Taim yumi kisimgut save long pasin bilong wanpela, bai yumi save gut long em, na pasin pren bilong yumi inap kamap strong. Olsem tasol, taim yumi kisimgut save long ol pasin bilong Jehova, bai yumi save gut long em i husat, na pasin pren bilong yumi inap kamap strong. God i gat ol gutpela pasin, 4-pela bilong ol i stap klia tru: bikpela strong, savetingting, stretpela pasin, na pasin laikim.

“Nambawan Bikpela Jehova, yu putim han bilong yu i go aut na long bikpela strong bilong yu, yu bin wokim heven na graun.”—JEREMAIA 32:17.

Yumi lukim evidens bilong bikpela strong bilong God long ol samting em i wokim. Olsem, taim san i lait strong na yu sanap ausait, skin bilong yu i pilim olsem wanem? Yu pilim hat bilong san. Tru tumas, yu pilim samting i kamap long rot bilong strong bilong Jehova long wokim ol samting. Pawa bilong san i bikpela olsem wanem? Insait stret bilong san i hat tru, olsem 15,000,000 digri Selsias. Long olgeta wan wan seken, san i lusim bikpela pawa tru, i wankain olsem pawa bilong planti handret milion bom nuklia i pairap.

San i liklik tru taim yumi skelim wantaim planti milion sta long skai. Ol saientis i painimaut olsem wanpela bilong ol bikpela sta em ol i kolim UY Skuti, bikpela bilong en i klostu 1,700 taim moa winim san. Sapos UY Skuti i kisim ples bilong san, em bai karamapim graun na i go abrusim mak em planet Jupita i save raun. Ating dispela inap helpim yumi long kliagut long tok bilong Jeremaia olsem Jehova God i wokim yunives long bikpela strong bilong em.

 Hau bikpela strong bilong God i helpim yumi? Yumi kisim helpim long ol samting God i wokim, olsem san na olgeta gutpela samting i stap long graun. Na tu, God i save yusim bikpela strong bilong em long helpim yumi wan wan. Em i mekim olsem wanem? Long taim bilong ol aposel, God i givim strong long Jisas long wokim ol mirakel. Yumi ritim: “Ol aipas i lukluk gen, na ol lek nogut i wokabaut, na ol lepraman i kamap klin na ol yaupas i harim toktok, na ol man i dai pinis ol i kirap bek.” (Matyu 11:5) Olsem wanem long nau? Baibel i tok: “Em i save givim strong long man i taiet,” na “ol manmeri i bilip na wet long Jehova, ol bai kisim strong gen.” (Aisaia 40:29, 31) God inap givim “strong i winim strong bilong yumi ol man” na dispela bai helpim yumi long karim hevi na sanap strong long ol traim bilong laip. (2 Korin 4:7) Ating yu laik i go klostu long wanpela God i gat pasin laikim na i save yusim bikpela strong bilong em long helpim yumi, a?

“O Jehova, yu bin wokim planti samting! Yu gat savetingting na yu wokim olgeta dispela samting.”—BUK SONG 104:24.

Taim yumi wok long kisim sampela save moa long ol samting God i bin wokim, yumi bai kirap nogut long savetingting bilong em. Wanpela wok painimaut em ol i kolim baiomimetiks, o baiomimikrai, we ol saientis i save mekim wok painimaut long ol samting Jehova i wokim na kopim disain bilong ol dispela samting na bai ol inap yusim long mekim disain bilong ol yet i kamap gutpela. Ol i yusim ol dispela save long wokim ol liklik let bilong pasim su samting i go inap long ol bikpela samting olsem balus.

Yumi luksave long gutpela savetingting bilong God taim yumi lukim bodi bilong yumi ol man. Olsem, skelim hau wanpela bebi i kamap. Bebi i kamap long wanpela sel, spem i bungim kiau long bel bilong mama, dispela sel i karim olgeta infomesen long jin bilong bebi. Bihain dispela sel i bruk na kamapim planti sel i luk wankain. Tasol long taim bilong en stret, ol sel i senis na kamap narapela narapela kain, na dispela i kamapim planti handret sel, olsem sel bilong blut, ol sel bilong nev, na ol sel bilong bun. Bihain ol hap bilong bodi i kamap na stat long mekim wok. Insait long 9-pela mun tasol, dispela sel i kamap wanpela bebi i gat planti bilion sel. Savetingting bilong God long dispela kain samting i kirapim planti man long wanbel long tok bilong man bilong raitim Baibel, em i tok: “Mi litimapim nem bilong yu, long wanem, yu wokim mi i narakain tru na i nambawan tru.”—Buk Song 139:14.

Hau savetingting bilong God i helpim yumi? Krieta bilong yumi i save long ol samting yumi nidim bilong i stap amamas. God i gat bikpela savetingting, olsem na em i kamapim ol gutpela skultok long Baibel. Olsem, em i kirapim yumi long: “Wok yet . . . long fogivim narapela.” (Kolosi 3:13) Yu ting em gutpela skultok? Yes. Ol dokta i tok pasin bilong fogivim narapela inap mekim man i slip gut na dispela inap daunim tu presa bilong blut. Em inap daunim tu sik dipresen na ol narapela sik. God i olsem gutpela pren husat i wok yet long givim ol gutpela edvais bilong helpim yumi. (2 Timoti 3:16, 17) Yu laik gat dispela kain pren?

