Tingim Ol Samting Jehova i Bin Mekim Long Yu

SOTPELA taim bihain long Jisas i bin kirap bek, tupela disaipel bilong em i lusim Jerusalem na wokabaut i go long Emeus. Gutnius Luk i Raitim i tok: “Tupela i wok long mekim planti toktok na askim long ol dispela samting, na Jisas yet i kamap klostu na i wokabaut i go wantaim tupela. Tasol wanpela samting i pasim ai bilong tupela, na tupela i no luksave olsem, em i Jisas.” Jisas i askim tupela: “ ‘Yutupela i toktok long wanem samting na yutupela i wokabaut i go?’ Em i tok olsem, na tupela i sanap na pes bilong tupela i soim olsem tupela i bel sori tru.” Bilong wanem tupela i bel sori? Ol disaipel i bin ting olsem Jisas bai kisim bek ol Israel long han bilong ol man bilong ol arapela lain, tasol em i no bin mekim olsem. Ol birua i bin kilim em i dai. Olsem na ol i bel sori.​—⁠Lu. 24:​15-21; Ap. 1:⁠6.

Jisas i toktok wantaim dispela tupela disaipel. “Em i stat long tok bilong Moses na bilong olgeta profet, na em i skulim tupela long as bilong olgeta hap bilong buk bilong God i toktok long em yet.” Tru tumas, taim Jisas i bin mekim wok bilong em, planti bikpela samting i bin kamap na i strongim bilip bilong ol! Taim tupela disaipel i putim yau long tok Jisas i mekim, tingting bilong ol i senis na ol i no bel sori moa, ol i amamas. Bihain, long nait, tupela i tok: “Tru tumas, taim mitupela i wokabaut long rot, na em i givim toktok long mitupela, na em i autim as tingting bilong buk bilong God long mitupela, bel bilong mitupela i bin kirap tru.” (Lu. 24:​27, 32) Yumi kisim wanem skul long samting i bin kamap long tupela disaipel?

Taim Samting Yumi Wetim i No Kamap Yet

Dispela tupela disaipel i wokabaut long rot i go long Emeus ol i bel sori, long wanem, samting ol i bin wetim i no kamap. Tok bilong Sindaun 13:12 i stret long ol, em i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” Na olsem tasol, sampela husat i bin stap gut long mekim wok bilong Jehova inap planti yia, ating long tingting bilong ol, taim bilong bikpela hevi tru i mas kamap longtaim pinis. (Mt. 24:21; KTH 7:14) Tasol samting ol i bin wetim i no kamap yet, na ating dispela inap mekim ol i bel hevi.

Tasol tingim, dispela tupela disaipel i amamas gen taim Jisas i helpim ol long tingim ol  tok profet em truim bilong ol i kamap pinis​—⁠na truim bilong sampela i bin kamap long taim bilong ol yet. Bel bilong yumi tu i ken i stap amamas na yumi no ken bel hevi long ol samting i no kamap yet. Michael, em wanpela elda Kristen, i tok: “No ken tingting tumas long samting Jehova i no mekim yet. Mobeta yumi tingting long ol samting em i mekim pinis.” Em gutpela savetok, a?

Samting Jehova i Mekim Pinis

Tingim ol bikpela samting Jehova i mekim pinis. Jisas i tok: “Man i bilip long mi, bai em tu i mekim olkain wok mi save mekim. Na bai em i mekim ol bikpela wok i winim wok mi bin mekim.” (Jo. 14:12) Long nau, ol wokman bilong God i mekim bikpela wok tru, winim wok olgeta Kristen i bin mekim long bipo. Winim 7 milion manmeri i wetim dispela taim we ol bai abrusim bagarap long taim bilong bikpela hevi tru. Tingim, no gat wanpela taim bipo we i gat planti gutpela wokman bilong Jehova i mekim wok long planti hap long graun olsem long nau! Jehova i mekim na tok profet bilong Jisas i kamap tru, olsem lain bilong em bai ‘mekim ol bikpela wok i winim wok em i bin mekim.’

Jehova i bin mekim wanem ol narapela samting bilong helpim yumi? Em i bin opim rot long ol man i gat gutpela bel i ken lusim pasin nogut bilong dispela graun na go insait long wanpela paradais bilong spirit em i bin kamapim. (2 Ko. 12:​1-4) Lusim hap taim bilong tingim ol samting bilong dispela paradais. Bilong helpim yu long mekim olsem, lukim ol buk i stap long laibreri bilong yu yet o long Haus Kingdom. O lukim Watch Tower Publications Index o Watchtower Library. Harim ol drama bilong Baibel em ol i bin rekodim. Tingim gen ol samting yu bin harim na lukim long kibung em nau tasol i bin kamap. Tingim tu ol gutpela bratasista Kristen em yumi inap bung na poroman wantaim ol. Jehova i bin givim yumi planti kaikai bilong spirit na wanpela gutpela lain brata​—⁠tru tumas, em wanpela paradais bilong spirit!

Devit, man bilong raitim song, i tok: “God, Bikpela bilong mi, yu bin mekim planti gutpela wok bilong helpim mipela.” (Sng. 40:⁠5) Yes, taim yumi tingim ol gutpela gutpela samting Jehova i bin mekim bilong helpim yumi, dispela bai strongim yumi long stap strong na givim bel olgeta long mekim wok bilong Papa bilong yumi long heven, em Jehova.​—⁠Mt. 24:⁠13.

[Piksa long pes 31]

Jisas i helpim ol disaipel long tingim gut ol samting Jehova i bin mekim long helpim ol

[Piksa long pes 32]

Tingim gen ol samting yu bin harim o lukim long kibung em nau tasol i bin kamap