LESEN 01
Hau Bai Baibel Inap Helpim Yu?
Klostu yumi olgeta i gat ol askim long laip, pen na hevi, dai, na ol samting bai kamap long bihain. Na tu, yumi save tingting planti long ol hevi bilong wan wan de, olsem hau bai yumi helpim famili long stap amamas. Planti man i lukim olsem Baibel i helpim ol long kisim bekim bilong ol bikpela askim bilong laip, na tu, em i givim edvais long ol samting bilong wan wan de. Yu ting Baibel inap helpim wanpela yu save long em?
1. Wanem sampela askim em Baibel i bekim?
Baibel i bekim ol dispela bikpela askim: Ol samting i gat laip i kamap olsem wanem? Yumi stap bilong mekim wanem? Wai na ol man i no gat asua i karim pen na hevi? Wanem samting i painim man taim em i dai? Sapos olgeta man i laikim bel isi, wai na i gat planti woa? Wanem samting bai kamap long graun long bihain? Baibel i kirapim yumi long painim bekim bilong ol dispela kain askim, na planti milion manmeri i lukim olsem Baibel i bekim gut ol dispela askim.
2. Olsem wanem Baibel inap helpim yumi long stap amamas long olgeta de?
Baibel i givim yumi ol gutpela edvais. Olsem, em i skulim ol famili long hau ol inap stap amamas tru. Em i givim ol skultok long hau yumi inap karim hevi bilong presa na hau yumi inap amamas long ol wok bilong yumi. Yu bai kisim save long ol tok bilong Baibel long ol dispela topik na planti moa taim yumi stori wantaim long dispela buk. Na yu bai save tru olsem “olgeta tok i stap long Rait Holi . . . i gutpela.”—2 Timoti 3:16.
Dispela pablikesen i no senis bilong Baibel, nogat. Em i kirapim yu long yu yet i ken skelim gut Baibel. Olsem na mipela i kirapim yu long ritim ol skripsa em ol i raitim long ol dispela lesen na skelim wantaim ol tok yu lainim.
KISIM SAMPELA SAVE MOA
Yumi skelim olsem wanem Baibel i bin helpim ol man, hau yu inap amamas long ritim, na bilong wanem i gutpela long kisim helpim na bai yu kliagut long en.
3. Baibel inap stiaim yumi
Baibel i olsem wanpela strongpela lait. Yumi inap yusim Baibel bilong soim yumi long mekim ol gutpela disisen na long helpim yumi long save long ol samting bai kamap bihain.
Ritim Buk Song 119:105, na stori long ol dispela askim:
-
Man bilong raitim dispela song i gat wanem tingting long Baibel?
-
Yu gat wanem tingting long Baibel?
4. Baibel inap bekim ol askim bilong yumi
Wanpela meri i luksave olsem Baibel i bekim ol askim em i bin tingting planti long en inap planti yia. Pilaim VIDIO, na stori long ol dispela askim.
-
Long dispela vidio, dispela meri i gat wanem ol askim?
-
Olsem wanem stadi bilong em long Baibel i helpim em?
Baibel i kirapim yumi long mekim ol askim. Ritim Matyu 7:7, na stori long dispela askim:
-
Yu gat wanem ol askim em yu laik kisim bekim bilong en long Baibel?
5. Yu inap amamas long ritim Baibel
Planti man i amamas long ritim Baibel na dispela i helpim ol. Pilaim VIDIO, na stori long ol dispela askim.
-
Long vidio, ol dispela yangpela i gat wanem tingting long pasin bilong rit?
-
Wai na ol i amamas long ritim Baibel?
Baibel i tok em inap givim yumi ol tok bilong mekim isi bel bilong yumi na yumi wetim ol gutpela samting bai kamap. Ritim Rom 15:4, na stori long dispela askim:
-
Olsem wanem? Yu laik save moa long ol tok promis i stap long dispela ves?
6. Ol narapela inap helpim yumi long kliagut long ol tok bilong Baibel
Planti man i ritim Baibel ol yet, tasol ol i lukim olsem taim ol i toktok wantaim ol narapela long Baibel, dispela i helpim tru ol. Ritim Aposel 8:26-31, na stori long dispela askim:
-
Hau bai yumi kliagut long tok bilong Baibel?—Lukim ves 30 na 31.
Man Itiopia i nidim helpim long kliagut long tok em i ritim. Planti man long nau i pilim olsem taim ol i toktok wantaim ol narapela long Baibel, dispela i helpim ol
SAMPELA MAN I TOK: “Yu westim taim long stadi long Baibel.”
-
Bai yu tok wanem? Bilong wanem?
OL BIKPELA POIN
Baibel i givim edvais long ol samting yumi mekim long olgeta de, bekim ol bikpela askim, na mekim isi bel bilong ol man na ol i ken wetim ol gutpela samting bai kamap.
Riviu
-
Yumi inap kisim wanem ol edvais long Baibel?
-
Baibel i bekim wanem sampela askim?
-
Yu laik lainim wanem samting long Baibel?
MEKIM WOK PAINIMAUT
Skelim hau ol edvais bilong Baibel i gutpela long bihainim long nau.
“Tok Bilong Baibel—Pulap Long Savetingting” (Wastaua No. 1 2018)
Lukim hau Baibel i helpim wanpela man i bin wok strong long daunim hevi bilong tingting planti kirap long taim em i liklik yet.
Skelim ol gutpela edvais bilong Baibel bilong helpim famili.
“12-pela Rot Bilong Famili i Stap Amamas” (Kirap! No. 2 2018)
Kisim save long hau Baibel i stretim tingting kranki bilong ol man long husat tru i bosim graun.
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
