Lain Bilong Jehova i Winim Kot!

LONG 1991 gavman bilong Soviet Yunion i rejistaim ol Witnes Bilong Jehova olsem wanpela lotu gavman i orait long en. Taim gavman bilong Soviet Yunion i pinis, nupela gavman bilong Rasia tu i putim ol Witnes Bilong Jehova long lista bilong ol lotu em gavman i orait long en. Dispela nupela gavman i tokaut olsem olpela gavman i bin mekim nogut long ol brata. Long 1993, Dipatmen ov Jastis bilong Moscow i rejistaim ol Witnes Bilong Jehova bilong Moscow olsem wanpela lotu gavman i orait long en. Na tu long 1993, gavman bilong Rasia i wokim nupela konstitiusen, em wanpela pepa i tokaut long ol raits bilong ol manmeri. Konstitiusen i tok olsem olgeta i fri long bihainim lotu bilong ol. Ol bratasista bilong yumi i bin wet inap planti yia long ol dispela senis i ken kamap.

Bihain long dispela ol bratasista long Rasia i mekim bikpela wok moa long autim tok, na planti man i kisim save long tok i tru. (2 Tim. 4:⁠2) Long 1990 namba bilong ol Witnes long Moscow em 300 tasol, tasol long 1995 namba i winim 5,000! Olsem na ol birua bilong ol Witnes Bilong Jehova i tingting planti. Long dispela taim ol i kirap birua long lain bilong Jehova na kisim ol i go long kot.

KOT I KIRAP

Pasin birua i kirap long Jun 1995. Sampela sapota bilong Misin Otodoks Bilong Rasia i kotim ol brata na sutim tok olsem ol i brukim lo. Long Jun 1996, ol CID polis i tok olsem ol i no painim evidens i soim olsem ol Witnes i brukim lo. Tasol dispela lain i sutim wankain tok 4-pela taim moa long ol brata. Long dispela 4-pela taim ol CID i skelim ol samting, tasol ol i no painim evidens olsem ol Witnes i brukim lo. Bihain, long Epril 13, 1998, kot i pinis.

Mausman bilong prosekiuta i tok i no gat evidens olsem ol Witnes Bilong Jehova i brukim lo. Tasol em i tok, bilong stopim ol Witnes ol i no ken kotim ol long ol i brukim lo, nogat, ol i mas kotim ol long bilip bilong ol. So prosekiuta bilong narapela kot (Northern Administrative Circuit of Moscow) i kotim ol brata long dispela samting. Long Septemba 29, 1998, kot kirap long Golovinsky Distrik Kot long Moscow.

SKELIM BAIBEL LONG KOT

Prosekiuta bilong dispela kot em Tatyana Kondratyeva. Bilong kotim ol Witnes, em i yusim wanpela lo bilong kantri em ol i kamapim long 1997. Dispela lo i tok ol lotu olsem Misin Otodoks, Islam, Juda, na lotu Buda, ol tasol em ol lotu bilong bipo yet. Wanpela niuspepa i tok Misin Otodoks Bilong Rasia i bin wok strong long kirapim gavman long kamapim dispela lo, long wanem, Misin i laik bai gavman i tambuim ol Witnes Bilong Jehova. (Associated Press, Jun 25, 1999) Dispela lo i orait long ol kot i tambuim ol lotu em ol i kirapim ol man long heitim ol arapela. Prosekiuta i tok gavman i mas tambuim ol Witnes Bilong Jehova,  long wanem, ol i save kirapim ol man long heitim ol arapela na ol i bagarapim sindaun bilong ol famili.

Wanpela loya bilong ol brata i tok: “Husat ol bratasista long Moscow Kongrigesen i brukim lo na kirapim ol man long heitim ol arapela?” Prosekiuta i no inap kolim wanpela nem. Tasol em i tok ol buk bilong ol Witnes i save kirapim ol man long heitim ol man bilong ol arapela lotu, long wanem, ol dispela buk i skulim ol man olsem ol Witnes Bilong Jehova tasol i lotu i tru.

