Nau Bai i Gat The Watchtower Long Simpol Inglis

MIPELA i amamas long tokaut olsem kirap long Watchtower bilong stadi long dispela mun, mipela bai mekim traim inap wanpela yia, na wokim wankain Watchtower long simpol Inglis. Dispela Watchtower bai i gat ol stadi atikol, na sapos i gat spes bai i gat ol narapela atikol tu. Mipela i bilip olsem dispela bai helpim tru planti Witnes Bilong Jehova long sait bilong lotu. Bilong wanem i olsem?

Inglis em tokples planti brata bilong yumi i save yusim long ol kantri olsem, Fiji, Gana, Kenya, Laibiria, Naijiria, Papua Niugini, na Solomon Ailan. Ating ol brata bilong yumi long ol dispela kantri i save mekim ol tokples bilong ol yet, tasol planti i save yusim tok Inglis bilong toktok wantaim ol narapela long ol miting bilong kongrigesen na long wok autim tok. Tasol tok Inglis ol i yusim i simpol moa long tok Inglis i stap long ol buk na nius bilong yumi. Na sampela long lain bilong Jehova i go sindaun long ol kantri we ol i mas yusim tok Inglis bilong toktok wantaim ol narapela, maski ol i no save gut long dispela tokples. Na tu, i no gat ol miting bilong kongrigesen long tokples bilong ol yet.

Ol atikol yumi stadi long en long olgeta wik long Stadi Wastaua, em i nambawan rot bilong “gutpela wokboi i gat savetingting” long skulim ol manmeri bilong God long nau. (Mat. 24:45) Olsem na bilong helpim gut olgeta husat i kam long ol miting, ol i wokim Watchtower long simpol Inglis, we ol i no yusim planti wed na ol i raitim long stail i isi long kliagut long en. Karamap bilong dispela nupela Watchtower bai i narapela kain liklik. Ol het tok, ol paragraf, ol riviu askim, na ol piksa long ol stadi bai i wankain long narapela Watchtower bilong stadi. Olsem na long Watchtower Study, olgeta inap yusim Watchtower i stret long ol na insait long miting. Bilong soim olsem wanem tok bilong tupela Watchtower i narapela narapela, lukim eksampel daunbilo long paragraf 2 bilong namba wan stadi bilong dispela Watchtower.

Mipela i laik bai dispela nupela Watchtower i helpim planti husat i bin beten askim Jehova olsem: “Yu givim tingting long mi bai mi inap lainim gut olgeta lo bilong yu.” (Sng. 119:73) Mipela i bilip olsem ol manmeri husat i no save gut long tok Inglis, na tu, sampela pikinini husat i save mekim tok Inglis, ol bai inap long redim gut moa Watchtower Study long olgeta wik. Yumi tenkyu tru long Jehova long em i “laikim tru olgeta wanbilip,” na em i yusim lain “gutpela wokboi i gat savetingting” long givim olgeta samting yumi nidim long taim stret.​—⁠1 Pita 2:⁠17.

Gavening Bodi Bilong Ol Witnes Bilong Jehova