MAUS bilong pukpuk i strong tru winim bilong olgeta narapela animal. Olsem, tingim pukpuk bilong solwara (saltwater crocodile) long Australia. Taim em i kaikaim ol samting, strong bilong maus bilong en i winim bilong laion na taiga. Maski i olsem, em inap long pilim ol samting hariap tru, winim taim man i yusim pinga long tatsim ol samting. Olsem wanem pukpuk inap long pilim ol samting hariap, maski em i gat strongpela skin?

I gat planti tausen liklik rop bilong kru i stap long maus bilong pukpuk we i helpim em long pilim ol samting. Saveman Duncan Leitch i mekim wok painimaut na em i tok: “Olgeta wan wan rop bilong kru i kam ausait long wanpela hul long bun bilong het bilong pukpuk. Na dispela i lukautim ol rop bilong kru long maus bilong pukpuk, na tu, i helpim em long pilim ol samting. Dispela pasin bilong pukpuk long pilim kwik ol samting i winim ol masin ol man i wokim bilong painim ol samting. Ol pukpuk inap luksave long kaikai o pipia i stap long maus bilong en. Na tu, mama pukpuk inap karim ol bebi pukpuk long maus bilong en, na em i no kaikaim ol. Maus bilong pukpuk i narakain tru, long wanem, maski em i gat bikpela strong, em inap long pilim hariap ol samting.

Yu ting wanem? Maus bilong pukpuk i kamap long rot bilong evolusen? O wanpela i bin wokim?