INAP olsem 10-pela yia i go pinis, Gregorio na Marilou, em tupela marit husat i winim pinis 30 krismas, ol i mekim wok painia long biktaun Manila, na tu, ol i mekim wok mani. I hatwok, tasol ol i mekim gut wok bilong ol. Bihain, Marilou i kisim namba na kamap maneja long benk em i wok long en. Marilou i tok: “Gutpela wok mani bilong mipela i helpim mipela long kisim gutpela sindaun tru.” Dispela tupela marit i gat planti mani na gutpela sindaun, olsem na tupela i tingting long wokim haus long wanpela naispela hap we i stap olsem 19 kilomita long hap is bilong Manila. Ol i mekim kontrak wantaim wanpela kampani long wokim haus bilong ol, na ol i pasim tok olsem insait long 10-pela yia, ol bai peim dispela kampani long olgeta wan wan mun.

Marilou i tok: “Nupela wok i pulim bikpela haptaim na strong bilong mi, olsem na mi no givim bel moa long mekim wok lotu. Mi pilim olsem mi stilim ol samting bilong Jehova.” Em i tok: “Mi no givim Jehova dispela haptaim mi bin makim long mekim wok bilong em.” Gregorio na Marilou i no amamas long laip bilong ol, olsem na wanpela taim ol i sindaun na toktok long dispela samting. Gregorio i tok: “Mipela i laik mekim ol  senis, tasol mipela i no save long wanem samting stret mipela i mas mekim. Mipela i no gat pikinini, olsem na mipela i stori long olsem wanem mipela inap mekim bikpela wok moa long wok bilong Jehova. Mipela i beten askim Jehova long stiaim mipela.”

Long dispela taim, tupela i harim sampela tok i kamap long ol miting na i kirapim ol pablisa long i go helpim wok long ol hap we i sot tru long ol man bilong autim tok bilong Kingdom. Gregorio i tok: “Mipela i pilim olsem ol dispela tok i olsem bekim bilong Jehova long ol beten bilong mipela.” Dispela tupela marit i beten askim God long strongim bilip bilong ol na bai ol inap strongim bel na mekim gutpela disisen. Wanpela bikpela samting we i pasim ol em projek bilong wokim haus. Mani ol i peim pinis long kampani em inap long skel bilong 3-pela yia. Orait nau ol bai mekim wanem? Marilou i tok: “Sapos mipela i stopim dispela kontrak, bikpela mani mipela i bin peim pinis bai lus nating. Tasol mipela i luksave olsem disisen bilong mipela bai soim olsem mipela i putim laik bilong Jehova o laik bilong mipela yet i stap namba 1.” Tupela i tingim tok bilong aposel Pol olsem ol i mas “orait long olgeta samting i lus,” olsem na ol i stopim projek bilong haus, lusim wok mani, salim planti kago bilong ol, na ol i go sindaun long ailan Palawan we i stap longwe olsem 480 kilomita long hap saut bilong Manila.—Fili. 3:8.

Paslain long Gregorio na Marilou i go, ol i redim tingting bilong ol long holim liklik kago inap long skel bilong ol. Tasol taim ol i go kamap long hap ol bai stap long en, long dispela taim ol i luksave long sindaun bilong ol bai wanem kain. Marilou i tok: “Mi kirap nogut. I no gat pawa, na i no gat ol samting bilong helpim sindaun bilong mipela. Mipela i no yusim rais kuka, nogat, mipela i katim paiawut na kuk long paia. Mi misim pasin bilong i go raun long ol bikpela stua na kaikai long ol restron, na ol narapela samting i stap long siti.” Dispela tupela marit i kirapim ol yet long tingim gen risen bilong ol long i go sindaun long dispela hap, na i no longtaim ol i lain long nupela sindaun bilong ol. Marilou i tok: “Nau mi save amamas long lukim ol gutpela samting God i bin wokim, olsem ol sta long ples antap. Na moa yet, mi amamas long lukim pes bilong ol man i lait taim mipela i autim tok long ol. Taim mipela i kam mekim wok long dispela hap, mipela i ‘lain pinis’ long yusim ol samting mipela i gat pinis.”—Fili. 4:12.

