Stori long as na yu bin bilip long evolusen.

Maski mi go bikpela long Misin Katolik, mi gat tupela tingting long God. Olsem, mi hatwok long bilip long God husat i save kukim ol man long helpaia. So taim ol profesa long yunivesiti i skulim mi olsem ol samting i gat laip i kamap long laik bilong ol yet, mi wanbel bikos mi ting olsem i gat evidens bilong sapotim dispela tingting. Lotu bilong mi i no agensim bilip bilong evolusen, tasol ol i tok God i stiaim wok bilong evolusen.

Wanem samting i kirapim yu long kisim save long Baibel?

Meri bilong mi, Susana, i kirap stadi long Baibel wantaim ol Witnes Bilong Jehova. Ol i soim em long Baibel olsem God i no save givim pen long ol man long helpaia. a Na tu, em i kisim save olsem God i promis long kamapim paradais long graun. b Nau mipela i luksave olsem save mipela i kisim i gat as tru bilong en! Long 1989, wanpela Witnes, Nick, i kirap long visitim mi. Taim mipela i stori long bodi bilong man na hau em i kamap, mi kirap nogut long ol gutpela tok i stap long Hibru 3:4, olsem: “Olgeta wan wan haus i gat man i bin wokim. Tasol man i bin wokim olgeta samting em God.”

Save yu kisim long bodi bilong man i helpim yu long bilip olsem God i wokim olgeta samting i gat laip?

Yes. Olsem, taim wanpela hap long bodi i bagarap, bodi inap stretim em yet, dispela em narakain samting. Olsem, taim sua i kamap long bodi, i gat 4-pela narapela narapela hap i insait long wok bilong bodi long pinisim sua. Dispela save olsem bodi inap stretim em yet inap helpim wok bilong mi olsem dokta bilong katim ol man.

 Stori long samting i save kamap taim sua i kamap long bodi.

Insait long sampela seken tasol, bodi i save mekim sampela samting na bai planti blut i no ken lus, em fes hap wok bilong bodi long stretim em yet. Dispela hap wok bilong bodi i narapela kain na i save wok gut. Insait long bodi bilong man, i gat ol rop bilong blut na sapos yu bungim olgeta, longpela bilong en i olsem 100,000 kilomita, ol inap pasim blut long lus na fiksim ol yet. Ating ol plama i laik save hau bodi bilong man i wok olsem.

Wanem namba 2 hap wok bilong bodi long stretim em yet?

Insait long sampela aua tasol bodi i no lusim moa blut na man bai stat long pilim pen. I gat narapela narapela samting i mekim na man i pilim pen. Pastaim ol rop bilong blut i save go liklik tru na bai bodi i no ken lusim planti blut, tasol nau ol rop i op i go bikpela bilong helpim blut long ron i go long hap we i gat sua. Bihain, blut i gat protin long en i save mekim na ol hap klostu long sua i solap. Dispela blut i gat protin i gutpela long daunim sik, kilim i dai ol posin samting insait long bodi, na rausim ol hap bilong bodi we i bagarap. Olgeta dispela wok bilong bodi i kamap long rot bilong planti milion molekiul na sel. Sampela bilong ol dispela molekiul na sel samting i kirapim gen narapela hap wok bilong bodi long stretim em yet.

Wanem narapela samting bodi i mekim?

Insait long sampela de tasol bodi i kamapim nupela skin na mekim ol samting long pinisim sua, dispela wok i kamap insait long tupela wik samting. Ol sel i gat wok bilong kamapim nupela skin i save go long hap i gat sua long en na kamap planti. Na tu, ol liklik rop bilong blut i kamap long hap we sua i stap long en, wok bilong ol em long helpim bodi long rausim ol pipia na givim gutpela marasin long taim bodi i stretim em yet. Narapela hap wok bilong bodi em long kamapim ol sel bilong helpim skin long kamap nupela na pasim hap i gat sua long en.

Em bikpela wok tru! I gat sampela samting moa bodi bai mekim?

Sampela mun i mas lus na bai bodi i mekim laspela hap wok bilong stretim em yet. Ol bun i bruk i kamap strong gen, ol skin we i no strong tumas i pasim sua i lus, na gutpela skin i kamap. Taim yumi tingim hau bodi i save stretim em yet, dispela i soim olsem olgeta hap bilong bodi i mekim gut wok bilong ol.

Yu inap stori long wanpela ekspiriens olsem i bin kamap?

Yes, mi inap tingim olsem mi bin helpim wanpela meri i gat 16 krismas bihain long em i insait long kar eksiden. Em i kisim bikpela bagarap tru long splin bilong em na blut i go nabaut long bodi. Sampela yia i go pinis, mipela i save mekim operesen long stretim o rausim splin bilong ol man. Tasol long nau, planti taim ol dokta i save larim bodi i stretim em yet. Mi givim marasin bilong daunim pen, helpim bodi long no ken lusim planti wara na blut na bilong pinisim sua. Sampela wik bihain, ol i yusim sken masin na ol i luksave olsem splin bilong em i kamap orait! Mi kirap nogut taim mi lukim olsem bodi inap stretim em yet. Dispela i helpim mi long bilip tru olsem God i wokim yumi.

Wanem samting i kirapim yu long bung wantaim ol Witnes Bilong Jehova?

Mi luksave olsem ol i stap pren wantaim olgeta man, na oltaim ol i yusim Baibel long bekim ol askim bilong mi. Na tu, mi laikim pasin bilong ol long kamapim bilip bilong ol na helpim ol narapela long kisim save long God.

Taim yu kamap wanpela Witnes Bilong Jehova dispela i helpim yu long wok bilong yu?

Yes. Taim mi kamap wanpela Witnes dispela i helpim mi long daunim bel hevi bilong mi, em samting i save painim planti dokta na nes taim ol i helpim ol man i gat sik o ol man i kisim bagarap long eksiden samting. Na tu, taim ol sikman i kamapim hevi bilong ol, mi inap stori long ol tok promis bilong Krieta bilong yumi olsem em bai pinisim olgeta kain sik na pen na hevi. c Na wanpela taim bai kamap we i no gat man bai tok, “Mi gat sik.” d