PREN bilong Susan em Al i gat 9-pela krismas long taim em i kisim sik polio, olsem na em i mas stap insait long masin bilong waitlewa. Long dispela taim Susan i gat 7-pela krismas na em i gat ol askim long God. Em i stori long ekspiriens bilong en long niuspepa The New York Times bilong Janueri 6, 2013.

Bihain long Susan i visitim Al long haus sik, em i askim mama bilong en olsem: “Wai na God i larim sik i painim Al?”

Mama i tok: “Ating pris bai tok olsem i gat risen na God i mekim olsem, tasol mi no save wai em i sik.”

Tupela yia bihain, em long 1954, Jonas Salk em wanpela dokta i kamapim marasin sut bilong daunim sik polio, olsem na mama bilong Susan i tok ating God i helpim Jonas Salk long mekim dispela wok painimaut.

Susan i tok: “Wai na God i no helpim ol dokta long bipo na bai ol inap long helpim Al na em i no ken slip aninit long masin?”

Susan i stori long ol samting i painim em taim em i liklik yet na em i tok: “Bihain long 8-pela yia Al i dai, long dispela taim mi no bilip long God na i nogat wanpela samting inap senisim tingting bilong mi.”

Olsem Susan, planti man i karim ol bikpela hevi na sampela i lukim ol narapela i karim hevi, olsem na ol i gat ol askim long God. Dispela i mekim na ol i no bilip long God na sampela i gat tupela tingting olsem God i stap tru o nogat.

Dispela i no makim olsem bipo ol dispela man i no bung wantaim wanpela lotu, nogat. Planti bilong ol i lukim pasin bilong ol lotu na dispela i mekim na ol i no bilip long God. Ol i ting ol bikpela lotu i no inap long bekim ol askim ol man i gat long i stap bilong ol. Ol i gat wanem ol askim? Ol man husat i tok ol i bilip long God, ol tu i gat ol wankain askim. Yumi laik stori long 3-pela askim em ol man i laik askim God, na ol bekim em Baibel i kamapim.

Bilong wanem ol man i gat dispela askim?

Planti man i tok: ‘Sapos God i gat pasin laikim em i no inap larim hevi i painim ol man.’

TINGIM DISPELA: Ating bai yu kirap nogut taim yu lukim pasin na kastam bilong ol narapela lain. Na yu inap kisim tingting kranki long pasin bilong ol. Olsem, ating wanpela lain i ting pasin bilong lukluk long ai bilong narapela i soim olsem yu tingim em. Na ol narapela lain i ting kain pasin olsem i no kamapim pasin rispek. Maski i olsem, dispela i no makim olsem tingting bilong wanpela lain i no stret. Yumi mas save gut long ol bilong kliagut long pasin bilong ol.

Dispela i wankain long pasin bilong save gut long God. Planti i ting olsem ol man i karim pen na hevi, long wanem, God i no stap tru. Tasol sampela husat i kisim save long wai God i larim pen na hevi i stap i bilip olsem God i stap tru.

BAIBEL I TOK: Tingting na pasin bilong God i no wankain olsem bilong yumi. (Aisaia 55:8, 9) Olsem na sapos yumi no kisim save long God, bai i hatwok long kliagut long risen Em i larim pen na hevi i stap.

Baibel i no sapotim dispela tingting olsem “God i save mekim ol samting long rot yumi no inap kliagut long en.” Baibel i helpim yumi long kisim save long God na risen em i makim taim stret bilong mekim ol samting. a Na tu, yumi inap long i go klostu long God.—Jems 4:8.

Bilong wanem ol man i gat dispela askim?

Sampela man i gat askim olsem: ‘Sapos God i gat pasin bilong tingim ol man, bilong wanem ol man husat i tok ol i lotuim God i mekim pasin giaman?’

TINGIM DISPELA: Olsem, wanpela pikinini i sakim tok bilong papa bilong em na i lusim haus, long wanem, em i laik mekim pasin bikhet. Maski papa i no amamas long pasin pikinini i mekim, em i no pasim em long bihainim laik bilong em. Yu ting i stret ol man i tok dispela pikinini i gat papa nogut o em i no gat papa? Nogat tru. Olsem tasol, ol lotu i mekim pasin giaman, na dispela i kamapim klia olsem God i larim ol man i makim rot ol yet i laik bihainim.

BAIBEL I TOK: God i no laikim pasin giaman bilong ol lotu. (Jeremaia 7:29-31; 32:35) Tasol long wankain taim em i larim ol man i makim rot ol i laik bihainim. Planti man husat i tok ol i bilip long God i bihainim pasin na tingting bilong ol bikman bilong lotu na ol lo ol man yet i kamapim.—Matyu 15:7-9.

Tasol lotu God i orait long en i no save mekim pasin giaman. b Jisas i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Baibel i tok dispela pasin laikim i “no ken i gat pasin giaman long en.” (Rom 12:9) Planti lotu i no bihainim dispela stiatok bilong Baibel. Olsem, long 1994 pasin bilong birua long wanpela lain i kamap long Ruanda na planti tausen manmeri bilong ol lotu i kilim i dai ol wanlotu bilong ol. Tasol ol Witnes Bilong Jehova i no insait long dispela pasin birua. Na planti i lukautim ol wanbilip bilong ol na ol narapela, maski ol man inap long kilim ol i dai. Samting ol Witnes i mekim i soim olsem ol lotu inap long daunim pasin giaman na soim pasin laikim long ol narapela.

Bilong wanem ol man i gat dispela askim?

Sampela man i ting: ‘Bilong wanem ol man i save stap inap 80 o 90 yia na bihain ol i dai? Bilong wanem yumi stap sotpela haptaim tasol?’

TINGIM DISPELA: Maski planti man i no bilip long God, ol i luksave olsem ol samting i stap laip i wok gut wantaim. Na tu, ol i lukim ol samting long graun, na ples antap olsem mun na ol arapela planet i stap long ples stret bilong ol na bai ol samting i gat laip i ken stap long graun. Na ol i tok ol lo i bosim ol samting long yunives i stret tru na sapos i gat liklik senis long en, dispela inap long bagarapim ol samting i gat laip long graun.

BAIBEL I TOK: Planti man i ting olsem yumi ol man i save stap sotpela haptaim tasol, na dispela i soim olsem i nogat God. Tasol taim yumi lukim ol samting i stap laip long graun, yumi ken bilip tru olsem i gat Krieta i stap. (Rom 1:20) I gat risen na God i wokim yumi ol man na ol samting i gat laip. God i wokim ol man long i stap oltaim long graun na em i no senisim laik bilong em.​—Song 37:11, 29; Aisaia 55:11.

Yumi inap kisim save long God na ol pasin bilong em long ol samting em i wokim, tasol i gat narapela rot em God i laik bai yumi kisim save long em. Yumi mas kisim save long laik bilong God na risen Em i wokim yumi. Olsem na long rot bilong Baibel, God i kamapim klia ol dispela samting. c Ol Witnes Bilong Jehova bai amamas long helpim yu long kisim bekim bilong ol dispela askim.