Narapela loya, wanpela brata bilong yumi, i givim wanpela Baibel long jas na prosekiuta. Nau em i ritim Efesus 4:​5, i tok: “I gat wanpela Bikpela tasol, na wanpela bilip tasol, na wanpela baptais tasol.” Jas, prosekiuta, na loya, ol i holim Baibel na ol i toktok long ol skripsa olsem Jon 17:18 na Jems 1:27. Jas i askim: “Ol dispela skripsa i kirapim ol man long heitim ol narapela lotu?” Prosekiuta i tok, tingting bilong em yet i no bikpela samting, long wanem, em i no savemeri bilong Baibel. Orait nau loya i soim sampela buk bilong Misin Otodoks Bilong Rasia i gat ol tok we i agensim ol Witnes Bilong Jehova, na em i askim: “Ol tok long ol dispela buk i brukim lo?” Prosekiuta i tok gen olsem tingting bilong em yet i no bikpela samting, long wanem, em i no savemeri bilong lotu.

SUTIM TOK​—⁠NO GAT EVIDENS

Prosekiuta i tok ol Witnes i save bagarapim ol famili, na em i tok wanpela evidens bilong dispela em olsem ol i no save selebretim ol bikpela de. Em i tok moa olsem ol Witnes i no save larim ol pikinini bilong ol i malolo gut o mekim ol samting bilong kisim amamas. Tasol bihain em i tokaut olsem lo bilong Rasia i no save tokim ol man long selebretim ol bikpela de. Na tu, em i tok olsem em i no bin toktok wantaim wanpela pikinini bilong ol Witnes Bilong Jehova na em i no bin go long wanpela miting bilong ol.

Prosekiuta i singautim wanpela dokta i kam long kot long kamapim tingting bilong em. Dokta i tok ol buk bilong ol Witnes i save paulim tingting bilong ol man husat i ritim. Tasol bihain em i tokaut olsem planti samting bilong dispela kot em i bin raitim stori long en, em i kisim long pepa ol hetman bilong Misin Otodoks long Moscow i bin raitim. Na tu, em i tok olsem i no gat wanpela taim we em yet i bin helpim wanpela sikman husat i Witnes Bilong Jehova. Tasol narapela dokta i tokaut long kot olsem em i bin skelim moa long 100 Witnes long Moscow. Em i tok olsem tingting bilong ol dispela Witnes i no paul liklik, na bihain long ol i kamap Witnes, ol i save rispektim moa ol arapela lotu.

 MIPELA WINIM KOT, TASOL I NO PINIS YET

Long Mas 12, 1999, jas i makim 5-pela saveman bilong skelim ol buk bilong ol Witnes, na em i pasim dispela kot, na bihain ol bai kirapim gen. Tasol paslain long dispela samting i kamap, Ministri ov Jastis bilong Rasia tu i makim sampela saveman bilong skelim ol buk bilong yumi. Long Epril 15, 1999, ol dispela saveman i tok olsem ol i no painim wanpela samting nogut long ol buk bilong yumi. So long Epril 29, 1999, Ministri ov Jastis bilong Rasia i tokaut olsem ol Witnes Bilong Jehova i ken stap yet olsem wanpela lotu em gavman i orait long en. Tasol jas long Moscow i tok yet olsem 5-pela man em i makim i mas skelim yet ol buk bilong yumi. Dispela em narapela kain. Ministri ov Jastis bilong kantri olgeta bilong Rasia i tok ol Witnes Bilong Jehova i save bihainim lo na gavman i orait long lotu bilong ol. Tasol long seim taim, Dipatmen ov Jastis bilong Moscow i mekim wok painimaut long ol Witnes, long wanem, ol arapela i sutim tok long ol olsem ol i brukim lo!

