1. Long tingting, yumi inap piksaim ol samting yumi no lukim long ai, na olsem wanem dispela i helpim yumi? (Lukim piksa long kirap bilong stadi.)

 GOD i givim wanpela presen long yumi. Long tingting, yumi inap piksaim ol samting yumi no lukim long ai tru bilong yumi. Dispela presen i helpim yumi long mekim ol gutpela disisen na putim tingting i go long ol gutpela samting bai kamap bihain. Jehova inap lukim ol samting bai kamap bihain, na em i yusim Baibel long tokim yumi long ol dispela samting. Yumi inap piksaim ol samting bai kamap bihain. Dispela i helpim yumi long kisim pasin bilong bilip.—2 Kor. 4:18.

2, 3. (a) Bilong wanem em i bikpela samting long piksaim ol tok we i stap olsem as tru bilong samting yumi bilip na wet long en? (b) Yumi bai skelim wanem ol askim long dispela stadi?

² Sampela taim, samting yumi piksaim long tingting em samting i no inap kamap. Sapos wanpela liklik gel i piksaim em yet i sindaun long baksait bilong bataflai, dispela i olsem wanpela tingting nating. Tasol taim Hana i tingim tingim samting bai kamap taim em i bringim Samuel i go mekim wok long haus lotu sel, dispela em samting tru bai kamap na i gat as bilong en. Hana yet i mekim disisen long bringim Samuel i go wok long haus lotu sel, olsem na em i putim  tingting olgeta i go long dispela samting. (1 Sml. 1:22) Sapos yumi piksaim ol samting God i tok promis long mekim, dispela i makim olsem yumi putim tingting i go long ol samting bai kamap tru.—2 Pita 1:19-21.

³ Planti bilipman long bipo tu i piksaim ol blesing em God i tok promis long kamapim. Taim ol i piksaim ol dispela blesing, olsem wanem dispela i helpim ol? God i tok promis long givim blesing long ol manmeri i bihainim tok. Taim yumi tingim tingim ol dispela blesing, hau bai dispela i helpim yumi?

4. Wanem samting i kirapim Abel long piksaim ol blesing bai kamap long bihain?

⁴ Abel em namba 1 bilipman. Yu ting em i piksaim truim bilong ol samting Jehova i tok promis long kamapim? Abel i no save long wanem ol samting bai kamap bilong truim tok em God i mekim long snek, olsem: “Mi bai kamapim pasin birua namel long yu na meri, na namel long pikinini bilong yu na pikinini bilong meri. Em bai krungutim het bilong yu, na yu bai kaikaim lek bilong em.” (Stt. 3:14, 15, NW) Tasol ating Abel i lusim bikpela haptaim long tingim tingim dispela tok promis, na em i luksave olsem snek bai “kaikaim lek” bilong wanpela man na dispela bai opim rot long ol manmeri inap kamap gutpela olgeta, wankain olsem Adam na Iv paslain long ol i mekim sin. Maski Abel i piksaim wanem blesing bai kamap bihain, em i tingim tok promis bilong God na dispela i kirapim em long bilip, olsem na Jehova i orait long ofa bilong em.—Ritim Stat 4:3-5; Hibru 11:4.

5. Enok inap piksaim ol blesing bai kamap long bihain, olsem na bilong wanem dispela i strongim em?

⁵ Enok i stap strong long bilip maski ol manmeri i tok bilas long God. Enok i tok profet olsem Jehova bai “kam wantaim bikpela lain ensel holi bilong en bilong skelim olgeta man. Na long kotim olgeta man i sakim tok bilong em, em bai kotim ol long olgeta pasin nogut ol i bin mekim. Na em bai kotim olgeta sinman i sakim tok bilong em, long wanem, ol i mekim ol tok nogut tru long em.” (Jut 14, 15) Enok i bilip, olsem na em inap piksaim wanpela haptaim bai kamap we olgeta manmeri bai bihainim ol pasin bilong God.—Ritim Hibru 11:5, 6.

