1, 2. (a) Wanem samting i kamap na hevi inap painim Moses? (Lukim piksa long kirap bilong stadi.) (b) Bilong wanem Moses i no pret long king i belhat?

 OL ISIP i tingim Fero olsem strongpela king na god i gat laip. Wanpela buk (When Egypt Ruled the East) i tok, ol Isip i tingim Fero olsem man “i gat bikpela savetingting na strong winim olgeta narapela samting i gat laip.” Fero i laik bai lain bilong em i pret long em, olsem na hat king bilong em i gat imis bilong snek kobra we i luk olsem i redi long kaikai man. King i laik bai ol man i save olsem sapos wanpela man i laik birua long em, kwiktaim em bai kilim i dai dispela birua. Tingim Moses, em i bin pilim olsem wanem taim Jehova i tok: “Bai mi salim yu i go long king bilong Isip bai king i ken larim yu i bringim ol manmeri bilong mi, ol Israel, i lusim Isip na i kam.”—Kis. 3:10.

² Moses i go long Isip na autim tok bilong God, na Fero i belhat. Bihain long 9-pela bikpela hevi i painim lain Isip, Fero i tok lukaut long Moses olsem: “Yu no ken lukim mi gen. Sapos yu kam lukim mi, wantu bai mi kilim yu i dai.” (Kis. 10:28) Paslain long Moses i lusim Fero, em i tok profet olsem fesbon pikinini man bilong king bai i dai.  (Kis. 11:4-8) Bihain, Moses i tokim olgeta famili bilong lain Israel long kilim wanpela meme o sipsip man, na penim blut bilong en long ol pos bilong dua bilong haus—sipsip man em samting holi long ai bilong ol man i lotuim god Ra bilong Isip. (Kis. 12:5-7) Fero bai mekim wanem? Moses i no pret. Em i bilip na bihainim tok bilong Jehova “na em i no pret long king bai belhat long em. Em i sanap strong i stap, na i olsem em i lukim dispela Man em ol man i no inap lukim long ai.”—Ritim Hibru 11:27, 28.

3. Moses i bilip long “dispela Man em ol man i no inap lukim long ai,” na dispela i kamapim wanem ol askim?

³ Olsem wanem? Bilip bilong yu i strong tru na i olsem yu inap “lukim God”? (Mat. 5:8) Yumi ken skelim pasin bilong Moses, na dispela bai strongim bilip bilong yumi na yumi tu inap lukim “dispela Man em ol man i no inap lukim long ai.” Moses i bilip long Jehova, na olsem wanem dispela i strongim em na em i no pret long ol man? Olsem wanem em i soim olsem em i bilip long ol tok promis bilong God? Moses inap lukim “dispela Man em ol man i no inap lukim long ai,” na olsem wanem dispela i strongim em taim bikpela hevi i laik painim em na lain bilong em?

4. Long tingting bilong ol man, Moses i gat wanem namba long ai bilong Fero?

⁴ Long tingting bilong ol man, Fero i gat bikpela strong na namba winim Moses. I luk olsem Fero i gat strong long pinisim laip bilong Moses. Moses yet i askim Jehova: “Mi wanem kain man na bai mi inap i go long king bilong Isip na kisim ol Israel na bringim ol i kam lusim Isip?” (Kis. 3:11) Paslain long dispela, Moses i lusim Isip na stap ranaweman inap olsem 40 yia. Ating em i tingting olsem, ‘Em gutpela long mi go bek long Isip na mekim king i belhat, o nogat?’

5, 6. Wanem samting i helpim Moses long pret long Jehova na em i no pret long Fero?

⁵ Paslain long Moses i go bek long Isip, God i skulim em long bikpela stiatok we em i raitim long Buk Jop, olsem: “Man i save aninit long mi, Bikpela, . . . dispela man i gat gutpela tingting na save.” (Jop 28:28) Jehova i laik helpim Moses long kisim pasin bilong pret long em na bihainim savetingting, olsem na em i kirapim Moses long luksave olsem God i gat bikpela strong moa winim ol man. God i askim olsem: “Husat i save givim maus long ol manmeri? Husat i save mekim man i yaupas o mauspas? Na husat i save mekim ai i lukluk o mekim man i aipas? Mi Bikpela tasol, mi save mekim olsem.”—Kis. 4:11.

