OLSEM WANEM? Yu save yusim teknoloji? a Planti man bai tok yes, long wanem, long rot bilong teknoloji ol inap mekim ol gutpela wok. Ol man inap yusim ol fon na kompiuta samting long ples wok, long toktok wantaim ol narapela, na tu, long pilai ol vidio gem samting.

Planti man i lusim bikpela haptaim long yusim teknoloji, wankain olsem Jenni na Dennis. Olsem, Nicole i gat 20 krismas i tok: “Olgeta taim mi save yusim mobail fon bilong mi, maski mi mekim wanem wanem samting. Na sapos mi go long wanpela hap we fon i no inap long wok, dispela i mekim mi tingting planti. Na bihain long 30 minit mi save tingting tasol long ritim ol teks mesis. Em narakain samting tru!”

Sampela man i save sekim fon long nait bilong lukim sapos ol i kisim ol mesis na ol toksave. Na sapos ol i no yusim fon na kompiuta samting, dispela bai mekim na ol  i tingting planti. Sampela saveman i tok sapos man i lusim bikpela haptaim long yusim ol smatfon, kompiuta, na lukluk long Intenet samting, orait dispela inap kalabusim em. Tasol sampela man i no wanbel long dispela tok. Ol i ting dispela em hevi planti man i karim.

Maski ol man i gat narapela narapela tingting long pasin bilong yusim teknoloji, hevi inap kamap sapos man i no yusim teknoloji long savepasin. Sampela taim pasin bilong yusim teknoloji inap pulim bikpela haptaim na famili i no pas gut wantaim. Olsem, wanpela yangpela meri i gat 20 krismas i tok: “Papa bilong mi i no save long ol samting i kamap long mi. Taim mipela i stap long haus, em i save salim E-meil na long wankain taim em i toktok long mi. Em i no inap tru long lusim fon bilong em. Mi save olsem papa i save tingim mi, tasol ol samting em i mekim i no kamapim pasin laikim bilong em.”

Bilong helpim ol man long daunim pasin bilong yusim teknoloji, ol kantri olsem Saina, Saut Korea, Inglan, na Amerika i putim tambu long sampela hap we ol man i no inap long yusim Intenet, na kompiuta na fon samting inap sampela de. Olsem, Brett i gat 28 krismas i tok em i save pilai wanpela vidio gem long Intenet inap olsem 16 aua long olgeta wan wan de. Em i tok: “Taim mi pilai vidio gem, dispela i olsem mi kisim wanpela drak bilong mekim mi amamas.” Taim Brett i kisim helpim long daunim pasin bilong yusim teknoloji, em i luksave olsem em i nogat wok mani, em i no lukautim gut helt bilong em, na tu, em i lusim ol gutpela pren bilong em. Olsem wanem yu inap abrusim dispela kain hevi?

SKELIM PASIN BILONG YU LONG YUSIM TEKNOLOJI. Skelim olsem wanem pasin bilong yusim teknoloji inap mekim sampela samting long i stap bilong yu. Yu ken givim olkain askim olsem:

• Mi save bel hevi na tingting planti sapos mi no yusim Intenet o kompiuta na mobail fon samting?

• Mi save yusim Intenet o kompiuta na mobail fon samting long taim mi makim, na mi no abrusim dispela taim?

• Mi no kisim gutpela malolo long nait, long wanem, mi save sekim ol teks mesis long fon?

• Pasin bilong mi long yusim teknoloji i mekim na mi no lusim sampela haptaim wantaim famili bilong mi? Famili bilong mi bai wanbel long bekim bilong mi?

Sapos pasin bilong yusim teknoloji i mekim na yu no skelim gut “wanem ol samting i bikpela samting moa,” olsem famili bilong yu na ol wok yu mas mekim, orait i gutpela yu mekim sampela senis. (Filipai 1:10) Bai yu inap mekim olsem wanem?

PUTIM OL MAK YU INAP WINIM. I nogat rong long yusim teknoloji, tasol sapos yu lusim bikpela haptaim dispela inap kamapim hevi. Olsem na sapos yu yusim teknoloji long mekim wok o bilong kisim amamas samting, orait makim hamas taim yu bai lusim long mekim olsem.

Traim dispela: Yu inap askim wanpela long famili o wanpela pren long helpim yu. Baibel i tok: “I no gutpela long man i stap wanpis. Sapos tupela man i stap wantaim, em i gutpela.  . . . Sapos wanpela i pundaun, orait narapela i ken litimapim em gen.”—Saveman 4:9, 10.

Ol man i wokim planti nupela kompiuta na fon samting we yu inap hariap long daunlodim ol vidio na musik samting. Tasol yu mas was gut, nogut yu lusim bikpela haptaim long yusim teknoloji na dispela i kalabusim yu. Sapos yu “yusim gut taim” bilong yu, dispela bai helpim yu long bihainim savepasin long yusim teknoloji.—Efesus 5:16.