6. Bihain long Bikpela Tait, ating Noa i tingim yet wanem samting?

⁶ Noa i bilip, olsem na em i abrusim bagarap bilong Bikpela Tait. (Hib. 11:7) Na tu, bilip i kirapim Noa long givim ol animal olsem ofa bihain long Bikpela Tait. (Stt. 8:20) Wankain olsem Abel i mekim, Noa tu i bilip olsem ol manmeri bai kamap fri long kalabus bilong sin na dai. Bihain long Bikpela Tait, Nimrot i mekim pasin we i no stret wantaim laik bilong Jehova, tasol Noa i stap strong yet long bilip. (Stt. 10:8-12) Ating em i amamas tru long tingim olsem ol man bai kamap fri long kalabus bilong sin na dai, na ol man nogut i no inap moa long bihainim hatpela pasin na mekim wok bos. Yumi tu inap piksaim dispela blesing, na klostu nau bai yumi lukim truim bilong en!—Rom 6:23.

7. Long tingting, Abraham, Aisak, na Jekop inap piksaim wanem ol samting?

⁷ Ating Abraham, Aisak, na Jekop inap piksaim ol gutpela samting bai kamap bihain, long wanem, God i tok promis olsem olgeta lain man bai kisim blesing long rot bilong pikinini i kamap long lain bilong ol. (Stt. 22:18; 26:4; 28:14) Ol tumbuna pikinini bilong ol dispela bilipman bai kamap planti na sindaun long Graun Bilong Promis em God i givim long ol. (Stt. 15:5-7) Long tingting, ol dispela bilipman inap piksaim olsem ol lain tumbuna pikinini bilong ol i kisim dispela graun. Kirap long taim Adam na Iv i mekim sin, Jehova i tokim ol gutpela wokman bilong em olsem ol bai kisim ol blesing em Adam na Iv i lus long kisim.

8. Wanem samting i helpim Abraham long soim olsem em i gat strongpela bilip?

 ⁸ Abraham inap piksaim ol samting God i tok promis long kamapim, na dispela i helpim em long mekim ol bikpela wok i soim olsem em i gat strongpela bilip. Baibel i soim olsem Abraham na ol narapela gutpela wokman bilong God “i no lukim truim bilong ol tok promis God i bin mekim long ol, tasol ol i luksave olsem truim bilong ol dispela tok promis bai kamap bihain na ol i amamas long ol.” (Ritim Hibru 11:8-13.) Planti samting i kamap long laip bilong Abraham na i helpim em long luksave olsem ol samting em i bilip na wet long en bai kamap tru, na i olsem em i lukim pinis ol samting we i no kamap yet!

9. Abraham i bilip long ol tok promis bilong God, na olsem wanem dispela i helpim em?

⁹ Abraham i bilip long ol tok promis bilong God, na dispela i strongim tingting bilong em long mekim laik bilong God. Olsem na em i lusim taun Ur, na em i no laik stap olgeta long ol taun bilong Kenan. Wankain olsem taun Ur, ol manmeri i no stap gut long ol taun bilong Kenan, long wanem, ol gavman bilong ol i no stap gut long ai bilong God. (Jos. 24:2) Long laip olgeta bilong Abraham, em “i wetim dispela taun i stap strong tru [na] God em man husat i bin sanapim na wokim dispela taun.” (Hib. 11:10) Abraham i piksaim em yet i stap long wanpela ples we Jehova yet i bosim. Abel, Enok, Noa, Abraham, na ol narapela bilipman i bilip olsem ol man i dai pinis bai kirap bek, na ol i putim tingting olgeta i go long laip ol bai kisim aninit long Kingdom Bilong God, em “taun i stap strong tru.” Taim ol i tingim ol dispela blesing, dispela i strongim bilip bilong ol long Jehova.—Ritim Hibru 11:15, 16.

10. Sara i tingim ol blesing bai kamap bihain, na olsem wanem dispela i helpim em?

¹⁰ Tingim Sara, em meri bilong Abraham. Taim em i gat 90 krismas na em i no gat pikinini yet, em i holim stretpela tingting long ol samting bai kamap bihain, olsem na em i mekim wok i soim olsem em i gat bilip. Em i lukim ol pikinini bilong em i amamas long ol blesing em Jehova i bin tok promis long givim. (Hib. 11:11, 12) Wanem samting i helpim em long holim dispela bilip? Jehova i bin tokim Abraham olsem: “Bai mi mekim gut long Sara, na bai em i karim wanpela pikinini man bilong yu. Bai mi mekim gut long Sara, na bai em i kamap tumbuna bilong planti lain manmeri, na sampela bai i kamap king.” (Stt. 17:16) Taim Sara i karim Aisak, dispela i strongim bilip bilong em na em inap piksaim truim bilong olgeta samting i insait long tok promis em God i bin mekim long Abraham. Yumi amamas tru olsem yumi tu i gat dispela presen bilong piksaim ol samting em God i bin tok promis long en, na ol dispela samting bai kamap tru!