Tupela yia bihain ol i kirapim gen dispela kot. Long Februeri 23, 2001, Jas Yelena Prokhorycheva i kamapim disisen bilong em long dispela olsem i no gat as long tambuim wok bilong ol Witnes Bilong Jehova long Moscow. Orait nau, kot i tok olsem olgeta tok ol i sutim long ol brata bilong yumi em giaman! Tasol prosekiuta i no wanbel long dispela disisen, olsem na em i askim Moscow Siti Kot long skelim dispela kot. Tripela mun bihain, em long Me 30, 2001, kot i rausim disisen bilong Jas Prokhorycheva.  Kot i tok long kirapim narapela kot we i gat seim prosekiuta tasol narapela jas.

MIPELA LUS LONG KOT, TASOL I NO PINIS YET

Long Oktoba 30, 2001, kot i kirap gen. Jas em Vera Dubinskaya. Na Prosekiuta Kondratyeva i sutim tok gen long ol Witnes olsem ol i save kirapim ol man long heitim ol arapela man. Tasol em i tok olsem, bilong lukautim ol Witnes, gavman i mas putim tambu long ol! Taim 10,000 Witnes husat i stap long Moscow i harim dispela tok, wantu ol i sainim wanpela pepa i tokaut long jas olsem i no gat wok long wanpela i lukautim ol. Na tingim, 10-pela yia paslain long dispela long wankain de, em long Oktoba 30, 1991, gavman i tokaut olsem lotu bilong ol Witnes Bilong Jehova i as na gavman Soviet Yunion i bin mekim nogut long ol.

Prosekiuta i tok i no gat wok long kamapim sampela evidens i soim olsem ol Witnes i brukim lo. Em i tok ol i no kotim ol Witnes Bilong Jehova long samting ol i mekim, nogat, ol i kotim ol long ol tok i stap long ol buk bilong ol na bilip bilong ol. Em i tok olsem em bai singautim wanpela mausman bilong Misin Otodoks Bilong Rasia olsem wanpela witnes bilong kot. Dispela i kamapim klia olsem lain husat i laik tambuim ol Witnes em ol bikman bilong Misin Otodoks. Long Me 22, 2003, jas i makim wanpela lain i save gut long lotu long skelim gen ol buk bilong ol Witnes Bilong Jehova.

Long Februeri 17, 2004, kot i bung long harim tingting bilong dispela lain husat i bin skelim ol buk bilong yumi. Dispela lain i painimaut olsem ol buk bilong yumi i save skulim ol man long pasin bilong i stap amamas insait long famili na insait long marit. Ol i no painim wanpela tok we i soim olsem yumi skulim ol man long heitim ol arapela. Ol arapela saveman i wanbel. Jas i askim wanpela profesa bilong lotu olsem: “Wai na ol Witnes Bilong Jehova i save autim tok?” Profesa i tok ol Kristen i mas autim tok. Em i tok Baibel i tokim ol long autim tok na Krais i tokim ol disaipel bilong em long i go na autim tok long olgeta hap. Tasol maski ol i kamapim ol dispela evidens, long Mas 26, 2004, jas i tambuim wok bilong ol Witnes Bilong Jehova long Moscow. Long Jun 16, 2004, Moscow Siti Kot i sapotim dispela disisen. Dispela i mekim na ol kongrigesen long Moscow i no gat wanpela oganaisesen em gavman i orait long en bilong i stap mausman bilong ol. Ol birua i laik givim hevi long ol brata bilong yumi na pasim wok autim tok bilong ol.

Ol brata i mekim wanem? Ol i no larim ol birua i pasim ol. Ol i wok yet long autim gutnius. (1 Pita 4:​12, 16) Ol i bilip olsem Jehova bai helpim ol. Na ol i redi long sambai long rait bilong ol long lotuim Jehova.

PASIN BIRUA I GO BIKPELA

Long Ogas 25, 2004, ol brata bilong yumi i salim wanpela pas long Vladimir Putin, husat i stap presiden bilong Rasia long dispela taim. Long dispela pas ol i tokim em long tingting bilong ol taim ol kot bilong Moscow i tambuim wok bilong ol. I gat 315,000 manmeri i bin sainim dispela  pas. Long wankain taim ol bikman bilong Misin Otodoks Bilong Rasia i tok: “Mipela i no orait liklik long wok bilong ol Witnes Bilong Jehova.”

