Tingim dispela: Heather i prenim Mike inap 2-pela mun, tasol em i pilim olsem em i save long Mike inap longpela taim tru. Oltaim ol i save salim teks mesis, toktok long fon planti aua, na sampela taim ol i kolim ol wankain tok! Tasol nau Mike i laikim sampela samting moa, na i no toktok tasol.

Insait long 2-pela mun nau, Mike na Heather i save holim han tasol na sampela taim ol i kis liklik. Heather i ting dispela em inap. Tasol em i no laik bai Mike i lusim em. Em i tokim em yet, ‘I no gat man i mekim mi pilim olsem mi luk nais na mi spesel tru. Na tu, mipela i laikim tru narapela narapela . . . ’

Sapos yu winim pinis krismas long gat boipren o gelpren na wankain samting i painim Heather i painim yu, bai yu mekim wanem?

Sapos yu stap antap long wanpela diwai na yu kalap na laik flai olsem pisin, bai yu kisim bikpela bagarap. Olsem tasol, hevi inap painim yu sapos yu sakim lo bilong stretpela pasin, dispela lo i tok: “Yupela i mas sakim pasin pamuk.”​—1 Tesalonaika 4:3.

Wanem samting bai kamap sapos yu no bihainim dispela lo? Baibel i tok: “Man i mekim pasin pamuk, em i mekim nogut long bodi bilong em yet.” (1 Korin 6:18) Olsem wanem dispela tok em i tru?

 Ol saveman i painimaut olsem ol yangpela husat i mekim pasin pamuk i ekspiriensim ol dispela hevi.

• RIGRET. Klostu olgeta yangpela husat i mekim maritpasin taim ol i no marit yet i tok ol i rigret long disisen ol i mekim.

• I NO GAT TRAST. Bihain long man na meri i slip wantaim, ol bai tingting olsem, ‘Em i slip wantaim husat ol narapela?’

• BEL HEVI. Planti taim, ol gels i laikim ol mangi husat bai lukautim ol, na i no ol mangi husat i save yusim ol gels bilong inapim laik bilong ol yet. Na planti mangi i no laikim ol gels husat i hariap long bihainim tingting na laik bilong ol.

• Poin em olsem: Sapos yu mekim maritpasin taim yu no marit yet, yu no lukautim presen God i givim yu na yu nogutim bodi bilong yu yet. (Rom 1:24) Bodi bilong yu em samting i dia tumas, olsem na no ken givim nating long narapela!

Soim olsem yu strong long bihainim lo bilong God long “sakim pasin pamuk.” (1 Tesalonaika 4:3) Na bihain taim yu marit, orait yu ken slip wantaim poroman marit bilong yu. Na yu bai amamas long dispela pasin, na yu no inap wari, pilim rigret, bel hevi, o tingting olsem poroman bai lusim yu, em ol samting i save painim ol singel i mekim maritpasin.​—Sindaun 7:22, 23; 1 Korin 7:3.

• Sapos wanpela i laikim yu tru, yu ting em bai bagarapim bodi, bel na tingting bilong yu?

• Sapos wanpela i tingim yu tru, yu ting em bai traim long bagarapim pasin bilong yu long pas gut wantaim God?​—Hibru 13:4.