⁶ Dispela i givim wanem skul long Moses? I no gat wok long Moses i pret. Jehova i salim Moses, na Em bai strongim Moses long bringim tok bilong Em i go long Fero. Na tu, Jehova i gat bikpela strong na namba winim Fero. Dispela em i no namba 1 taim we lain bilong God i kisim hevi long han bilong ol Isip, nogat. Ating Moses i tingim ol samting Jehova i bin mekim bilong lukautim em, na Abraham na Josep, long taim ol narapela man i mekim wok king olsem Fero. (Stt. 12:17-19; 41:14, 39-41; Kis. 1:22–2:10) Moses i bilip long Jehova, em “dispela Man em ol man i no inap lukim long ai,” olsem na Moses i strongim bel na em i go lukim Fero na autim olgeta tok Jehova i tokim em long autim.

7. Wanpela sista i bilip long Jehova, na olsem wanem dispela i lukautim em?

⁷ Pasin bilong bilip long Jehova i helpim Ella, em wanpela sista, na em i no pret long ol man. Long 1949, lain KGB, em ol polis bilong Soviet Yunion bilong bipo, ol i arestim Ella long Estonia, rausim olgeta klos bilong em, na ol yangpela ofisa i lukluk strong long em long pasin i no stret. Ella i tok, “Mi pilim sem pipia olgeta. Tasol taim mi beten pinis long Jehova, mi kisim bel isi.” Bihain, ol i putim Ella i stap wanpis long kalabus inap 3-pela de. Em i tok: “Ol ofisa i singaut na tok: ‘Mipela bai mekim na ol man long Estonia i no inap tingim gen dispela nem Jehova! Yu bai go long banis kalabus nogut na ol narapela bai go long Saibiria!’ Ol i tok bilas na tok moa olsem, ‘God bilong yu Jehova i stap we?’” Yu ting Ella bai pret long ol man, o em bai trastim  Jehova? Taim ol ofisa i kwestenim em, em i tok: “Mi skelim gut dispela samting, na mi laik stap long kalabus na pas gut yet wantaim God, na mi no laik lusim kalabus na God bai i no orait moa long mi.” Ella i tingim Jehova olsem Man i stap tru, wankain olsem ol man i sanap long ai bilong em. Em i bilip long God, olsem na em i stap gut long Em.

8, 9. (a) Yumi mas mekim wanem bilong daunim pasin bilong pret long ol man? (b) Sapos yu pret long ol man, orait oltaim yu mas tingim husat?

⁸ Pasin bilong bilip long Jehova bai helpim yu long daunim pret. Sapos ol man i gat bikpela namba i laik pasim yu long lotuim God, ating bai i luk olsem ol man bilong graun i gat strong long stiaim laip na sindaun bilong yu, na ol samting bai painim yu long bihain. Ating yu bai tingting olsem i gutpela yu lusim wok bilong Jehova na bai ol hetman i no ken belhat long yu. Tasol tingim: Yu mas bilip long God na dispela bai helpim yu long daunim pasin bilong pret long ol man. (Ritim Sindaun 29:25.) Jehova i tok: “Bilong wanem yupela i save pret long ol arapela man? Ol i no gat strong. Olgeta man bai i dai na pinis hariap olsem gras.”—Ais. 51:12, 13.

⁹ Yu mas tingim Papa bilong yu, em Man i gat olgeta strong. Em i save lukim, sori, na helpim ol man i karim pen na hevi long han bilong ol bosman nogut. (Kis. 3:7-10) Sapos yu sanap long ai bilong ol man i gat bikpela namba na yu mas sambai long bilip bilong yu, orait “no ken tingting planti long wanem tok [yu] bai autim. Long wanem, long dispela taim stret [yu] bai kisim tok [yu] bai autim.” (Mat. 10:18-20) Jehova i gat bikpela strong na namba winim ol hetman bilong dispela graun na ol bikman bilong gavman. Taim yu strongim bilip bilong yu long nau, yu inap tingim Jehova olsem Man i stap tru na em i laik helpim yu.

10. (a) Long mun Nisan, 1513 B.C.E., Jehova i tokim lain Israel long mekim wanem? (b) Bilong wanem Moses i bihainim tok bilong God?

¹⁰ Long mun Nisan, 1513 B.C.E., Jehova i tokim Moses na Aron long toksave long lain Israel long mekim samting em ol i no bin mekim long bipo: Makim wanpela gutpela sipsip man o meme, kilim, na kisim blut bilong en na penim long ol pos bilong dua bilong haus. (Kis. 12:3-7) Moses i mekim wanem? Aposel Pol i tok: “Moses i bilip, olsem na em i mekim pasova na putim blut long dua bilong haus. Em i mekim olsem bai ensel bilong God i no ken kilim ol fesbon pikinini long lain bilong God.” (Hib. 11:28) Moses i save olsem olgeta tok bilong Jehova bai kamap tru, na em i bilip long tok promis bilong Jehova long kilim i dai ol fesbon pikinini man bilong Isip.

