YU SAVE HARIM OL MAN I TOK YU BAI AMAMAS NA KISIM GUTPELA SINDAUN SAPOS YU GAT PLANTI MANI KAGO? Planti milion manmeri i kisim dispela tingting na ol i wok longpela aua bilong kisim planti mani. Tasol yu ting mani kago bai givim amamas tru? Dispela i kamapim klia wanem samting?

Wanpela nius Journal of Happiness Studies, i stori olsem taim yumi gat ol samting yumi nidim pinis na yumi laik kisim planti mani moa, dispela i no inap mekim yumi i stap amamas, nogat. Hevi i no stap long mani. Wanpela atikol long magasin Monitor on Psychology i tok olsem yumi yet i “wok strong tru long kisim mani, na dispela i mekim na yumi no stap amamas.” Dispela tok i wankain long tok Baibel i mekim inap 2 tausen yia i go pinis: “Pasin bilong laikim tumas mani em i as bilong olgeta kain pasin nogut. Sampela i bin laikim tumas mani, na . . . i olsem ol i sutim ol yet long ol samting i givim pen long ol.” (1 Timoti 6:9, 10) Wanem sampela bilong ol dispela samting i givim pen long ol?

WARI NA I NO SLIP GUT BIKOS OL I MAS LUKAUTIM MANI KAGO. “Ol wokman i save slip gut long nait, maski ol i gat planti kaikai o kaikai bilong ol i sot. Tasol maniman i no olsem. Em i save wari long ol planti samting bilong en, olsem na em i no inap slip gut.”—Saveman 5:12.

BEL HEVI TAIM SAMTING OL I WETIM I NO KAMAP TRU. Pasin bilong laikim mani i mekim ol man i laik kisim planti mani moa. “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em.” (Saveman 5:10) Na tu, pasin bilong laikim tumas mani bai mekim na man i no tingim ol bikpela samting, olsem lusim haptaim long i stap wantaim famili na ol pren o mekim ol wok lotu.

BEL HEVI NA KROS TAIM MANI I PINIS. “Yu no ken hatwok tumas long kamap maniman. Sapos yu gat gutpela tingting, bai yu no ken mekim olsem. Maski yu kisim planti mani, wantu em bai i pinis. I olsem mani i gat wing na i flai i go antap olsem tarangau.”—Sindaun 23:4, 5.

HOLIM LIKLIK KAGO. “Yumi no bin bringim wanpela samting i kam long dispela graun, na taim yumi lusim dispela graun, yumi no inap karim wanpela samting i go. Olsem na sapos yumi gat kaikai na laplap na haus samting, orait yumi ken ting ol dispela samting em inap long yumi.” (1 Timoti 6:7, 8) Ol man husat i amamas long liklik samting ol i gat i no save komplein o toktok planti, na dispela i helpim ol na ol i no bel nogut long ol narapela. Na tu, ol i no gat pasin bilong bungim planti mani kago, na dispela i mekim na ol i no bel hevi na tingting planti.

GIVIM SAMTING. “Amamas bilong givim samting i winim amamas bilong kisim samting.” (Aposel 20:35) Ol man i gat pasin bilong givim samting long ol narapela i save amamas, maski ol i givim liklik haptaim na strong long mekim olsem. Ol dispela kain man i kisim planti samting moa, em ol samting we yumi no inap baim long mani—pasin laikim, rispek, na ol gutpela pren husat i gat pasin bilong givim samting tu!—Luk 6:38.

TINGIM LAIK BILONG OL NARAPELA. “Pasin bilong laikim man, em i nambawan pasin. Olsem na sapos yu stap wantaim ol pren bilong yu na yupela i kaikai kumu tasol, dispela i winim tru pasin bilong i stap wantaim ol man yu no laikim, na yupela i kaikai mit bilong bulmakau.” (Sindaun 15:17) Wanem poin bilong dispela ves? Pasin laikim namel long yumi wantaim ol narapela i bikpela samting moa winim mani kago. Pasin laikim em bikpela pasin we bai mekim man i stap amamas.

Sabina em wanpela meri long Saut Amerika, na em i kisim save olsem ol stiatok bilong Baibel i bikpela samting. Man bilong Sabina i lusim em, olsem na Sabina i wok strong tru bambai em na 2-pela pikinini meri i gat kaikai, wara, na klos. Em i mekim 2-pela narapela narapela wok mani na em i save kirap long 4 klok long olgeta moning. Maski em i bisi tru, Sabina i laik stadi long Baibel. Wanem samting i kamap?

Pe em i kisim i stap wankain yet. Tasol laip bilong em i senis! Em i amamas taim em i kisim save long God. (Matyu 5:3) Em i painim ol gutpela pren namel long ol wanbilip. Em i kisim amamas tu taim em i stori wantaim ol narapela long ol samting em i lainim.

“Stretpela pasin man i mekim i kamapim ples klia olsem em i gat savetingting.” (Matyu 11:19) Dispela i kamapim klia olsem yumi mas holim liklik kago tasol na givim samting long ol narapela, na tingim laik bilong ol narapela na i no bilong yumi yet!