11, 12. Olsem wanem Moses i kisim pasin bilong laikim tru Jehova?

¹¹ Moses tu i bilip long Jehova, na em i laikim tru God. Taim Moses i yangpela man yet na em i stap long haus king bilong Isip, em inap kisim pasin bilong laikim biknem na mani kago. Tasol ating papamama tru bilong Moses i skulim em long Jehova na tokim em olsem God i tingting pinis long kisim bek lain Israel long kalabus na bringim ol i go long Graun Bilong Promis. (Stt. 13:14, 15; Kis. 2:5-10) Sapos Moses i tingim tingim ol blesing em ol manmeri bilong God bai kisim long bihain, yu ting em bai kisim wanem kain tingting—em bai laik kisim biknem na namba o em bai laikim tru Jehova?

¹² Baibel i tok: “Moses i bilip, olsem na taim em i kamap bikpela pinis, em i no laik bai ol i kolim em olsem tumbuna pikinini bilong Fero. Em i wokim tingting olsem i gutpela long kisim hevi wantaim lain bilong God, na em i no laik bihainim pasin bilong sin na kisim amamas bilong sotpela taim tasol. Em i ting sem em i kisim  olsem Man em God i Makim, dispela i gutpela samting moa, winim ol samting i dia tumas bilong Isip. Em i tingting strong long gutpela pe em bai kisim.”—Hib. 11:24-26.

13. Moses i tingim tru ol samting God i tok promis long kamapim, na olsem wanem dispela i helpim em?

¹³ Taim Moses i tingim tingim tok promis bilong Jehova long kisim bek lain Israel, dispela i strongim bilip bilong em na em i laikim God moa yet. Wankain olsem ol arapela manmeri husat i lotuim God, ating Moses i piksaim wanpela haptaim we Jehova bai kisim bek ol manmeri long kalabus bilong dai. (Jop 14:13-15; Hib. 11:17-19) Olsem na Moses i laikim tru God, em Man husat i soim pasin sori long lain Israel na olgeta lain manmeri. Bilip na pasin laikim i stiaim ol samting Moses i mekim long laip olgeta bilong em. (Lo 6:4, 5) Taim Fero i tok long kilim Moses i dai, Moses i no pret na surik, nogat. Em i sanap strong, long wanem, em i gat pasin bilong bilip, laikim tru God, na em i piksaim ol gutpela samting bai kamap bihain.—Kis. 10:28, 29.

14. Ol man i holim wanem ol tingting kranki?

¹⁴ Planti manmeri long nau i no holim stretpela tingting long ol samting bai kamap bihain. Maski ol i no gat planti mani kago, ol i tingting long kamap maniman na kisim gutpela sindaun tru, tasol oltaim ol “i save hatwok na painim hevi.” (Sng. 90:10) Ol i piksaim olsem ol bai stap aninit long gavman bilong ol man, na i no gat wanpela samting bai mekim ol i pret na tingting planti. Tasol Baibel i tok Kingdom Bilong God tasol bai pinisim olgeta hevi bilong ol manmeri. (Dan. 2:44) Planti man i pilim olsem God i no inap bagarapim dispela haptaim nogut bilong nau, tasol Baibel i kamapim tok i narapela olgeta. (Sef. 1:18; 1 Jon 2:15-17) Ol manmeri husat i no save long samting em Jehova i tingting pinis long mekim, ol i holim ol tingting kranki we i olsem ol stori nating.

15. (a) Taim ol Kristen i piksaim ol samting ol i bilip na wet long en, olsem wanem dispela i helpim ol? (b) Stori long wanpela blesing yu laik tru long lukim truim bilong en.

