“Man Nogut i kontrolim dispela graun olgeta.”—1 Jon 5:19.

“Pikinini bilong God i kam . . . bilong bagarapim ol wok bilong Satan.”—1 Jon 3:8, New Century Version.

Yu save long as na ol hevi i kamap long graun.—Revelesen 12:12.

I gat as na yu bilip olsem bihain ol samting long graun bai kamap gutpela.—1 Jon 2:17.

Yes, i gat tripela as na yumi inap bilip olsem:

• God i skelim pinis wok bos bilong Satan. Jehova i tingting strong long pinisim wok bilong Satan long kontrolim ol man. Em i tok promis long “bagarapim Satan,” na stretim bek olgeta samting em Satan i bin kamapim.—Hibru 2:14, Nupela Taim Baibel.

• God i makim Jisas Krais long bosim graun. Jisas i no wankain long dispela man nogut i save tingim em yet na i bosim dispela graun long nau. God i tok promis long wok king Jisas bai mekim, olsem: “Em [Jisas] i save sori long ol manmeri i no gat strong na i stap rabis. . . . Sapos ol man nogut i laik daunim ol na bagarapim ol, em i save kisim bek ol.”—Song 72:13, 14.

• God i no save giaman. Baibel i tok: “God i no inap giaman.” (Hibru 6:18) Taim Jehova i tok promis long mekim wanpela samting, i olsem em i mekim pinis dispela samting! (Aisaia 55:10, 11) “Em bai i rausim hetman bilong dispela graun.”—Jon 12:31.