1, 2. Bilong wanem sampela man i laikim ol prut bilong diwai fik?

 PLANTI man i save amamas long kaikai prut bilong diwai fik. Long taim bilong ol man i bin raitim Baibel, lain Israel i save amamas long kaikai dispela prut. (Nah. 3:12; Luk 13:6-9) Long nau, ol man i planim diwai fik long planti hap bilong graun. Prut bilong diwai fik i gat ol gutpela marasin bilong helpim bodi bilong man, na sampela man i tok dispela prut i gutpela bilong helpim lewa, olsem bel bilong man.

² Wanpela taim Jehova i mekim tok piksa olsem ol manmeri i olsem ol prut bilong diwai fik. Em i no stori long ol samting em prut bilong diwai fik inap mekim long helt bilong man, nogat. Em i stori long tingting i stap long bel bilong ol man. Tok em i bin mekim inap helpim yumi na ol famili na ol pren bilong yumi. Orait nau, taim yumi stori long ol tok em i bin mekim, yumi mas tingim ol samting em yumi ol Kristen i mas kisim skul long en.

3. Ol fik em Jeremaia sapta 24 i stori long en i makim wanem samting?

³ Long yia 617 B.C.E., ol manmeri bilong Juda i wok long bihainim ol pasin em Jehova i nolaik tru long en. Jeremaia i lukim visen i soim samting bai painim Juda. Long visen em i lukim 2-pela basket i gat ol prut bilong diwai fik, na dispela i makim 2-pela kain lain. Ol fik i stap long wanpela basket i “gutpela tumas,” na ol fik long narapela basket i “nogut tru.” (Ritim Jeremaia 24:1-3.) Ol fik nogut i makim King Sedekaia na ol manmeri em klostu nau ol tu bai kisim bagarap wantaim em long han bilong King Nebukatnesar na lain ami bilong em. Tasol i gat ol manmeri em ol i olsem ol gutpela fik. Sampela bilong ol em Esekiel, Daniel na 3-pela pren bilong em, na ol narapela em bihain ol birua i kisim ol i go kalabus long Babilon. Bihain, sampela bilong ol dispela Juda i go bek long  Jerusalem na stretim bek tempel.—Jer. 24:8-10; 25:11, 12; 29:10.

4. Bilong wanem tok em God i mekim long ol gutpela manmeri bilong Juda i strongim yumi?

⁴ Jehova i tok long ol dispela gutpela manmeri olsem: “Bai mi givim tingting [“tingting bilong bel,” NW] long ol na bai ol i save olsem, mi yet mi Bikpela. Na bai ol i kam bek long mi na bel tru long mi. Na bai ol i kamap lain manmeri bilong mi.” (Jer. 24:7) Dispela tok i strongim bel bilong yumi, long wanem, em i kamapim olsem God i laik bai “tingting bilong bel” bilong yumi i mas i gat laik long save long em. Dispela i makim olsem, God i laik bai yumi gat pasin bilong kisim save long em na stap long lain bilong em. Olsem wanem yumi inap kisim dispela pasin? Yumi mas stadi long Baibel na bihainim ol samting yumi lainim. Yumi tanim bel na lusim ol pasin nogut bilong yumi. Bihain yumi dediketim laip bilong yumi long God na kisim baptais long nem bilong Papa, Pikinini, na holi spirit. (Mat. 28:19, 20; Apo. 3:19) Olsem wanem? Yu inapim pinis ol dispela mak? O yu wok long go oltaim long ol miting bilong ol Witnes Bilong Jehova na yu wok long mekim ol samting bilong inapim ol dispela mak?

5. Ol tok em Jeremaia i raitim i stori long wanem lain stret?

⁵ Maski sapos yumi inapim pinis olgeta dispela mak, yumi mas wok yet long holim stretpela tingting na was gut long pasin yumi mekim. Bilong wanem? Yumi bai kisim bekim bilong dispela askim taim yumi skelim tok em Jeremaia i mekim taim em i stori long tingting i stap long bel. Sampela tok long buk bilong Jeremaia i stori long ol kantri i stap klostu long Juda. Tasol planti tok bilong en i stori long lain Juda long taim bilong 5-pela king husat i bosim Juda. (Jer. 1:15, 16) Tok bilong Jeremaia i makim ol manmeri em ol i dediket pinis long Jehova. Long taim bilong Moses, ol dispela manmeri i wanbel long tok olsem ol i stap long lain bilong Jehova. (Kis. 19:3-8) Na long taim bilong Jeremaia tu ol manmeri i tok: “Nau mipela i kam bek long yu, long wanem, yu God, Bikpela bilong mipela.” (Jer. 3:22) Tasol yu ting ol i gat gutpela tingting?

