1, 2. (a) Wanem ol pasin bai helpim yumi long sanap strong na karim hevi? (b) Bilip i makim wanem samting? Stori long tok piksa.

 WOK bilong Jehova i save givim bikpela amamas long yumi. Tasol yumi gat ol hevi wankain olsem ol narapela manmeri, na ‘yumi mekim stretpela pasin na yumi karim pen long dispela.’ (1 Pita 3:14; 5:8, 9; 1 Kor. 10:13) Yumi mas i gat bilip na strongpela bel bambai yumi inap karim ol kain hevi olsem.

² Bilip i makim wanem samting? Aposel Pol i tok: “Pasin bilong bilip i olsem, yu save tru olsem ol samting yu bilip na wet long en ol bai kamap tru. Yu bai kliagut tru olsem samting yu bilip long en em i samting tru, maski yu no lukim long ai bilong yu.” (Hib. 11:1) Narapela Baibel i tok: “Pasin bilong bilip i olsem taitol pepa bilong ol samting yumi wet long kisim. Bilip i olsem yumi save tru olsem ol samting bai kamap maski yumi no lukim.” (The Simple English Bible) Sapos ol i givim taitol bilong wanpela samting long yumi, orait yumi bilip olsem dispela samting i bilong yumi. Yumi bilip olsem oltaim God i save truim ol tok bilong em, na dispela i olsem yumi holim wanpela taitol pepa. Bilip bilong yumi i helpim yumi long save tru olsem yumi bai lukim truim bilong ol tok promis bilong Baibel em yumi wet long en, na yumi save tru olsem ol dispela samting bai kamap maski yumi no lukim.

3, 4. (a) Man i gat strongpela bel bai mekim wanem? (b) Wanem wanpela rot bilong strongim bilip na pasin bilong yumi long strongim bel?

³ Man i gat strongpela bel, em bai i no pret long toktok na mekim sampela samting taim hevi i painim em. Sapos yumi gat strongpela bel, yumi bai sanap strong, i no pret, na yumi bai redi tu long karim hevi long samting yumi bilip long en.—Mak 6:49, 50; 2 Tim. 1:7.

⁴ Bilip na pasin bilong strongim bel em ol gutpela pasin yumi mas i gat. Tasol yumi inap pilim olsem yumi sot long bilip na yumi no gat strongpela bel. Baibel i stori long planti tausen wokman bilong God em ol i gat bilip na strongpela bel. Olsem na wanpela rot bilong strongim ol dispela pasin em long skelim pasin bilong sampela wokman bilong God long bipo.

5. Bilong mekim gut wok bilong em olsem lida, Josua i mas i gat wanem ol pasin?

⁵ Yumi ken tingim samting i kamap 3,500 yia i go pinis. Dispela samting i kamap 40 yia bihain long Jehova i helpim planti milion manmeri bilong lain Israel long lusim kalabus long Isip. Profet Moses i stap lida bilong ol. Em i gat 120 krismas taim em i go antap long het bilong maunten Nebo na lukim Graun Bilong Promis, na em i dai long dispela hap. Man husat i kisim ples bilong em na kamap lida bilong lain Israel em Josua, em man i gat “planti gutpela save na tingting.” (Lo 34:1-9) Lain Israel i redi long kisim graun bilong Kenan. Bilong stap gutpela lida, Josua i mas i gat savetingting i kam long God. Na tu, em i mas bilip long Jehova, strongim bel, na sanap strong.—Lo 31:22, 23.

6. (a) Olsem Josua 23:6 i tok, yumi mas i gat strongpela bel long mekim wanem? (b) Yumi kisim wanem skul long tok bilong Aposel 4:18-20 na Aposel 5:29?

⁶ Insait long ol yia em ol i pait long kisim graun bilong Kenan, Josua i bihainim savetingting, strongim bel, na kamapim klia bilip bilong em, na yumi ken tok dispela i bin strongim tru lain Israel. Ol i mas strongim bel long mekim pait, na tu, ol i mas strongim bel long mekim ol samting Josua i tokim ol long mekim. Paslain long Josua i dai, em i tokim ol: “Yupela i mas lukaut gut tru na yupela i mas bihainim olgeta samting i stap long buk bilong lo bilong Moses. Yupela i no ken lusim wanpela liklik tok bilong en.” (Jos. 23:6) Yumi tu i mas gat strongpela bel bambai yumi inap bihainim tok bilong Jehova long olgeta taim. Yumi inap mekim olsem tu long taim ol man i strong long yumi mekim ol samting i no stret wantaim laik bilong God. (Ritim Aposel 4:18-20; 5:29.) Sapos yumi beten long Jehova na bilip long em, em bai helpim yumi long strongim bel.

