LUZIA I NO WOKABAUT GUT LONG LEFT LEK. Taim em i liklik, em i kisim sik polio, em sik i save bagarapim ol rop wailis bilong bodi. Taim Luzia i gat 16 krismas, bosmeri bilong em i tokim em, “God i panisim yu na yu paralais bikos yu no harim tok bilong mama bilong yu.” Sampela yia bihain, Luzia i tingim yet bikpela bel hevi em i kisim.

TAIM DAMARIS I SAVE OLSEM EM I GAT KENSA LONG KRU, papa bilong em i askim em: “Yu mekim wanem na yu kisim dispela sik? Ating yu mekim wanpela bikpela rong. Em risen na God i panisim yu.” Damaris i bel hevi tru long tok bilong papa.

Inap planti tausen yia, ol man i bilip olsem sik em panismen i kam long God. Buk Manners and Customs of Bible Lands i stori olsem long taim bilong Krais planti i bilip olsem “sin bilong man i kamapim sik, o ol pren bilong em, na em i kisim sik olsem panismen bilong sin.” Buk Medieval Medicine and the Plague i tok, namel long yia 500 na 1500 samting “sampela man i bilip olsem God i givim bikpela sik long ol bilong panisim ol long ol sin bilong ol.” So taim planti milion manmeri long Yurop i dai long ol bikpela sik long yia 1350 samting, yu ting God i kotim ol manmeri nogut na panisim ol? O ol dispela bikpela sik i kamap long ol binatang jem, olsem ol saveman bilong mekim wok painimaut i tok? Ating sampela bai ting, tru tru God i givim sik long ol man na bai ol i karim pen na hevi long ol sin bilong ol? *

TINGIM: Sapos sik na pen na hevi em ol panismen i kam long God, orait wai na Jisas i oraitim ol man husat i sik? Yu ting dispela bai daunim stretpela kot na stretpela pasin bilong God? (Matyu 4:23, 24) Jisas bai i no inap mekim ol samting i no stret wantaim laik bilong God. Em i tok: “Oltaim mi save mekim ol samting em i laikim,” na “mi bihainim tok Papa i bin givim mi.”—Jon 8:29; 14:31.

Baibel i tok: God Jehova “i no save giaman.” (Lo 32:4) Olsem, God bai i no inap kamapim bagarap long balus na kilim planti handret manmeri bikos em i laik panisim wanpela pasindia! Abraham em wokman bilong God, em i tok God i no inap “bagarapim ol gutpela man wantaim ol man nogut.” Abraham i tok, “em i no gutpela pasin.” Tok bilong Abraham i stret wantaim stretpela pasin bilong God. (Stat 18:23, 25) Baibel i tok tu olsem “God I Gat Olgeta Strong i no inap rongim wanpela man”; em i no save “mekim pasin nogut.”—Jop 34:10-12.

Ol pen na hevi yumi karim i no panismen i kam long God long wanpela sin stret yumi mekim. Jisas yet i save tru long dispela taim em na ol disaipel i lukim wanpela man husat i aipas taim em i bon. “Ol disaipel bilong en i askim em: ‘Rabai, husat i mekim sin na dispela man i aipas taim mama i karim em? Em yet o papamama bilong en?’ Jisas i bekim tok olsem: ‘Dispela man i no mekim sin na papamama bilong en tu ol i no mekim sin. Tasol dispela samting i kamap bai ol wok bilong God i ken kamap ples klia long rot bilong dispela man.’”—Jon 9:1-3.

Jisas i save long tingting kranki bilong ol disaipel, olsem na em i tok, dispela man na papamama bilong em i no mekim sin na em i kamap aipas. Ating ol disaipel i kirap nogut long dispela tok. Tru  Jisas i oraitim dispela man, tasol dispela i kamapim klia tu olsem God i no save givim pen na hevi bilong panisim yumi. Jisas i stretim bilip giaman bilong ol man. (Jon 9:6, 7) Ol man i karim bikpela hevi long helt long nau i ken kisim bel isi long save olsem God i no as bilong ol pen na hevi bilong ol.

Baibel i tokim yumi

• “Ol samting nogut i no inap traim God, na tu, God i no save traim man.” (JEMS 1:13) “Ol samting nogut” i givim hatwok long ol man inap planti yia, dispela i makim tu sik, pen, na dai, klostu olgeta bai pinis.

• Jisas Krais “i oraitim olgeta man i stap nogut.” (MATYU 8:16) Pikinini Bilong God i oraitim olgeta man i kam long em, em i kamapim samting Kingdom Bilong God bai mekim long olgeta hap.

• “Em [God] bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen. Ol dispela samting bilong bipo ol i pinis olgeta.”—REVELESEN 21:3-5.

Bilong wanem ol man i karim ol bikpela pen na hevi? Ol man i tingim dispela askim inap planti yia. Sapos God i no as bilong ol pen na hevi, orait husat i as bilong en? Neks atikol bai bekim ol dispela askim.