6. Bilong wanem yumi mas tingim gut tok em God i mekim long tingting i stap long bel?

⁶ Ol dokta inap yusim ol masin bilong lukluk i go insait long bodi bilong yumi na lukim olsem bel bilong yumi i stap helti o nogat. Tasol Jehova inap lukim tingting i stap long bel bilong yumi, o pasin tru bilong yumi. Em i tok: “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en? Mi Bikpela, mi save glasim tingting na bel. . . . Na mi save skelim pasin bilong olgeta wan wan man, na mi bekim pe long ol inap long pasin ol i bin mekim.” (Jer. 17:9, 10) God inap luksave long ol samting yumi laikim, yumi gat wanem tingting, yumi pilim olsem wanem, pasin bilong yumi, na ol samting yumi laik mekim long laip bilong yumi. God bai glasim tingting i stap long bel bilong yu. Tasol yu tu inap mekim ol samting bilong glasim tingting i stap long bel bilong yu yet.

7. Jeremaia i tok wanem long tingting i stap long bel bilong planti Juda long taim bilong em?

⁷ Bilong redim yumi yet, yumi ken askim yumi yet olsem, ‘Wanem tingting i stap long bel bilong planti Juda long taim bilong Jeremaia?’ Jeremaia i tok maski ol Juda i katim skin pinis, “ol i no save bihainim tok” bilong God. (Jer. 9:25, 26) Yes, ol i no givim bel olgeta long stap gut long Jehova.

8, 9. Planti Juda long taim bilong Jeremaia i mas mekim wanem?

⁸ God i tokim ol Juda olsem: “Yupela wan wan i mas lusim pasin nogut bilong yupela na bihainim gutpela pasin tasol.” (Jer. 18:11) Tingting i stap long bel bilong ol i nogut, olsem na pasin bilong ol i no stret. (Ritim Mak 7:20-23.) Ol i bikhet tru na ol i no laik senisim pasin bilong ol. Ol samting ol i tingting  long en na astingting bilong ol i no stret long ai bilong Jehova. (Ritim Jeremaia 5:23, 24; 7:24-26.) God i tokim ol long samting ol i mas mekim, olsem: “Yupela Juda na Jerusalem i mas rausim olpela tingting nogut na kamap ol manmeri bilong mi stret.”—Jer. 4:4.

⁹ Ol Juda long taim bilong Jeremaia i no gat pasin bilong bihainim tok. Na ol Israel long taim bilong Moses tu i bin gat wankain pasin. (Lo 10:16; 30:6) Ol Juda i gat wok long rausim olgeta kain tingting na laik we i mekim na ol i givim baksait long ol lo bilong Jehova.—Apo. 7:51.

10. Olsem wanem yumi inap bihainim pasin bilong Devit?

¹⁰ Yumi mas tenkyu olsem God i helpim yumi long kisim save long mining bilong tok piksa bilong bel. Yumi stap pinis olsem ol wokman bilong Jehova, olsem na yu ting yumi mas tingim samting i stap long bel bilong yumi? Planti insait long kongrigesen i stap gut long wok bilong Jehova na bihainim stretpela pasin. Ol i no kamap olsem “ol fik i nogut.” Tasol tingim, maski Devit i stretpela man, em i tokim Jehova olsem: “God, skelim mi gut na bai yu save long olgeta tingting i stap long bel bilong mi. Traim mi, na bai yu save gut long olgeta tingting bilong mi. Skelim mi gut, nogut sampela tok giaman i stap long tingting bilong mi.”—Sng. 17:3; 139:23, 24.

11, 12. (a) Bilong wanem yumi mas skelim tingting i stap long bel bilong yumi? (b) Yumi mas save olsem Jehova i no inap mekim wanem?