¹⁵ Yumi ol Kristen i mas piksaim samting yumi bilip na wet long en na dispela bai strongim yumi, maski yumi bai kisim laip long heven o long graun. Olsem wanem? Yu inap piksaim yu yet i amamas long ol blesing em God i tok promis long kamapim? Taim yu tingim tingim ol samting yu bai mekim taim God i truim ol tok promis bilong em, dispela bai givim bikpela amamas long yu. Long ai bilong tingting, yu lukim yu yet i stap laip oltaim long graun. Tingim olsem yu wok bung wantaim ol narapela na mekim graun olgeta i kamap ples paradais. Ol manmeri i stap klostu long yu, ol tu i laikim Jehova. Yu gat gutpela helt, bikpela strong, na yu stap amamas. Ol man husat i go pas long wok bilong stretim ol samting long graun, ol i helpim yu long kisim gutpela sindaun, long wanem, ol i tingim yu. Yu amamas long yusim save na strong bilong yu, long wanem, olgeta samting yu mekim i helpim ol arapela na i givim biknem long God. Olsem: Yu helpim ol lain i kirap bek long kisim save long Jehova. (Jon 17:3; Apo. 24:15) Ol dispela samting i no olsem wanpela stori nating, nogat. Yumi amamas long piksaim ol dispela gutpela blesing, long wanem, Baibel yet i stori long ol dispela blesing.—Ais. 11:9; 25:8; 33:24; 35:5-7; 65:22.

16, 17. Taim yumi stori long ol samting yumi bilip na wet long en, olsem wanem dispela i helpim yumi?

¹⁶ Taim yumi toktok wantaim ol narapela Kristen na stori long ol samting yumi laik mekim taim Jehova i truim ol tok promis bilong em, yumi bai piksaim gut moa ol samting bai kamap bihain. Yumi olgeta i no save long wanem kain sindaun yumi bai kisim long nupela taim, tasol taim yumi stori long en, yumi strongim narapela  narapela na kamapim klia olsem yumi bilip tru long ol samting God i tok promis long en. Taim aposel Pol i visitim ol bratasista long Rom, ol ‘i strongim em na em i strongim ol,’ na yumi tu i mas strongim narapela narapela long dispela haptaim nogut bilong nau.—Rom 1:11, 12.

¹⁷ Taim yumi piksaim ol samting bai kamap long bihain, dispela bai helpim yumi long daunim pasin bilong holim tingting kranki long ol hevi i bungim yumi long nau. Ating aposel Pita i holim dispela kain tingting taim em i tokim Jisas olsem: “Harim! Mipela i lusim pinis olgeta samting na bihainim yu. Bai mipela i kisim wanem samting?” Jisas i laik helpim Pita na ol narapela disaipel long tingim ol samting bai kamap bihain, olsem na em i tok: “Mi tok tru long yupela: Long taim bilong wokim ol samting i kamap nupela, taim Pikinini bilong man i sindaun long sia king bilong en, yupela ol man i bin bihainim mi, yupela tu bai sindaun long 12-pela sia king, na stap olsem jas na skelim 12-pela lain bilong Israel. Na olgeta manmeri i bin tingim nem bilong mi na lusim haus o brata o susa o papa o mama o pikinini o graun, bai ol i kisim planti moa na ol bai kisim laip oltaim.” (Mat. 19:27-29) Tok bilong Jisas i helpim Pita na ol narapela disaipel na ol inap tingim wok ol bai mekim insait long gavman, na dispela gavman bai bosim graun na kamapim planti blesing bilong helpim ol manmeri husat i bihainim tok.

18. Taim yumi tingim truim bilong ol tok promis bilong God, olsem wanem dispela i helpim yumi long nau?

¹⁸ Taim ol wokman bilong Jehova long graun i tingim truim bilong ol tok promis bilong em, oltaim dispela i helpim ol. Abel i save gut long ol samting em God i tingting pinis long mekim, olsem na em inap piksaim ol gutpela samting bai kamap bihain, na em inap bilip na wet long en, na em inap kamapim klia bilip bilong em. Abraham i gat strongpela bilip, olsem na em i mekim sampela bikpela wok. Em inap “luksave” long ol blesing bai kamap taim God i truim tok profet bilong em long givim “pikinini” bilong promis. (Stt. 3:15, NW) Moses i bilip, na dispela i kirapim em long mekim ol bikpela wok, na pasin bilong em long laikim Jehova i kamap strong moa, olsem na em inap “tingting strong long gutpela pe em bai kisim.” (Hib. 11:26) Bilip bilong yumi yet na pasin bilong yumi long laikim God bai kamap strong moa taim yumi piksaim truim bilong ol samting Jehova i tok promis long kamapim. Long neks stadi, yumi bai stori long hau yumi inap yusim gut dispela presen bilong piksaim ol samting long tingting.