11. Bilong wanem Moses i givim toksave long ol narapela?

¹¹ Ol pikinini man bilong Moses i stap long Midian, longwe long ensel em God i salim i go bilong kilim ol fesbon pikinini man bilong ol Isip. (Kis. 18:1-6) Tasol Moses i bihainim tok na toksave long ol narapela famili bilong lain Israel. Laip bilong fesbon pikinini man bilong ol inap lus, na Moses i laikim tru ol wantok bilong em. Baibel i tok: “Moses i singautim olgeta hetman bilong Israel i kam na i tokim ol olsem, . . . ‘kilim [wanpela yangpela sipsip o meme] bilong makim dispela De God I Larim yupela Israel I Stap Gut.’”—Kis. 12:21.

12. Jehova i tokim yumi long autim wanem bikpela tok?

¹² Ol ensel i stiaim lain bilong Jehova long autim bikpela tok, olsem: “Yupela i mas pret long God na givim glori long em, long wanem, taim bilong em long mekim wok jas i kamap pinis, olsem na yupela i mas lotuim dispela Man husat i wokim skai na graun na solwara na ol hulwara.” (Rev. 14:7) Nau em taim bilong autim dispela tok. Yumi mas tok lukaut long ol manmeri long lusim Bikpela Babilon na bai ol i no ken “kisim hap bilong ol pe nogut bilong en.” (Rev. 18:4) “Ol arapela sipsip” i bung wantaim ol Kristen God i bin makim na ol i kirapim ol man husat i stap longwe long God long “kamap wanbel” wantaim em.—Jon 10:16; 2 Kor. 5:20.

13. Yumi mas mekim wanem bilong strongim laik bilong yumi long autim gutnius?

 ¹³ Yumi bilip olsem “taim bilong [God] long mekim wok jas i kamap pinis.” Jehova i tok, taim i sot na yumi mas wok strong long autim tok na kamapim ol disaipel, na yumi bilip olsem dispela i no wanpela tok nating. Long visen, aposel Jon i “lukim 4-pela ensel i sanap i stap long 4-pela kona bilong graun. Ol i holim strong 4-pela win bilong graun.” (Rev. 7:1) Olsem wanem? Yu bilip, na long tingting yu inap lukim ol dispela ensel i redi long lusim ol strongpela win bilong traipela hevi tru we bai painim ol man bilong dispela graun? Sapos yu mekim olsem, bilip bilong yu bai kamap strong moa na yu bai autim gutnius.

14. Wanem samting bai kirapim yumi long “tokim [man i mekim pasin nogut] long senisim tingting na pasin bilong em”?

¹⁴ Ol Kristen tru i stap pren bilong Jehova na ol i bilip na wet long kisim laip oltaim. Tasol yumi luksave olsem yumi gat wok long “tokim [man i mekim pasin nogut] long senisim tingting na pasin bilong em na bai em i no ken lus.” (Ritim Esekiel 3:17-19.) Yumi autim tok, long wanem, yumi laikim Jehova na ol arapela man, na i no olsem yumi tingting tasol long abrusim asua bilong blut. Tok piksa bilong Jisas long gutpela man Samaria i skulim yumi long pasin em man bai mekim sapos em i gat pasin laikim na pasin marimari. Yumi ken askim yumi yet olsem, ‘Mi bihainim pasin bilong man Samaria long “sori tru” long ol man na autim tok long ol?’ Yumi no laik tru long bihainim pasin bilong pris na Livai long givim eskius na bihainim “hapsait bilong rot na wokabaut i go.” (Luk 10:25-37) Sapos yumi bilip long ol tok promis bilong God na laikim tru ol arapela, dispela bai kirapim yumi long insait tru long autim tok paslain long haptaim bilong nau i pinis.

