Baibel i tok: “Bipo bipo tru God i mekim kamap skai na graun na olgeta samting i stap long en.” (Stat 1:1) Baibel i no stori long olsem wanem God i bin wokim olgeta samting. Sapos i tru olsem wanpela bikpela sta samting i pairap na nau yunives i kamap, orait yumi no inap tok dispela tingting i pait wantaim tok bilong Baibel. Bilong wanem yumi tok olsem? Sapos yumi ritim Stat 1:1, bai yumi klia long husat i kamapim dispela bikpela pairap.

Planti saientis i bilip olsem ol samting i gat laip i kamap nating, na nau olgeta samting long yunives i bung na i kamapim ol sta na ol planet insait long sampela haptaim. Baibel i no sapotim dispela tingting, tasol em i stori olsem God i wokim olgeta samting long yunives. Yumi no save long hau em i wokim ol samting, olsem long rot bilong ol samting i pairap o long narapela rot.

“Bipo bipo tru God i mekim kamap skai na graun na olgeta samting i stap long en.”—Stat 1:1.

Baibel i tok God i wokim “ol kain kain samting i gat laip.” (Stat 1:11, 12, 21, 24, 25) Na sampela taim, senis inap kamap long wanpela kain animal o diwai samting. Olsem, insait long wanpela grup o famili bilong ol dok, ol i gat narapela narapela lukluk. Tasol dispela i no makim olsem narapela kain animal inap long kamap long famili bilong ol.

Yumi ken stori long wanpela wok painimaut: Long 1970 samting, ol saveman i stadim liklik pisin finch long ol ailan Galápagos. Ol i luksave olsem taim senis i kamap long weda, lukluk bilong ol pisin finch tu i senis, olsem maus bilong ol i go longpela na bai ol i ken stap long dispela hap. Dispela i mekim na sampela i ting bilip bilong evolusen i tru. Tasol yu ting dispela tingting i stret? Sampela yia bihain, namba bilong ol pisin finch i gat sotpela maus i go antap tru. Dispela wok painimaut i mekim na Jeffrey H. Schwartz, em wanpela profesa bilong stadim pasin na kastam bilong ol man i tok, sampela taim senis i kamap namel long wanpela grup o famili bilong ol animal bilong helpim ol long i stap laip taim weda samting i senis, tasol “i no olsem nupela kain animal i kamap.”

Baibel i tok God i “bin wokim olgeta samting.” (Revelesen 4:11) Em i no “malolo” inap long olgeta wok bilong en i pinis. (Stat 2:2) Yumi kisim wanem skul long dispela? God i no wokim wanpela liklik sel na bihain em i malolo na wet long dispela sel i ken senis senis insait long planti milion yia na kamapim ol man, ol kain kain pis, na ol monki. a Ol i kolim dispela bilip olsem macroevolution. Em dispela tingting olsem i nogat Krieta i stap. Tasol Baibel i tok God i “wokim graun na skai na solwara na olgeta samting i stap long en.”—Kisim Bek 20:11; Revelesen 10:6.

“Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting.”—Revelesen 4:11.

Bilong kisim sampela save moa: Baibel i tok “ol man i lukim ol samting God i bin wokim na long dispela rot ol inap save long ol pasin bilong en i stap hait.” (Rom 1:20) Taim yu kisim save long God, bai yu luksave long risen na em i wokim yumi ol man. Na tu, bai yu save long samting God i tingting pinis long mekim long ol man i bihainim tok bilong em. (Saveman 12:13; Hibru 11:6) Bilong kisim sampela save moa, go long www.ps8318.com o yu ken toktok wantaim wanpela Witnes Bilong Jehova. Lukim het tok BIBLE TEACHINGS > BIBLE QUESTIONS ANSWERED.