Jisas i stap yet long Jerusalem long Bikpela De Bilong Ol Haus Lotu Sel o Haus Win, na em i wok long skulim ol man long ol bikpela tok i tru. Sampela Juda i stap long dispela bung i tokim em: “Mipela ol pikinini bilong Abraham, na i no gat wanpela taim mipela i stap wokboi.” Na Jisas i bekim tok olsem: “Mi save olsem yupela i pikinini bilong Abraham, tasol yupela i laik kilim mi i dai, long wanem, yupela i no wanbel long tok bilong mi. Ol samting mi lukim pinis wantaim Papa bilong mi, em mi tokaut long en. Na yupela i save mekim ol samting yupela i harim long papa bilong yupela.”—Jon 8:33, 37, 38.

Tok Jisas i mekim i klia: Papa bilong em i no wankain long papa bilong ol. Tasol ol Juda i no kisim tok bilong Jisas na ol i tok gen olsem: “Papa bilong mipela em Abraham.” (Jon 8:39; Aisaia 41:8) Ol i tumbuna pikinini tru bilong Abraham. Olsem na ol i pilim olsem ol i gat wankain bilip olsem Abraham, em pren bilong God.

Tasol ol i kirap nogut long bekim bilong Jisas. Em i tok: “Sapos yupela i pikinini bilong Abraham, orait mekim ol samting Abraham i bin mekim.” Tru tumas, pikinini i save bihainim pasin bilong papa bilong em. Jisas i tok moa: “Mi bin tokim yupela long tok i tru mi harim long God, tasol yupela i laik kilim mi i dai. Abraham i no bin mekim olsem.” Bihain Jisas i mekim wanpela tok i mekim ol i tingting planti, em i tok: “Yupela i save mekim ol samting papa bilong yupela i bin mekim.”—Jon 8:39-41.

Tasol ol Juda i no kliagut long tok Jisas i mekim. Ol i tok ol i pikinini tru bilong Abraham, olsem: “Mipela i no kamap long rot bilong pasin pamuk, mipela i gat wanpela Papa, em God.” Tasol tru tru, God em i Papa bilong ol? Jisas i tok: “Sapos God em i papa bilong yupela, bai yupela i laikim mi, long wanem, God i bin salim mi i kam. Mi no kam long tingting bilong mi yet, nogat, dispela Man i bin salim mi i kam.” Jisas i kamapim wanpela askim na em yet i bekim dispela askim, olsem: “Bilong wanem yupela i no save long tok mi mekim? As bilong dispela i olsem, yupela i no inap putim yau long tok bilong mi.”—Jon 8:41-43.

Jisas i laik soim ol long samting inap kamap sapos ol man i sakim em. Na em i tokaut stret olsem: “Yupela i kam long Papa bilong yupela, em Satan. Na yupela i laik bihainim laik bilong papa bilong yupela.” Papa bilong ol i wanem kain man? Jisas i kamapim klia pasin bilong papa bilong ol, olsem: “Long pastaim em i man bilong kilim man i dai na em i no holimpas tok i tru.” Jisas i tok moa: “Man i kam long God, em i save putim yau long ol tok bilong God. Yupela i no save putim yau, long wanem, yupela i no kam long God.”—Jon 8:44, 47.

Dispela strongpela tok i mekim ol Juda i belhat, na ol i tok: “I stret mipela i tok yu man Samaria na wanpela spirit nogut i stap long yu.” Taim ol i kolim Jisas “man Samaria,” ol i kamapim long ples klia olsem ol i bel nogut long em. Tasol Jisas i no tingim tok ol i mekim, na em i tok: “Mi no gat wanpela spirit nogut. Tasol mi onarim Papa bilong mi, na yupela i daunim nem bilong mi.” Jisas i mekim wanpela tok promis i kamapim klia olsem dispela i no liklik samting. Em i tok: “Sapos wanpela man i bihainim tok bilong mi, bai em i no inap i dai.” Tok bilong em i makim olsem “namba 2 dai” i no inap painim ol aposel na ol man i bihainim em, ol i no inap bagarap na pinis olgeta, nogat. Maski sapos ol i dai, ol bai kirap bek.—Jon 8:48-51; Revelesen 21:8.

Tasol ol Juda i no kliagut long tok bilong Jisas, na ol i tok: “Nau mipela i save pinis olsem wanpela spirit nogut i stap long yu. Abraham i bin i dai, na ol profet tu i bin i dai, tasol yu tok, ‘Sapos wanpela man i bihainim tok bilong mi, bai em i no inap i dai.’ Papa bilong mipela Abraham i dai pinis, yu winim em, a? . . . Yu ting yu husat?”—Jon 8:52, 53.

I klia tru olsem Jisas i laik kamapim long ol olsem em i dispela Mesaia. Tasol em i no bekim stret askim bilong ol long em i husat, nogat, em i tok: “Sapos mi givim glori long mi yet, glori bilong mi em i samting nating. Papa bilong mi i save givim glori long mi, em dispela Man yupela i tok olsem em i God bilong yupela. Tasol yupela i no save long em. Mi save long  em. Na sapos mi tok mi no save long em, orait mi bai stap olsem wanpela man bilong giaman, wankain olsem yupela.”—Jon 8:54, 55.

Orait Jisas i kamapim eksampel bilong bilipman Abraham, em tumbuna papa bilong ol. Em i tok: “Papa bilong yupela Abraham i bin i gat tingting long lukim taim bilong mi na em i amamas tru long dispela, na em i bin lukim na em i belgut.” Yes, Abraham i bilip long tok promis bilong God na em i lukluk i go long taim Mesaia bai kam. Ol Juda i kirap nogut na ol i tok: “Yu no winim yet 50 krismas, na yu bin lukim Abraham, a?” Na Jisas i tok: “Tru tumas mi tokim yupela, Taim Abraham i no kamap yet, mi bin stap.” Jisas i laik bai ol i luksave olsem paslain long em i kam long graun, em i bin stap long heven olsem wanpela strongpela ensel.—Jon 8:56-58.

Ol Juda i belhat nogut tru olsem Jisas i tok em i bin stap paslain long Abraham, na ol i redi long stonim em. Tasol Jisas i lusim ol na em i no kisim bagarap.