LAIP STORI
Laip Bilong Mipela i Gat As Tru
LONG 1958, mi karim pikinini man bilong mi Gary, na mi luksave olsem sampela samting long em i no stret. Tasol ol dokta i no painimaut kwik; bihain long 10-pela mun ol i tokaut long sik bilong em, na bihain long narapela 5-pela yia ol nambawan dokta long London tu i tokaut long sik bilong em. Inap 9-pela yia bihain long Gary i kamap, mi karim narapela pikinini meri, Louise, na sampela samting long em i soim olsem em i gat sik i bikpela moa winim bilong Gary, na dispela i mekim mi bel hevi tru.
Ol dokta i tokim mi olsem: “Tupela pikinini bilong yu i gat sik LMBB, a na i no gat marasin bilong en.” Long dispela taim, ol man i no save tumas long dispela kain sik we i save kalap long ol papamama i go long ol pikinini. Dispela sik i save mekim na ai bilong man i save bagarap na man inap kamap aipas, bodi bilong man i pat, ekstra pinga i save kamap long han na lek, bodi i no save kamap bikpela hariap, tingting i no save wok hariap, man inap kisim sik daiabitis, atraitis, na sik long kidni. Olsem na mi bai hatwok tru long lukautim ol pikinini bilong mi. Wanpela wok painimaut bilong nau i soim olsem 1-pela namel long 125,000 manmeri long Briten i gat dispela sik, na planti narapela i gat dispela sik, tasol em i no bikpela.
JEHOVA I STAP OLSEM “STRONGPELA HAUS”
Bihain liklik long mi marit, mi toktok wantaim wanpela Witnes Bilong Jehova na i no longtaim na mi luksave olsem ol i skulim ol man long tok i tru bilong Baibel. Tasol man bilong mi i no gat laik long save long tok bilong Baibel. I hatwok long mi go long ol miting, long wanem, wok bilong man bilong mi i mekim na oltaim mipela i save muv i go long narapela narapela hap. Maski i olsem, mi no lusim pasin bilong ritim Baibel na beten long Jehova. Bel bilong mi i stap isi tru taim mi ritim dispela tok: “Bikpela i stap olsem wanpela strongpela haus. Ol man i kisim hevi long ol birua, ol i ken i go i stap long en. Long taim bilong hevi ol i ken i go long em na hait” na em i “no save givim baksait long ol manmeri i kam long [em].”—Sng. 9:9, 10.
Gary i no inap lukluk gut, olsem na taim em i gat 6-pela krismas, ol i salim em i go long skul bilong helpim ol lain husat i gat kain hevi olsem em, dispela skul i stap long saut kos bilong Inglan. Olgeta taim em i save ringim mi na stori long ol samting em i bel hevi long en, na mi save helpim em long kliagut long ol bikpela stiatok bilong Baibel. Sampela yia bihain long Louise i kamap, mi kisim sik multiple sclerosis, em sik we i save mekim na sampela hap bilong bodi i dai, na sik fibromyalgia, em sik we i save mekim na ol masol na join bilong bun i save pen. Olsem na Gary i lusim skul na kam bek long haus taim em i gat 16 krismas. Tasol ai bilong em i kamap nogut moa, na long 1975 ol i rejistaim em olsem wanpela aipas. Long 1977 man bilong mi i lusim mipela.
Bihain stret long taim Gary i kam bek, mipela i lusim bikpela haptaim moa long bung wantaim wanpela kongrigesen, na mi kisim baptais long 1974. Mi tenkyu tru olsem wanpela elda i helpim Gary long kliagut long ol senis i kamap long bodi bilong em taim em i wok long kamap tineja. Sampela Witnes i helpim mi long mekim ol wok bilong haus, na bihain sosel sevis i baim 5-pela bilong ol long helpim mipela. Dispela em wanpela blesing!
Gary i kamap strong long tok i tru na em i kisim baptais long 1982. Em i gat bikpela laik long mekim wok painia haptaim, olsem na mi poromanim em long mekim wok painia haptaim inap planti yia. Bihain liklik, Gary i amamas tru taim wasman sekit i tokim em olsem, “Gary, yu inap tru long mekim wok painia oltaim!” Dispela tok i strongim tru bel bilong Gary, na long 1990 ol i makim em long mekim wok painia oltaim.