Sampela man long Rasia i bilipim ol dispela tok giaman ol i sutim long ol Witnes Bilong Jehova na ol i kirap birua long ol. Ol i paitim na kikim ol Witnes taim ol i autim tok long Moscow. Wanpela man i belhat na i laik bai wanpela sista i lusim ol flet we em i autim tok long en. Man i ranim em na kikim em long baksait. Sista i pundaun na paitim het bilong en na em i mas go long haus sik. Tasol polis i no arestim dispela man. Ol polis i arestim planti Witnes, mekim pasin long ol olsem ol i raskol, na lokim ol long sel long wanpela nait. Ol man i lukautim ol haus em ol Witnes i rentim bilong mekim ol miting long en ol i pret, nogut papa bilong haus i pinisim ol long wok. Olsem na ol i no larim ol Witnes long rentim ol haus. Planti kongrigesen i no gat ples bilong mekim ol miting. Olsem, 40 kongrigesen i mas yusim 4-pela Haus Kingdom em ol i stap insait long wanpela bikpela haus. Wanpela kongrigesen i mas mekim Pablik Miting long 7:30 long moningtaim. Wanpela wasman raun i tok ol pablisa i mas kirap long 5 klok moningtaim bilong go long miting. Tasol ol i amamas long mekim, na ol i mekim olsem winim wanpela yia.

KOT I MEKIM WOK OLSEM “AUTIM TOK”

Ol Witnes i laik kamapim olsem disisen gavman i mekim long Moscow bilong tambuim wok autim tok bilong ol, dispela disisen  i brukim lo. So long Disemba 2004, ol loya bilong yumi i askim helpim long Yuropian Kot ov Human Raits. Sikspela yia bihain, long Jun 10, 2010, taim ol i skelim pinis olgeta tok ol lain i bin sutim long ol Witnes, Kot i tok ol Witnes i no gat asua long wanpela samting! Kot i tok olgeta tok ol i sutim long ol Witnes em giaman tasol. Na tu, kot i tok gavman bilong Rasia i mas pinisim dispela tambu na stretim ol samting ol i bin mekim long ol Witnes. Bihain long dispela disisen, gavman bilong Rasia i laik bai kot i mas skelim gen dispela samting. Olsem na ol i askim narapela kot bilong Yuropian Kot ov Human Raits long skelim dispela samting, em kot i gat bikpela namba moa. Tasol long Novemba 22, 2010, 5-pela jas bilong dispela kot i tok ol i no gat wok long harim dispela kot. Dispela i makim olsem gavman bilong Rasia i mas bihainim disisen kot i bin kamapim long Jun 10, 2010.​—⁠Lukim blok “Disisen Bilong Kot,” long pes 8.

Kot i pasim tok olsem Yuropian Konvensen Long Human Raits i lukautim wok bilong ol Witnes Bilong Jehova. I no Rasia tasol i gat wok long bihainim dispela disisen, nogat. Ol arapela 46 kantri husat ol i memba bilong Kaunsel Bilong Yurop, ol tu i mas bihainim. Planti jas, ol man i kamapim ol lo, na ol arapela man husat i save skelim raits bilong ol man bai i gat laik long skelim dispela disisen. Bilong wanem? Long wanem, taim ol jas bilong Kot i mekim disisen bilong ol, ol i mekim wok long 8-pela disisen em Kot i wokim bipo bilong helpim ol Witnes Bilong Jehova. Ol i mekim wok tu long 9-pela disisen em ol bikpela kot bilong Ajentina, Amerika, Inglan, Japan, Kanada, Rasia, Saut Afrika, na Spen i bin mekim bilong helpim ol Witnes Bilong Jehova. Ol Witnes Bilong Jehova long olgeta hap inap mekim wok long dispela disisen bilong Kot long sambai long lotu bilong ol.

