Yumi no save long risen, tasol kru bilong yumi inap luksave long ol samting i luk nais. Baibel i no stori long hau yumi inap mekim olsem, tasol em i tokaut olsem God i wokim yumi wankain olsem em, olsem na yumi save amamas long ol samting i kamap gutpela o i luk nais. (Stat 1:27; Saveman 3:11) Na tu, God i wokim bodi bilong yumi i narakain tru na olgeta hap bilong bodi i gat wan wan wok bilong ol. Em risen na man bilong raitim song i tok: “Mi save litimapim nem bilong yu. Olgeta samting yu wokim i narakain na i nambawan tru.”—Song 139:14.

Long nau, ol man i tingim tasol lukluk bilong ol. Ol kampani bilong wokim na salim ol klos, ol musik, ol vidio, na muvi samting i kirapim ol man long tingim bilas bilong ol i bikpela samting. Buk Body Image i tok, sampela wok painimaut long Esia, Yurop na Amerika i kamapim olsem “planti manmeri i no amamas long ol yet maski ol i gat ol gutpela pasin. Ol i amamas sapos ol i luk nais.” Sapos yumi gat kain tingting olsem, yumi no inap save long tingting na laik bilong ol narapela, em bikpela samting moa.—1 Samuel 16:7.

Ol man i tingim tasol lukluk bilong ol narapela, na tu, ol i tingim pasin bilong ol long bilas, moa yet bilas bilong ol meri. Wanpela ripot bilong lain American Psychological Association (APA) bilong 2007 i tok: “Mipela i stadim ol TV program, musik, na ol vidio samting long Intenet, na mipela i painimaut olsem klostu olgeta i soim ol meri i luk nais tru na ol i werim ol klos samting i gat kain kain stail bilong pulim tingting bilong ol man.” Em risen na Baibel i kirapim yumi long abrusim pasin bilong tingim tasol lukluk bilong yumi!—Kolosi 3:5, 6.

“Yupela i no ken bilasim skin ausait tasol. . . . Bikpela samting long ai bilong God em i olsem, em i laik bai yupela i bilasim insait bilong yupela long pasin isi na bel isi, ol i olsem bilas i no inap bagarap.”—1 Pita 3:3, 4.

Sampela i tok: “Sapos yu luk nais, orait soim ol narapela!” Wanpela ripot bilong lain APA i tok, long ol kantri we planti man i gat dispela tingting, ol tineja na ol yangpela gel em klostu ol bai kamap tineja, i tingim ol yet “olsem samting ol narapela i laikim . . . , ol i laik bai ol arapela i lukim ol na skelim sapos ol i luk nais o nogat.” Dispela kain tingting inap nogutim man. Lain APA i tok, long nau kain tingting i  stap olsem wanpela bikpela hevi long sait bilong helt na long i stap bilong ol man, “ol yangpela inap tingting planti na bel hevi.” Na tu, ol inap kisim bikpela presa, “i no amamas long ol yet . . . , i no kaikai gut, pilim olsem ol i samting nating, na kisim sik dipresen o wari oltaim.”

“Taim bilong yupela i stap yangpela i no longpela taim. Nogat. Em i olsem samting nating. Olsem na yupela i no ken tingting planti long ol samting i save givim hevi long yupela. Na yupela i no ken bihainim pasin i givim pen long bodi bilong yupela.”—Saveman 11:10.

Baibel i tok man i soim rispek na pasin daun, em i gat “gutpela tingting.” (1 Timoti 2:9) Tingim: Ol man i gat pasin daun i no tingim ol yet, nogat, ol i gat stretpela tingting. Ol i save tingim ol narapela, olsem na ol arapela i laikim na rispektim ol, na bikpela samting em God i amamas long ol. (Maika 6:8) Na tu, ol inap painim ol gutpela pren na gutpela poroman marit husat bai tingim gutpela pasin bilong ol, na ol inap pas gut na stap amamas wantaim.

Em risen na Baibel i tok “bilasim insait bilong yupela,” dispela i makim olsem yumi mas kisim ol gutpela pasin. (1 Pita 3:3, 4) Sampela haptaim i mas lus na bai man inap kisim ol gutpela pasin. Tingim, maski lukluk bilong yu bai senis, tasol gutpela pasin bilong yu bai stap oltaim. Sindaun 16:31 i tok: “Ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun. Olsem na ol i givim biknem long ol.” Olsem na maski yumi yangpela o lapun, yumi olgeta i laik bihainim ol gutpela tok bilong Baibel, long dispela rot yumi bai kamapim ol gutpela pasin na ol arapela bai rispektim yumi.

“Wanpela meri inap givim switpela tok long yumi, tasol pasin bilong en i narakain. Na maski meri i luk nais tru, em i no inap i stap olsem oltaim. Mobeta yumi litimapim nem bilong meri i save aninit long Bikpela.”—Sindaun 31:30.