“Bipo bipo tru God i mekim kamap skai na graun na olgeta samting i stap long en.”​—Stat 1:1.

TOK BAIBEL I MEKIM

God i wokim yunives na graun long wanpela haptaim long bipo na Baibel i no kolim stret det bilong en, Stat 1:1 i tok long dispela haptaim olsem: “Bipo bipo tru.” Wok saiens bilong nau i wanbel olsem yunives i gat kirap bilong en. I no longtaim i go pinis ol saientis i ting graun i bin stap 14 bilion yia.

Baibel i stori tu olsem God i wokim ol samting insait long “6-pela de.” Tasol Baibel i no tok ol dispela de i gat 24-aua long en. (Stat 1:31) Baibel i yusim dispela wed “de” bilong makim kain kain haptaim. Olsem, em i kolim dispela haptaim bilong wokim olgeta samting olsem “[de] God, Bikpela i mekim kamap skai na graun.” (Stat 2:4) I klia tru olsem ol dispela “de” we God i wokim ol samting i no ol de stret, em i makim planti tausen yia.​—Song 90:4.

AS NA EM I BIKPELA SAMTING

Ol tingting giaman bilong ol man inap mekim yu ting ol stori insait long Baibel em ol stori nating. Tasol sapos Baibel i stori tru tru olsem God i wokim olgeta samting, orait i gat planti gutpela tok i stap insait long en bilong helpim yu long kisim “gutpela tingting.”​—Sindaun 3:21.

“God i tok olsem, ‘Graun i mas kamapim ol kain kain samting i gat laip.’”​—Stat 1:24.

TOK BAIBEL I MEKIM

God i no wokim ol samting i gat laip long wanpela liklik samting i no gat laip na isi isi ol i kamap narapela narapela samting, nogat. God i wokim “ol kain kain” diwai, gras, na kaikai samting na ol animal, na ol dispela samting i kamapim ol pikinini i “wankain olsem ol yet.” (Stat 1:​11, 21, 24) Dispela i mekim na i kam inap long nau, graun i pulap long “ol kain kain” samting i gat laip em God yet i bin wokim long pastaim tru.​—Song 89:11.

Baibel i no tokaut stret long wanem ol senis inap kamap long ol pikinini bilong wanpela kain animal, moa yet taim animal i karim pikinini long narapela animal i no wankain olsem em yet na ol i mas lain long nupela sindaun. Sampela i tingim dispela olsem ol senis bilong evolusen, tasol dispela i no kamapim wanpela nupela kain animal. Ol wok painimaut bilong nau i sapotim dispela aidia olsem ol diwai na animal samting i no gat bikpela senis long ol insait long planti handret yia.

AS NA EM I BIKPELA SAMTING

Ol tok bilong Baibel i stret wantaim saiens long hau “ol kain kain” samting i gat laip i bin kamap, na dispela i kirapim yumi long bilip tru long histori na ol tok profet em Baibel i kamapim.

“Long strong bilong mi yet mi bin putim skai i stap long ples bilong en.”​—Aisaia 45:12.

TOK BAIBEL I MEKIM

God em i As bilong olgeta strong o eneji. (Jop 37:23) Dispela em i bikpela samting bikos ol saientis i save olsem eneji inap senis na kamap olsem wanpela samting tru em man i ken lukim. Baibel i tok God yet em i As bilong “olgeta strong” i kamapim yunives. (Aisaia 40:26) God i tok promis long yusim strong bilong em long lukautim ol samting em i wokim, bikos Baibel i tok long san, mun, na ol sta olsem: “[God] i tok na ol i stap oltaim long hap bilong ol.”​—Song 148:​3-6.

AS NA EM I BIKPELA SAMTING

Saveman bilong glasim ol sta samting, Allan Sandage i tok: “Saiens i no inap bekim ol bikpela askim. Olsem ol i no inap eksplenim as na yunives i kamap na i stap.” Baibel i eksplenim gut hau olgeta samting i gat laip i bin kamap na dispela save i stret wantaim saiens, na tu, Baibel inap bekim ol askim em saiens i no inap bekim olsem, I gat wanem as na God i wokim dispela graun na ol manmeri? a