Jisas i tokim ol disaipel bilong en olsem ol man bai kisim ol “i go long ol hetman na ol king” na bai ol “inap long autim tok bilong [em] long ol na long ol lain man.” (Mat. 10:18) Ol dispela kot i kamap long Rasia kirap long 1995 na i kam, i opim rot long ol man bilong Moscow na long ol arapela ples long kisim sampela save long Jehova, winim bipo. Olgeta samting i bin kamap long ol dispela kot i bin “autim tok” long ol man na i “helpim dispela wok i go bikpela moa.” (Fili. 1:12) I no gat wanpela samting inap pasim yumi long autim gutnius bilong Kingdom. Yumi beten askim Jehova long wok yet long helpim ol gutpela bratasista bilong yumi long Rasia, em yumi laikim ol tumas.

[Blok/Piksa long pes 6]

Kot Long Frans i Skelim Disisen Bilong Kot Bilong Rasia

Long Februeri 28, 1996, Rasia i sainim Yuropian Konvensen Long Human Raits. (Long Me 5, 1998, Rasia i tok orait long dispela Konvensen.) Taim gavman bilong Rasia i sainim dispela, dispela i makim olsem ol manmeri bilong Rasia i gat

‘rait long mekim wanem lotu ol i laikim na ol i ken mekim long haus na long pablik ples na ol i gat rait long senisim lotu bilong ol sapos ol i laik.’​—⁠Atikol 9.

‘rait long kamapim tingting bilong ol long ol tok ol i mekim na long ol tok ol i raitim na ol i gat rait long tokim ol man long ol samting.’​—⁠Atikol 10.

‘rait long mekim ol miting long pasin we i no kirapim man long kros pait.’​—⁠Atikol 11.

Taim ol man o ol oganaisesen i karim hevi, long wanem, gavman i no bihainim tok bilong Konvensen Long Human Raits, na ol kot bilong dispela kantri i no stretim dispela samting, orait ol i ken bringim hevi bilong ol i go long Yuropian Kot ov Human Raits long Strasbourg, Frans (lukim piksa antap). Dispela kot i gat 47 jas​—⁠em wan wan jas bilong ol wan wan kantri husat i bin sainim dispela Yuropian Konvensen Long Human Raits. Na ol dispela kantri i mas bihainim ol disisen dispela kot i kamapim.

[Blok long pes 8]

Disisen Bilong Kot

Dispela em sampela hap tok Kot i bin kamapim.

Wanpela tok ol man i sutim long ol Witnes Bilong Jehova em olsem ol i save brukim ol famili. Tasol Kot i no ting olsem. Kot i tok:

“As bilong hevi em olsem: Wanblut husat i no save lotu, em i no laik rispektim rait bilong wanblut husat i save lotu, long mekim ol wok lotu bilong em.”​—Par. 111.

Kot i no painim evidens bilong sapotim tok ol man i sutim long ol olsem ol i mekim samting bilong “kontrolim tingting bilong narapela.” Kot i tok:

“Kot i kirap nogut long ol kot bilong [Rasia] i no kolim nem bilong wanpela man we ol arapela i bin kontrolim tingting bilong em na pasim em long bihainim maus bilong bel bilong em.”​—Par. 129.

Narapela tok ol man i sutim long ol Witnes Bilong Jehova em olsem ol i save bagarapim helt bilong ol man i insait long dispela lotu, long wanem, ol i no save kisim blut long haus sik. Tasol Kot i no ting olsem. Kot i tok:

“Man i stap fri long makim olsem em i laik kisim o sakim wanpela kain marasin, o makim narapela rot bilong stretim sik. Dispela i bikpela samting long rait bilong man long makim samting em yet i laik mekim. Olsem, sikman i bikpela pinis, em i stap fri long makim olsem em i laik kisim operesen o wanpela kain marasin o nogat, na tu, em i stap fri long makim em i laik kisim blut o nogat.”​—Par. 136.