i feisim ol salens na karim ol hevi wankain olsem ol hevi bilong yumi.

7-9. (a) Ol bilipman na meri long Baibel bai pilim olsem wanem long lotuim Jehova long wankain pasin olsem yumi mekim long nau? (b) Wai na yumi mas strongim bilip bilong yumi long rot bilong ol wok yumi mekim?

⁷ Yumi strongim tu bilip bilong yumi long rot bilong ol wok yumi mekim. Yumi save, “bilip i no kamapim ol gutpela wok, dispela bilip i dai pinis.” (Jems 2:26) Piksaim long tingting amamas ol dispela manmeri em yumi stori long ol bai kisim sapos Jehova i tokim ol long mekim ol kain wok olsem em i tokim yumi long mekim long nau!

⁸ Eksampel: Abraham bai pilim olsem wanem sapos em i kisim tok olsem em inap lotuim Jehova, namel long ol wanlotu insait long ol naispela Haus Kingdom na long ol bikpela kibung, em ples we yumi save stori na kisim gut skul long ol tok promis em yet i save olsem ol “bai kamap bihain” tru, tasol em i no ken mekim lotu long alta em i sanapim long ol ston long ples nating? (Ritim Hibru 11:13.) Na Elaija bai pilim olsem wanem sapos em i kisim tok olsem wanpela wok bilong em, em long visitim ol man na bringim tok bilong mekim isi bel na long wetim ol gutpela samting bai kamap bihain, na i no bilong kilim i dai ol profet bilong giaman god Bal taim em i wok strong yet long mekim wok bilong Jehova long taim wanpela apostet king i bosim kantri? Ating ol dispela bilipman na meri long Baibel bai hariap tru long mekim ol kain wok bilong lotuim Jehova olsem yumi mekim long nau, laka?

⁹ So yumi mas wok yet long strongim bilip bilong yumi long rot bilong ol wok yumi  mekim. Taim yumi mekim olsem, yumi bai bihainim eksampel bilong ol bilipman na meri em stori bilong ol i stap long Baibel. Olsem yumi stori pinis long Tok i Go Pas, bai yumi pilim olsem yumi save gut long ol olsem ol pren. Tasol long bihain, ol bai kamap ol pren tru bilong yumi.

10. Bai yumi amamas long wanem ol samting long Paradais?

¹⁰ Wok yet long putim ol samting yu bilip na wet long en i stap klia long tingting. Ol bilipman na meri i save kisim strong long ol blesing God i promis long givim long ol. Olsem wanem long yu? Eksampel, piksaim long tingting amamas yu bai kisim long bungim ol gutpela wokman na wokmeri bilong God taim ol i kisim laip gen, em long taim bilong “kirap bek bilong . . . ol stretpela man.” (Ritim Aposel 24:15.) Wanem sampela askim em yu laik givim long ol?

11, 12. Long nupela taim, yu laik givim wanem ol askim long (a) Abel? (b) Noa? (c) Abraham? (d) Rut? (e) Abigel? (f) Esta?

¹¹ Taim yu bungim Abel, ating yu laik askim em long papamama bilong em, a? O ating yu laik askim: “Yu bin toktok tu long ol serap i sanap pasim rot i go insait long gaden Iden? Ol i toktok tu long yu?” Olsem wanem long Noa? Ating yu laik askim em: “Yu bin pret tu long ol Nefilim? Long dispela yia yu stap insait long sip, hau yu bin lukautim ol dispela animal?” Sapos yu bungim Abraham, ating yu laik askim: “Yu bin toktok tu wantaim Siem? Husat i skulim yu long Jehova? Em hatwok long yu lusim taun Ur?”

¹² Na tu, skelim sampela askim ating yu laik givim long ol bilipmeri bai kirap bek. “Rut, wanem samting i kirapim yu long lotuim Jehova?” “Abigel, yu bin pret tu long tokim Nabal long hau yu helpim Devit?” “Esta, wanem samting i kamap long yu na Modekai bihain long stori bilong yutupela long Baibel i stop?”

13. (a) Ating ol manmeri i kirap bek bai i gat laik long save long wanem ol samting? (b) Bai yu pilim olsem wanem taim yu bungim ol bilipman na meri bilong bipo?

¹³ Tru tumas, ating ol dispela bilipman na meri i gat planti askim bilong givim long yu tu. Bai yumi amamas long tokim ol long ol bikpela samting i kamap long haptaim bilong las de, na hau Jehova i bin blesim lain bilong em long dispela taim bilong hevi! Yumi save ol bai amamas tru long save long hau Jehova i bin truim olgeta tok promis bilong em. Long dispela taim, bai no gat wok moa long piksaim long tingting ol gutpela wokman na wokmeri bilong God long Baibel, bikos ol bai stap tru wantaim yumi long Paradais! So wok yet long mekim olgeta samting yu inap mekim long nau na bai yu tingim ol dispela manmeri olsem ol i stap tru. Wok yet long bihainim bilip bilong ol. Yu bai amamas long mekim wok bilong Jehova wantaim ol olsem ol gutpela pren bilong yu inap oltaim oltaim!