7. Josua i mas mekim wanem bambai em inap strongim bel na olgeta samting em i mekim i ken kamap gutpela?

⁷ Sapos yumi laik i gat strongpela bel bambai yumi inap mekim laik bilong God, orait yumi mas stadi long Tok Bilong God na bihainim long i stap bilong yumi. Taim Josua i kisim ples bilong Moses, God i tokim em olsem: “Yu mas sanap strong na yu no ken pret na surik. Yu mas was gut na bihainim tru olgeta lo wokman bilong mi, Moses, i bin givim long yu. . . . Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol.” (Jos. 1:7, 8) Josua i bihainim dispela tok na ‘olgeta samting em i mekim i kamap gutpela tasol.’ Sapos yumi tu i mekim olsem, yumi bai strongim bel moa yet na yumi bai mekim gut wok bilong God.

8. Ol i kisim yiateks bilong 2013 long wanem skripsa? Yu ting tok bilong yiateks bai helpim yu olsem wanem?

⁸ Ating Josua i kisim bikpela strong tru taim Jehova i givim sampela tok moa long em olsem: “Yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.” (Jos. 1:9) Jehova i stap wantaim yumi tu. Olsem na yumi “no ken pret” na “no ken surik long wanpela samting” maski wanem ol hevi i painim yumi. Yumi mas tingim moa yet dispela tok: Sanap strong na no ken pret . . . Jehova,  God bilong yu, i stap wantaim yu. Dispela tok bilong Josua 1:9 bai stap olsem yiateks bilong yia 2013. Long ol mun i kam bihain, yumi bai kisim strong long dispela tok. Na tu, yumi bai kisim strong long tok na pasin bilong ol narapela husat i stap gutpela piksa long pasin bilong bilip na strongim bel.

9. Olsem wanem Rahap i soim olsem em i gat bilip na strongpela bel?

⁹ Taim Josua i salim 2-pela man long go lukstil long Kenan, pamukmeri Rahap i haitim ol na em i salim ol birua i go long narapela rot. Pasin bilong em long bilip na strongim bel i mekim na em yet wantaim famili bilong em i abrusim bagarap taim ol Israel i bagarapim Jeriko. (Hib. 11:30, 31; Jems 2:25) Rahap i lusim pasin nogut bilong em na kirap mekim ol samting em Jehova i amamas long en. Sampela husat i kamap Kristen, ol i bilip, strongim bel, na ol i strong long mekim ol wankain senis olsem Rahap i bin mekim bambai ol inap amamasim God.

10. Wanem ol samting i kamap taim Rut i mekim disisen long bihainim lotu i tru? Em i kisim wanem ol blesing?

¹⁰ Bihain long taim Josua i dai, wanpela meri Moap em Rut, em i strongim bel na bihainim lotu i tru. Man bilong em i bilong lain Israel na em i dai pinis, olsem na ating Rut i gat sampela save long Jehova. Wanpis tambu mama bilong em, Naomi, i bin stap long Moap, tasol em i tingting long i go bek long taun Betlehem bilong Israel. Long rot, Naomi i tokim Rut long go bek long lain bilong em, tasol dispela meri Moap i tok: “Yu no ken tokim mi long lusim yu na yu no ken pasim mi long i go wantaim yu. . . . Lain bilong yu bai i kamap lain bilong mi. Na God bilong yu bai i kamap God bilong mi.” (Rut 1:16) Rut i truim tok bilong em. Bihain Rut i maritim wanblut bilong Naomi, em Boas, na Rut i karim wanpela pikinini man, na Rut i kamap tumbuna meri bilong Devit na Jisas. Yes, Jehova i save mekim gut long man husat i bilip na i strongim bel.—Rut 2:12; 4:17-22; Mat. 1:1-6.

11. Olsem wanem Jehoiada na Jehoseba i soim olsem ol i bin strongim bel? Wanem gutpela samting i kamap long dispela?

¹¹ Taim yumi lukim olsem God i sambai long ol manmeri husat i putim laik bilong God i stap namba 1 na ol i redi long helpim ol wanbilip, dispela i save strongim bilip bilong yumi na helpim yumi long strongim bel. Tingim Hetpris Jehoiada na meri bilong em Jehoseba. Bihain long taim King Ahasia i dai, mama bilong em Atalia i kilim i dai ol narapela long lain bilong king na mekim em yet i kamap kwin, na Jehoas tasol i abrusim bagarap. Jehoiada na Jehoseba i redi long lusim laip bilong ol na ol i kisim pikinini man bilong Ahasia, em Jehoas, na haitim em i stap inap 6-pela yia. Long namba 7 yia, Jehoiada i mekim Jehoas i kamap king, na tu, Jehoiada i tok na ol i kilim i dai Atalia. (2 Kin. 11:1-16) Bihain Jehoiada i helpim King Jehoas long stretim gen tempel. Na taim Jehoiada i gat 130 krismas, em i dai na ol i planim em long matmat bilong ol king, long wanem, “em i bin mekim planti gutpela wok bilong helpim ol manmeri na bilong helpim wok bilong haus bilong God.” (2 Sto. 24:15, 16) Jehoiada na meri bilong em i bin strongim bel na mekim ol samting, olsem na dispela i lukautim lain famili em Mesaia bai kamap long en.