Gregorio i tok: “Taim mipela i kam kamap long dispela hap, i bin i gat 4-pela Witnes tasol. Ol i amamas tru taim mi mekim pablik tok long olgeta wan wan wik, na pilaim gita taim ol i singim ol song bilong Kingdom.” Insait long 1-pela yia tasol, dispela tupela marit i lukim dispela liklik grup i kamap kongrigesen i gat 24 pablisa long en. Gregorio i tok: “Mipela i pilim tru pasin laikim bilong dispela kongrigesen.” Long nau, taim ol i tingim bek 6-pela yia ol i bin stap na mekim wok long dispela longwe ples, ol i tok: “Amamas mipela i kisim long lukim ol man i kam insait long kongrigesen, dispela i winim tru amamas mipela i kisim long olgeta narapela  samting. Nau mipela i pilim tru olsem laip bilong mipela i gat as tru bilong en.”

Long Filipins, klostu olsem 3,000 bratasista i go sindaun long ol hap we ol i sot long ol pablisa bilong autim tok bilong Kingdom. Inap olsem 500 bilong dispela lain em ol singel sista. Wanpela bilong ol em Karen.

Karen, nau em i gat 25 krismas samting, em i kamap bikpela long taun Baggao, Cagayan. Taim em i stap tineja yet, oltaim em i save tingting long mekim bikpela wok moa bilong autim tok. Em i tok: “Mi save olsem i gat sotpela haptaim tasol, na olgeta kain man i mas harim tok bilong Kingdom, olsem na mi laik autim tok long ol hap we i sot long ol man bilong autim tok.” Sampela wanblut bilong Karen i kirapim em long kisim bikpela skul na ol i no laik bai em i go stap long wanpela longwe ples na autim tok long hap, tasol Karen i beten askim Jehova long stiaim em. Na tu, em i toktok wantaim ol lain husat i mekim wok long ol longwe ples. Taim em i gat 18 krismas, em i go sindaun long wanpela ples we i stap olsem 64 kilomita longwe long asples bilong em.

Karen i go helpim kongrigesen we i mekim wok autim tok long ol ples maunten i stap klostu long Pasifik Kos. Karen i tok: “Taim mipela i laik lusim Baggao na i go long nupela kongrigesen, mipela i bin wokabaut inap 3-pela de, go antap na go daun long ol maunten, na brukim ol wara winim 30 taim.” Em i tok moa olsem: “Mi save wokabaut inap 6-pela aua bilong i go lukim sampela Baibel sumatin, na mi save slip long haus bilong sumatin, na long neks de mi save wokabaut 6-pela aua gen bilong i go bek long haus bilong mi.” Olsem wanem? Hatwok bilong em i lus nating? Karen i smail wantaim na tok: “Sampela taim lek bilong mi i save pen, tasol mi bin lukautim inap 18 Baibel stadi. Mi bin ‘traim na lukim olsem God i gutpela tru’!”—Sng. 34:8.

Wanem samting i kirapim Sukhi, em wanpela singel sista i gat 40 krismas samting, long lusim Amerika na i go sindaun long Filipins? Long 2011, em i go long wanpela kibung sekit, na long dispela taim ol i mekim intaviu long tupela marit. Ol i tok ol i bin salim klostu olgeta kago bilong ol na ol i go sindaun long Meksiko bilong helpim wok bilong autim tok. Sukhi i tok: “Dispela intaviu i kirapim mi long tingim ol mak em bipo mi no bin tingting long winim.” Lain tumbuna bilong Sukhi i kam long India, olsem na taim em i harim olsem sampela lain Punjabi i stap long Filipins na i gat wok long helpim ol, em i wokim disisen long i go na helpim ol. Olsem wanem? I gat sampela samting we inap pasim em?