Gary i bin kisim 2-pela operesen bilong senisim ol bun long hips, namba 1 operesen em long 1999, na namba 2 em long 2008. Tasol sik bilong Louise i bikpela moa. Louise i aipas taim mi karim em, na taim mi lukim ekstra pinga long lek bilong em, mi luksave olsem em tu i gat sik LMBB. Ol dokta i mekim sampela wok painimaut na ol i kisim save olsem Louise i gat sampela bikpela bagarap insait long bodi bilong em. Insait long ol yia i go pinis, em i bin kisim ol bikpela operesen, na 5-pela operesen long ol kidni bilong em. Olsem Gary, em tu i gat sik daiabitis.
Louise i save olsem sampela hevi inap kamap taim em i kisim operesen, olsem na paslain long em i kisim operesen, em i save toktok wantaim ol bikpela dokta, ol wokman i stap olsem ol helpim bilong ol dokta, na dairekta na edministreta bilong haus sik bambai ol inap kliagut long disisen bilong em long sait bilong blut. Olsem na em i pas gut wantaim olgeta manmeri husat i mekim wok bilong helpim em.
LAIP BILONG MIPELA I GAT AS TRU
Long haus mipela i save mekim ol samting we i stret long pasin bilong lotuim Jehova. Paslain long CD na DVD i kamap, mi save lusim planti aua long ritim ol buk na nius bilong yumi long Gary na Louise. Tasol long nau i gat ol CD, DVD, na ol rekoding i stap long Web-sait bilong yumi, em www.ps8318.com, na dispela i helpim mipela olgeta long mekim Baibel stadi olsem sediul i makim long olgeta wik, na mipela i mekim long narapela narapela taim na mipela inap kamapim ol gutpela bekim long ol miting Kristen.
Mipela i tenkyu tru long ol gutpela tok em Jehova yet i kamapim na i stap long Baibel!
Gary i mas tingim gut ol tok em i laik bekim long miting, na sapos em i gat tok long mekim long Skul Tiokratik, em inap mekim long pasin bilong em yet long toktok. Long 1995, ol i makim em long mekim wok olsem kongrigesen sevan na oltaim em i bisi long Haus Kingdom, na welkamim ol bratasista na helpim long lukautim saun sistem.
Ol bratasista i save poromanim Gary long mekim wok autim tok na ol i save subim wilsia em i yusim, long wanem, em i gat sik atraitis. Wanpela brata i bin helpim em long mekim Baibel stadi wantaim wanpela man husat i gat laik long harim tok. Na tu, Gary i bin strongim gen wanpela sista husat i bin lusim wok autim tok inap 25 yia. Long nau, dispela man na meri em Gary i bin helpim ol, ol i wok long go long ol miting Kristen.
Taim Louise i gat 9-pela krismas, bubu meri na wanpela meri husat i save lukautim em, ol i skulim em long yusim tret na huk long samapim klos samting, na mi skulim em long yusim tret long samapim ol bilas long laplap. Louise i laikim tru wok bilong samapim ol samting, olsem na em i save samapim ol naispela blanket bilong givim long ol bebi na ol lapun long kongrigesen. Na tu, em i save yusim ol liklik piksa long wokim ol naispela kat bilong raitim tok long en. Ol narapela i save amamas tru taim ol i kisim ol dispela kat. Taim Louise i gat 13 krismas samting, em i lain long rait long kompiuta. Nau i gat wanpela spesel kompiuta we i gat masin bilong toktok, olsem na olgeta taim Louise i save salim e-mail long ol pren bilong em. Louise i kisim baptais taim em i gat 17 krismas. Long taim bilong mekim ol bikpela wok autim tok, mitupela i save amamas long poroman wantaim long mekim wok painia haptaim. Olsem Gary, Louise tu i putim ol skripsa long tingting bambai em inap kamapim bilip bilong em long ol tok promis bilong God long wanpela taim bai kamap na “ol aipas bai ol i lukluk” na “i no gat man . . . bai i tok olsem, ‘Mi gat sik.’”—Ais. 33:24; 35:5.
Mipela i tenkyu tru long ol gutpela tok em Jehova yet i kamapim na i stap long Baibel! Mipela i tenkyu tru long kongrigesen, long wanem, ol i givim bikpela helpim long mipela na mipela inap mekim planti samting. Na moa yet, Jehova i helpim mipela, olsem na laip bilong mipela i gat as tru bilong en.
a Dispela nem, Laurence-Moon-Bardet-Biedl syndrome, em nem ol i kolim long wanpela sik bihain long 4-pela dokta i mekim wok painimaut na luksave long dispela sik em ol pikinini i save kisim long papamama. Long nau ol i kolim dispela sik olsem Bardet-Biedl syndrome.