12. Ebetmelek i bin strongim bel na mekim wanem?

¹² Ebetmelek, wanpela wokboi long haus bilong King Sedekaia, em i redi long lusim laip bilong em long helpim Jeremaia. Ol prins bilong Juda i bin sutim tok giaman olsem Jeremaia i laik daunim gavman, olsem na king i putim Jeremaia long han bilong ol. Ol dispela prins i tromoi Jeremaia i go insait long wanpela hul em wara i drai pinis na graun malumalum i stap long en, na ol i larim em i stap bilong i dai long dispela hap. (Jer. 38:4-6) Planti man i heitim Jeremaia, tasol Ebetmelek i askim Sedekaia long helpim Jeremaia maski birua inap painim em. Sedekaia i harim tok bilong Jeremaia na em i salim 30 man long go wantaim Ebetmelek long helpim Jeremaia. Long rot bilong profet Jeremaia, God i  tokim Ebetmelek olsem em i no inap i dai taim ol Babilon i kam bagarapim Jerusalem. (Jer. 39:15-18) God i save mekim gut long ol man i bihainim pasin bilong strongim bel.

13. Tripela man Hibru i bin strongim bel long mekim wanem? Yumi inap kisim wanem skul long stori bilong ol?

¹³ Inap olsem 600 yia paslain long Krais, gutpela samting i painim 3-pela wokman bilong Jehova em ol i bilong lain Hibru, long wanem, ol i kamapim klia bilip bilong ol na pasin bilong strongim bel. King Nebukatnesar i singautim olgeta bikman bilong Babilon i kam bung na em i tok long ol i mas lotuim wanpela traipela imis ol i wokim long gol. Sapos wanpela man i no laik mekim olsem, ol bai tromoi em i go insait long bikpela paia na em bai dai. Dispela 3-pela man Hibru i soim rispek long Nebukatnesar na tok: “Mipela i save lotu long God tru. Sapos yu mekim long mipela olsem yu tok, orait God bilong mipela em inap long helpim mipela long abrusim paia na strong bilong yu, na em bai i helpim mipela. Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.” (Dan. 3:16-18) Jehova i bin helpim ol dispela 3-pela Hibru na ol i abrusim bagarap, na stori bilong ol i stap long Daniel 3:19-30. Maski yumi no inap bungim wankain hevi olsem ol, yumi tu i save bungim ol hevi we i traim pasin bilong yumi long stap gut long God, na yumi ken bilip tru olsem God bai blesim yumi taim yumi kamapim klia bilip bilong yumi na pasin bilong strongim bel.

14. Long stori i stap long Daniel sapta 6, olsem wanem Daniel i soim olsem em i gat strongpela bel? Wanem gutpela samting i kamap?

¹⁴ Daniel i kamapim klia bilip na pasin bilong em long strongim bel taim ol birua i strong long King Darius i mas kamapim lo olsem, “inap long 30 de ol [manmeri] i no ken prea long wanpela god o long wanpela man. Nogat. Ol i mas prea long yu tasol. Sapos wanpela man i brukim dispela lo, orait yu ken tromoi em i go daun long hul bilong ol laion.” Taim Daniel i harim olsem king i sainim pinis dispela lo, “em i kirap i go long haus bilong en. Na em i go long rum antap, na i brukim skru klostu long windo i lukluk i go long Jerusalem. Na em i beten long God olsem oltaim em i save mekim. Em i save beten tripela taim long wanpela de.” (Dan. 6:6-10) Ol birua i tromoi Daniel i go daun long hul bilong laion, tasol Jehova i helpim em na em i no kisim bagarap.—Dan. 6:16-23.

15. (a) Olsem wanem Akwila na Prisila i stap gutpela eksampel long pasin bilong bilip na strongim bel? (b) Tok bilong Jisas long Jon 13:34 i makim wanem pasin? Olsem wanem planti Kristen i bin soim dispela pasin?