¹¹ Jehova i laik bai yumi olgeta wan wan i mas kisim save long em, olsem em inap orait long yumi na yumi mas bihainim dispela rot. Jeremaia i tok Jehova i save skelim ol stretpela man na em i save lukim “bel na tingting” bilong ol. (Jer. 20:12) Olsem na yumi tu i mas skelim wanem tingting tru i stap long bel bilong yumi. (Ritim Song 11:5.) Taim yumi mekim olsem, yumi bai painimaut olsem ol tingting, ol laik, na ol mak yumi laik winim, ol i no stret, na dispela bai mekim na bel bilong yumi i no inap skelim gut ol samting. Ating yumi no hariap long bihainim tok bilong Jehova. Ating yumi mas stretim bel bilong yumi, i olsem yumi kisim operesen bilong rausim ol tingting nogut i stap long bel. Orait, wanem sampela tingting o laik nogut inap stap insait long bel bilong yumi? Olsem wanem yumi inap senisim ol tingting i stap long bel?—Jer. 4:4.

¹² Jehova i no inap fosim yumi long senisim tingting na pasin bilong yumi. Em i tok long “ol gutpela fik” olsem em bai givim long ol “tingting bilong bel” long save long em. Tasol em i no inap fosim ol long senisim tingting i stap long bel bilong ol, nogat. Ol yet i mas i gat laik long save long God, na yumi tu i mas mekim olsem.

13, 14. Olsem wanem tingting i stap long bel bilong man inap bagarapim em yet?

¹³ Jisas i tok tingting i stap long bel bilong man inap mekim na man i kisim “ol tingting nogut,” kilim man i dai, mekim pasin adaltri, o mekim ol narapela pasin i no klin. (Mat. 15:19) Olsem: Sapos man i gat ol tingting kranki long bel, em inap mekim pasin adaltri o pasin pamuk. Sapos em i no tanim bel, orait Jehova bai i no inap orait moa long em. Tasol maski sapos em i no mekim  wanpela bikpela rong, ol laik nogut inap kamap strong insait long bel bilong em. (Ritim Matyu 5:27, 28.) Em i bikpela samting long yumi mas was gut na bai ol dispela kain tingting nogut i no ken kamap insait long bel bilong yumi. Olsem wanem? Long pasin hait yu save tingting long wanpela man o meri long pasin Jehova i no orait long en? Yu ting yu mas senisim tingting i stap long bel bilong yu?

¹⁴ Olsem tasol, sapos wanpela Kristen i belhat long narapela brata na em i larim dispela belhat i kamap strong insait long bel bilong em, dispela inap mekim na em i heitim dispela brata. (Wkp. 19:17) Dispela Kristen i mas wok strong long rausim ol dispela tingting nogut.—Mat. 5:21, 22.

15, 16. (a) Olsem wanem wanpela Kristen inap kamap man husat i “no save bihainim tok”? (b) Bilong wanem Jehova i no laik bai yumi stap olsem ol man husat i “no save bihainim tok”?

¹⁵ Planti Kristen i no save larim ol dispela kain tingting nogut i stap long bel bilong ol. Jisas i bin stori long “ol tingting nogut.” Olsem: Yumi inap ting olsem pasin bilong i stap gut long famili bilong yumi i winim olgeta narapela samting. Em tru olsem ol Kristen i laikim tru ol wanblut bilong ol, na ol i no olsem ol manmeri bilong dispela graun em ol i “no gat pasin bilong laikim ol wanfamili.” (2 Tim. 3:1, 3) Tasol sampela taim pasin bilong stap gut long famili inap kirapim yumi long mekim ol pasin i no stret. Planti i pilim olsem wanblut i bikpela samting moa winim ol narapela. Sapos ol narapela i bagarapim bel bilong wanpela wanblut bilong ol, orait ol tu bai pilim wankain. Ol brata bilong Daina i bin belhat nogut tru, long wanem, narapela man i bin rongim Daina. Dispela i mekim na ol i kilim i dai planti man. (Stt. 34:13, 25-30) Na tingting nogut i stap long bel bilong Apsalom i mekim na em i kilim i dai Amnon. (2 Sml. 13:1-30) Olsem na “ol tingting nogut” inap kamapim bikpela hevi.