Sukhi i tok: “I hatwok long skelim wanem ol samting mi bai salim na wanem ol samting mi no inap salim. Na tu, inap 13 yia mi bin stap long haus bilong mi yet, tasol nau mi mas stap wantaim wanpela famili long haus we i no gutpela tumas. I hatwok, tasol dispela em gutpela rot long redim mi yet long abrusim pasin bilong bungim planti mani kago.” Taim em i go sindaun long  Filipins, wanem ol samting i putim hevi long em? Em i tok: “Ol samting we i putim bikpela hevi tru long mi em olsem, mi pret nogut tru long ol liklik snek na binatang, na mi wari long famili na ples bilong mi. Dispela i kirapim mi long i go klostu moa long Jehova!” Tasol wanem gutpela samting i kamap? Sukhi i smail na tok: “Jehova i tokim yumi olsem, ‘Yupela i mekim olsem na bai mi ken givim planti gutpela samting long yupela.’ Mi pilim tru dispela tok taim ol lain mi bungim long haus i askim mi olsem, ‘Wanem taim bai yu kam bek gen? Mi gat planti askim.’ Mi kisim bikpela amamas olsem mi inap helpim ol manmeri husat i hangre long kisim save long tok i tru!” (Mal. 3:10) Sukhi i tok moa olsem: “I hatwok tru long mi mekim disisen long i go sindaun long narapela ples. Tasol taim mi mekim pinis dispela disisen, mi luksave olsem Jehova i lukautim mi long olgeta narapela samting.”

Sime, em brata husat i marit pinis na em i gat 38 krismas samting, em i lusim Filipins na i go bilong kisim wanpela gutpela wok mani long Midel Is. Taim Sime i stap long hap, tok bilong wasman sekit na tok bilong wanpela memba bilong Gavening Bodi i kirapim em long putim Jehova i stap namba 1 long laip bilong em. Sime i tok: “Mi laik lusim wok mani, tasol mi tingting planti.” Maski i olsem, em i lusim wok mani na i go bek long Filipins. Long nau, Sime na meri bilong em, Haidee, i mekim wok long taun Davao del Sur, long bikpela teritori long hap saut bilong kantri we ol i nidim ol man bilong autim tok bilong Kingdom. Sime i tok: “Taim mi tingim bek samting mi mekim, mi amamas tru olsem mi daunim pret bilong lusim wok mani na mi putim Jehova i stap namba 1. Taim yu yusim ol nambawan gutpela samting bilong yu long mekim wok bilong Jehova, amamas yu kisim bai winim tru amamas bilong olgeta narapela samting!”

Ramilo na Juliet em tupela marit i gat 30 krismas samting na ol i mekim wok painia. Taim tupela i harim olsem wanpela kongrigesen i stap 30 kilomita longwe long ples bilong ol i nidim helpim, ol i volantia long i go helpim ol. Long olgeta wan wan wik, maski em taim bilong san o taim bilong ren, Ramilo na Juliet i save yusim motobaik long i go i kam planti taim liklik long ol miting na wok autim tok. Ol i bihainim ol rot i no gutpela na ol bris ol i wokim long rop, na dispela i givim bikpela hatwok long ol, tasol ol i amamas olsem ol i mekim bikpela wok moa long autim tok. Ramilo i tok: “Mitupela meri bilong mi i lukautim 11-pela Baibel stadi! Mipela i bin lusim sampela samting bilong mipela yet long i go autim tok long ol hap we ol i sot long ol man bilong autim tok, tasol dispela i givim bikpela amamas tru long mipela!”—1 Kor. 15:58.

Olsem wanem? Yu laik kisim sampela save moa long ol hap we ol i sot long ol man bilong autim tok bilong Kingdom long kantri bilong yu o long narapela kantri? Sapos olsem, orait toktok wantaim wasman sekit bilong yu, na ritim atikol “Inap Yu ‘Kam Long Masedonia’?” long Wok Kingdom Bilong Yumi bilong Ogas 2011.