“Jehova i save laikim stretpela pasin.”—BUK SONG 37:28.

Oltaim God i save mekim stretpela pasin. Olsem na, “God i no inap tru long mekim pasin nogut, God i Gat Olgeta Strong i no inap mekim pasin i no stret. Nogat tru!” (Jop 34:10) Kot bilong Jehova i stret, man bilong raitim song i tok: “Yu bai skelim ol manmeri long stretpela pasin.” (Buk Song 67:4) “Jehova i save lukim bel bilong man,” olsem na man bilong tupela maus i no inap giamanim em, oltaim em i save lukim gutpela pasin bilong man na mekim stretpela kot. (1 Samuel 16:7) Na tu, God i lukim ol pasin i no stret na olgeta pasin korapsen, na em i promis olsem klostu “ol man nogut . . . bai raus olgeta long graun.”—Provep 2:22.

God i no hatpela jas husat i gat laik long panisim ol man. Em i kamapim pasin marimari taim i stret long mekim olsem. Baibel i tok: “Jehova i gat pasin marimari na pasin sori,” em i kamapim dispela pasin tu long ol man nogut sapos ol i tanim bel tru. Yu ting dispela i kamapim stretpela pasin?—Buk Song 103:8; 2 Pita 3:9.

Hau stretpela pasin bilong God i helpim yumi? Aposel Pita i tok: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.” (Aposel 10:34, 35) Yumi kisim helpim long stretpela pasin bilong God bikos em i no save mekim wansait pasin o laikim wanpela lain tasol. God bai laikim yumi na yumi inap kamap ol manmeri i lotuim em maski yumi bilong wanem lain, kantri, sindaun, na yumi kisim wanem ediukesen.

God i laik bai yumi kliagut na kisim helpim long stretpela pasin bilong em, olsem na em i givim yumi maus bilong bel. Baibel i stori long maus bilong bel olsem ‘lo i stap long bel bilong yumi,’ na i save ‘tokaut na i skelim’ olsem wanem pasin bilong yumi i stret o i no stret. (Rom 2:15) Hau dispela i helpim yumi? Taim yumi trenim gut maus bilong bel, dispela bai kirapim yumi long sakim ol pasin nogut na pasin i no stret. Na sapos yumi mekim wanpela rong, em inap kirapim yumi long tanim bel na stretim gen pasin bilong yumi. Tru tumas, taim yumi kliagut long stretpela pasin bilong God, dispela bai helpim yumi na yumi go klostu long em!

“God em i pasin laikim.”—1 JON 4:8.

God i soim bikpela strong, savetingting, na stretpela pasin, tasol Baibel i no tok God em bikpela strong, savetingting, o stretpela pasin. Baibel i tok em i pasin laikim. Bikpela strong bilong God i kamapim ol samting na stretpela pasin na savetingting bilong em i stiaim em. Tasol pasin laikim bilong Jehova i kirapim em long mekim olsem. Pasin laikim i stiaim olgeta samting em i mekim.

Jehova i no sot long wanpela samting, tasol pasin laikim i kirapim em long wokim ol ensel na ol manmeri, na ol inap kisim helpim long amamas na pasin laikim bilong em. Pasin laikim i kirapim God long wokim graun olsem wanpela naispela ples ol manmeri i ken stap long en. Na em i wok yet long soim pasin laikim long olgeta manmeri, olsem “em i save mekim san bilong en i kam antap long ol man nogut na ol gutpela man, na em i save mekim ren i kam daun long ol stretpela man na ol man i no mekim stretpela pasin.”—Matyu 5:45.

Na tu, “Jehova i gat pasin bilong sori tru na marimari.” (Jems 5:11) Em i save soim pasin sori long ol man husat i laik tru long save long em na i go klostu long em. God i tingim wan wan bilong ol dispela man. Yes, “God i save wari long [yu].”—1 Pita 5:7.

Hau pasin laikim bilong God i helpim yumi? Yumi amamas long gutpela kala bilong skai taim san i go daun. Yumi amamas long harim bebi i lap. Yumi tingim tru pasin laikim bilong wanfamili. Ating ol i no bikpela samting long laip, tasol ol i mekim na yumi stap amamas.

Narapela rot God i soim pasin laikim bilong em na yumi kisim helpim: beten. Baibel i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God.” Olsem gutpela papa, em i laik bai yumi askim em long helpim yumi long ol samting yumi tingting planti long en. Na pasin laikim bilong Jehova long olgeta man i mekim na em i promis long givim “dispela bel isi bilong God i winim tru tingting bilong man.”—Filipai 4:6, 7.

Dispela sotpela stori long ol bikpela pasin bilong God—olsem bikpela strong, savetingting, stretpela pasin, na pasin laikim—i helpim yu long save long God i gat wanem ol pasin? Bilong helpim yu long pilim moa yet ol gutpela pasin bilong God, mipela i invaitim yu long kisim save long ol samting God i mekim pinis na ol samting em bai mekim bilong helpim yu.