¹⁶ Ol Kristen tru i no save kilim man i dai. Tasol sampela Kristen inap belhat nogut tru taim wanpela man i mekim nogut long wanfamili bilong ol. O ating ol yet i kisim tingting olsem wanpela man i bin mekim nogut long wanfamili bilong ol. Olsem na ol inap mekim wanem long dispela man em ol i ting em i bin mekim nogut long wanfamili bilong ol? Ating ol bai i no laik lusim sampela haptaim long bung o toktok wantaim em o singautim em i go long haus bilong ol. (Hib. 13:1, 2) Tasol sapos wanpela Kristen i gat pasin laikim long ol wanbilip, orait em i no inap mekim dispela pasin. Jehova i save long tingting i stap long bel bilong yumi. Sapos em i lukim ol dispela tingting nogut i stap long bel bilong yumi, em bai tok olsem yumi “no save bihainim tok.” (Jer. 9:25, 26) Olsem na  Jehova i tok, yumi “mas rausim olpela tingting nogut na kamap ol manmeri bilong [em] stret.”—Jer. 4:4.

17. Sapos yumi stap aninit long Jehova, olsem wanem dispela bai helpim yumi long senisim tingting i stap long bel?

¹⁷ Taim yu skelim tingting i stap long bel bilong yu, ating yu bai luksave olsem yu no save kirap kwik long bihainim tok bilong Jehova. Ating sampela pasin bilong yu i soim olsem yu “no save bihainim tok.” Ating yu pret long ol man i ting wanem long yu. O ating yu laik kisim biknem na kisim planti mani. Sampela taim yu bikhet o strong long bihainim laik bilong yu yet. Wankain samting olsem i bin painim ol narapela. (Jer. 7:24; 11:8) Jeremaia i tok ol Juda long taim bilong em i bin ‘bikhet tru na pasim strong tingting’ bilong ol. Ol i no stap “aninit” long Jehova maski em i laikim ol tru na givim olgeta samting ol i mas i gat. (Jer. 5:23, 24) Sapos yumi stap aninit long Jehova, olsem yumi rispektim em, yumi bai rausim tingting nogut i stap long bel bilong yumi. Yumi bai redi long senisim tingting i stap long bel bilong yumi na mekim olgeta samting Jehova i tokim yumi long mekim.

18. Jehova i mekim wanem tok promis long ol Kristen husat i insait long nupela kontrak?

¹⁸ Taim yumi wok strong long mekim olsem, Jehova bai givim yumi “tingting bilong bel” long kisim save long em. God i tok promis long mekim olsem long ol Kristen em i bin makim, em ol i insait long nupela kontrak. Em i tok: “Bai mi putim lo bilong mi long tingting bilong ol na bai mi raitim tok bilong lo long bel bilong ol. Na bai mi stap God bilong ol na bai ol i stap lain manmeri bilong mi.” Em i tok moa olsem: “Long dispela taim ol man bai i no ken skulim ol wantok na brata bilong ol na tok olsem, ‘Yupela i mas save long Bikpela.’ Nogat. Olgeta bai i save pinis long mi, maski ol i man nating o ol i gat biknem. Long wanem, bai mi lusim sin bilong ol na mi no ken tingim moa.”—Jer. 31:31-34. a

19. Yumi ken bilip na wet long kisim wanem samting?

¹⁹ Yumi bilip na wet long kisim samting God i tok promis long en. Yumi olgeta i mas i gat laik long kisim save long Jehova na stap long lain bilong em. Yumi inap kisim save long Jehova inap oltaim oltaim sapos yumi bilip long ofa bilong Krais long baim bek man na God i lusim sin bilong yumi. God inap lusim sin bilong yumi, olsem na yumi tu i mas lusim rong bilong ol narapela maski sapos sampela taim i hatwok long mekim olsem. Yumi mas wok strong long rausim belhat o pasin bilong heitim ol narapela. Dispela bai helpim yumi long soim olsem yumi laik mekim wok bilong Jehova, na yumi wok long save gut moa long em. Yumi bai stap olsem dispela lain em Jehova i tok long ol olsem: “Laik bilong yupela na tingting bilong yupela i strong tru long painim mi. Olsem na bai yupela inap i kam klostu long mi. Mi Bikpela, mi tok stret, bai mi larim yupela i kam klostu long mi.”—Jer. 29:13, 14.