¹⁵ Baibel i stori olsem wanpela taim Akwila na Prisila ‘i redi long lusim laip bilong ol long lukautim laip bilong Pol.’ (Apo. 18:2; Rom 16:3, 4) Ol i strongim bel na bihainim tok bilong Jisas, olsem: “Mi givim nupela lo long yupela, olsem narapela i mas laikim narapela. Yupela i mas laikim narapela  narapela olsem mi bin laikim yupela.” (Jon 13:34) Lo Bilong Moses i makim olsem man i mas laikim wantok bilong em olsem em i laikim em yet. (Wkp. 19:18) Tasol lo Jisas i givim i “nupela,” long wanem, dispela lo i makim pasin laikim we inap kirapim man long givim laip bilong em yet bilong helpim ol narapela, olsem Jisas i bin mekim. Planti Kristen i soim pasin laikim long rot bilong strongim bel na “redi long lusim laip bilong ol” taim ol i haitim ol wanbilip bambai ol birua i no ken mekim nogut long ol o kilim ol i dai.—Ritim 1 Jon 3:16.

16, 17. Wanem ol hevi i bin painim sampela disaipel bilong Krais long pastaim na i traim bilip bilong ol? Olsem wanem wankain hevi i bin painim ol Kristen long taim bilong yumi?

¹⁶ Olsem Jisas i bin mekim, ol Kristen long pastaim i bin strongim bel na lotuim Jehova wanpela tasol. (Mat. 4:8-10) Ol i no laik kukim paura i gat gutpela smel bilong givim biknem long Empera bilong Rom. (Lukim piksa.) Daniel P. Mannix i raitim wanpela buk (Those About to Die) na em i stori olsem paia i save lait oltaim long wanpela alta i stap long ples bung. Em i tok, sapos kalabusman i tromoi tasol sampela paura long paia, ol bai givim em wanpela pepa na larim em i go fri. Ol i tokim kalabusman olsem dispela pasin i no makim olsem em i lotuim empera, nogat. Dispela pasin i makim olsem kalabusman i wanbel olsem dispela empera bilong Rom em i wanpela god. Maski i olsem, planti Kristen i no bin bihainim dispela pasin bilong i go fri.

¹⁷ Ol Kristen husat i bin stap long ol banis kalabus nogut bilong lain Natsi, planti taim ol birua i tokim ol long sainim pepa bilong tokaut olsem ol i no bilip moa long Jehova, na long dispela rot ol i ken i go fri na ol birua i no inap kilim ol i dai. Wan wan tasol i bin sainim dispela pepa. Taim ol birua i laik bagarapim na pinisim wanpela lain olgeta long Ruanda, ol Witnes bilong lain Tutsi na Hutu i lukautim narapela narapela maski ol inap lusim laip bilong ol long mekim olsem. Long kain taim olsem, ol manmeri bilong God i mas strongim bel na kamapim klia bilip bilong ol.

18, 19. Baibel i stori long husat ol man i bin stap gutpela piksa long bilip na pasin bilong strongim bel, na dispela inap strongim yumi long mekim wok autim tok?

¹⁸ Long nau yumi gat wanpela wok i gutpela tru em God i givim long ol wokman bilong em long graun, em wok bilong autim gutnius bilong Kingdom na kamapim disaipel. (Mat. 24:14; 28:19, 20) Yumi amamas tru long Jisas i bin stap gutpela eksampel long yumi! Em “i raun long ol bikpela taun na liklik taun na em i wok long autim gutnius bilong Kingdom bilong God.” (Luk 8:1) Olsem Jisas, yumi mas i gat bilip na strongpela bel bambai yumi inap autim tok bilong Kingdom. God inap helpim yumi na yumi tu inap strongim bel olsem Noa i bin mekim, em “man bilong tokaut long stretpela pasin” long “ol man i sakim tok,” em ol bai bagarap long bikpela tait.—2 Pita 2:4, 5.

¹⁹ Pasin bilong beten i save helpim yumi long mekim wok autim tok. Taim ol birua i mekim nogut long sampela disaipel bilong Krais, ol i beten bambai “ol i autim tok bilong God na ol i no pret,” na God i harim beten bilong ol na i helpim ol. (Ritim Aposel 4:29-31.) Sapos yu pret na sem long go long haus bilong ol man na autim tok, Jehova bai harim beten bilong yu na strongim bilip bilong yu na strongim bel bilong yu.—Ritim Song 66:19, 20. a

20. Yumi ol wokman bilong Jehova inap kisim helpim long husat?

²⁰ I hatwok long bihainim laik bilong God long dispela haptaim bilong nau we yumi bungim planti hevi tru. Tasol yumi no stap wanpis. God i stap wantaim yumi. Pikinini bilong em tu i stap wantaim yumi, na em i Het bilong kongrigesen. Na tu, winim 7 milion lain Witnes Bilong Jehova i stap long olgeta hap bilong graun. Yumi olgeta i laik wok wantaim long kamapim klia bilip bilong yumi na autim gutnius, na yumi mas tingim yiateks bilong 2013, em i tok: Sanap strong na no ken pret . . . Jehova, God bilong yu, i stap wantaim yu.—Jos. 1:9.