15. Bilong wanem lain Israel i pilim olsem ol i no gat rot bilong abrusim bagarap?

¹⁵ Moses i bilip long “dispela Man em ol man i no inap lukim long ai,” na dispela i helpim em taim bagarap i laik painim lain Israel bihain long ol i lusim Isip. Baibel i tok: “Ol ami bilong [Isip] i kam klostu pinis na ol Israel i lukim ol. Na ol i pret nogut tru na ol i singaut long Bikpela long helpim ol.” (Kis. 14:10-12) Yu ting lain Israel i kirap nogut long lukim olsem hevi i laik painim ol? Nogat. Jehova i bin tok: “Mi bai mekim king i bikhet, na em bai i ranim yupela. Tasol bai mi winim em wantaim ami bilong en na bai mi kisim biknem long dispela samting mi mekim. Na ol Isip bai i save olsem, mi yet mi Bikpela.” (Kis. 14:4) Lain Israel i tingim tasol ol samting ol inap lukim long ai—solwara Retsi i stap long fran, ami bilong Fero na ol karis bilong em i spit i kam long baksait, na wasman i gat 80 krismas i stap lida bilong ol! Ol i pilim olsem ol i no gat rot bilong abrusim bagarap.

16. Olsem wanem bilip i strongim Moses taim em i stap long solwara Retsi?

¹⁶ Tasol Moses i no pret na surik. Em i bilip na long tingting em inap lukim samting i gat bikpela strong moa winim solwara na lain ami. Em inap “lukim olgeta samting Bikpela i laik mekim bilong helpim [ol],” na em i save olsem Jehova bai sambai long lain Israel. (Ritim Kisim Bek 14:13, 14.) Bilip bilong Moses i strongim lain bilong God. Baibel i tok: “Ol i bilip, olsem na ol i brukim solwara Retsi olsem ol i wokabaut long graun i drai. Tasol taim ol Isip i laik brukim solwara Retsi, wara i karamapim ol na ol i dai.” (Hib. 11:29) Kirap long dispela taim, “ol manmeri bilong Israel i pret na i stap aninit long Bikpela, na ol i bilip long em na long wokman bilong en, Moses.”—Kis. 14:31.

17. Wanem samting bai kamap na traim bilip bilong yumi?

¹⁷ Klostu nau, ol samting bai kamap na i luk olsem bikpela hevi bai painim yumi. Namel long haptaim bilong traipela hevi tru, ol gavman bilong graun bai mekim pinis wok bilong bagarapim na pinisim ol lotu we i bikpela moa winim yumi. (Rev. 17:16) Yumi bai stap olsem lain i no gat helpim. Jehova i tok, yumi bai stap olsem lain em “taun bilong ol i no gat banis i raunim ol.” (Ese. 38:10-12, 14-16) Sapos yumi tingim tasol ol samting yumi lukim long ai, yumi bai ting olsem yumi no gat helpim na bagarap bai painim yumi. Yu bai mekim wanem long dispela taim?

18. Stori long ol samting we inap helpim yumi long sanap strong long taim bilong traipela hevi tru.

¹⁸ Yumi no ken pret na surik. Jehova i tok pinis olsem ol birua bai pait long ol manmeri bilong Em. Em i tok tu olsem: “Mi God, Bikpela, mi tok olsem. Taim King Gok i kam pait long graun bilong Israel, bai mi belhat nogut tru. Na belhat bilong mi bai i kamap bikpela tru.” (Ese. 38:18-23) God bai bagarapim olgeta lain husat i laik bagarapim lain bilong Em. Sapos yu bilip olsem Jehova bai lukautim yu long “De bilong Bikpela,” dispela bai helpim yu long stap gut yet long God na lukim em i “kisim bek” yu.—Jol. 2:31, 32.

19. (a) Stori long pasin pren i stap namel long Jehova na Moses. (b) Sapos yu tingim Jehova “long olgeta samting yu mekim,” bai yu kisim wanem blesing?

¹⁹ Long nau, yu mas wok yet long “sanap strong i stap, na i olsem [yu] lukim dispela Man em ol man i no inap lukim long ai,” na long dispela rot yu redim yu yet long ol bikpela samting bai kamap! Strongim pasin pren bilong yu wantaim God Jehova long rot bilong stadi na beten oltaim. Moses i pas gut tru wantaim Jehova na Jehova i yusim em long mekim ol strongpela wok, olsem na Baibel i tok Jehova i save “toktok wantaim Moses olsem tupela man i save toktok.” (Lo 34:10) Moses em i wanpela strongpela profet. Sapos yu bilip, yu inap save gut long Jehova, wankain olsem yu inap lukim em long ai. Baibel i kirapim yu long tingim God “long olgeta samting yu mekim,” na taim yu mekim olsem, “em bai i soim yu stretpela rot long bihainim.”—Snd. 3:6.