Winston, stori long hau yu bin painim God.

Mi kamap bikpela long famili we ol i no save tingim lotu, na mipela i stap long wanpela fam long Queensland, Australia. Mipela i stap longwe long biktaun, olsem na mi no gat rot long bung wantaim ol narapela; mi stap tasol wantaim famili bilong mi. Taim mi gat 12 krismas, mi kirap long painim God. Mi beten askim em long helpim mi long kisim stretpela save long em. Bihain, mi lusim fam na mi go kisim wok mani long Adelaide, South Australia. Taim mi gat 21 krismas, mi go holide long Sydney na mi bungim Pam, na em i tokim mi long wanpela lotu (British-Israel) em ol i bilip olsem lain Briten i kam long 10-pela traib bilong Israel. Ol i tok ol dispela traib i bilong hap not na ol i go kalabus bihain long 700 B.C.E. Olsem na taim mi go bek long Adelaide, mi stori wantaim wanwok bilong mi long dispela samting. Dispela wanwok i stadi long Baibel wantaim ol Witnes Bilong Jehova. Mi toktok wantaim em inap sampela aua—mipela i stori long bilip bilong ol Witnes—na mi luksave olsem mi kisim bekim long beten mi mekim taim mi liklik mangi yet. Mi kisim stretpela save long Krieta na Kingdom bilong em! Mi painim “pel i dia tumas.”—Mat. 13:45, 46.

Pam, yu wok long painim dispela pel taim yu liklik yet. Yu bin painim olsem wanem?

Famili bilong mi i tingim lotu, na mipela i stap long Coffs Harbour, New South Wales. Papamama na bubu man na bubu meri i joinim lotu British-Israel. Mi yet, liklik brata, bikpela susa, na planti kasen i bilip olsem God i laikim tasol ol lain em tumbuna bilong ol i kam long Briten. Tasol mi no bilip strong long dispela samting, na mi pilim olsem mi hangre yet long sait bilong bilip. Taim mi gat 14 krismas, mi go long kain kain lotu olsem Angliken, Baptis, na Sevende Adventis. Tasol ol i no inapim laik bilong mi long kisim save long God.

Bihain famili bilong mi i go stap long Sydney, na long dispela hap mi bungim Winston taim em i go holide long Sydney. Olsem em i tok pinis, mipela i stori long ol samting bilong lotu na dispela i kirapim em long stadi wantaim ol Witnes. Bihain em i raitim pas long mi na putim planti skripsa! Mi ken tok stret olsem, pastaim mi tingting planti—na tu, mi belhat. Tasol isi isi mi luksave olsem dispela em tok i tru.

Mi laik stap klostu long Winston, olsem na long 1962 mi go stap long Adelaide. Em i stretim rot long mi inap stap wantaim tupela marit Witnes—Thomas na Janice Sloman—ol i bin mekim wok misineri long Papua Niugini. Tupela i soim bikpela pasin helpim long mi; mi gat 18 krismas, na tupela i helpim mi gut tru long sait bilong bilip. Olsem na mi kirap stadi long Baibel, na i no longtaim mi bilip olsem mi painim pinis tok i tru. Bihain long mitupela Winston i marit, mipela i kirap mekim wok bilong God—maski ol hevi i painim mipela, dispela wok i helpim mipela long laikim tru gutpela pel mipela i bin painim.

Winston, tokim mipela long wok bilong Jehova yu mekim taim yu yangpela yet.

Bihain tasol long mitupela Pam i marit, i olsem Jehova i opim namba 1 “bikpela dua” na bai mipela inap mekim planti wok moa. (1 Kor. 16:9) Brata Jack Porter em wasman sekit long liklik kongrigesen bilong mipela, na em i toksave long wok mipela bai mekim. (Nau em tu i mekim wok olsem memba bilong Australasia Brens Komiti.) Jack na meri bilong em Roslyn i kirapim mipela long mekim wok painia oltaim—mipela i mekim dispela wok inap 5-pela yia. Taim mi gat 29 krismas, mi na Pam i kisim asainmen bilong mekim wok sekit long ol ailan bilong Saut Pasifik. Long dispela taim, brens long Fiji i lukautim ol ailan olsem Amerikan Samoa, Samoa, Kiribati, Nauru, Nue, Tokelau, Tonga, Tuvalu, na Vanuatu.

Long dispela taim bipo, ol manmeri long sampela ailan i stap longwe tru, na ol i holim tupela tingting long ol Witnes Bilong Jehova, olsem na mipela i mas bihainim savetingting. (Mat. 10:16) Ol kongrigesen long ol dispela ailan em liklik, na sampela i no gat ples slip mipela inap stap long en. Olsem na mipela i askim ol lain long ples sapos mipela inap stap wantaim ol, na oltaim ol i mekim gut long mipela.

Winston, yu laikim tru wok bilong trenslesen. Wanem samting i kirapim yu long laikim dispela wok?

Long dispela taim, ol bratasista long Tonga i no gat planti nius na buklet long tokples Tonga. Taim ol i stadi wantaim ol manmeri, ol i yusim buk long tok Inglis, The Truth That Leads to Eternal Life. Olsem na taim skul bilong ol elda i kamap insait long 4-pela wik, 3-pela asples elda husat i save liklik long tok Inglis i wanbel long trensletim buk Truth long tokples Tonga. Pam i taipim manuskrip na mipela i salim long brens ofis long Amerika long prinim. Dispela projek i pinis insait long 8-pela wik. Maski trenslesen bilong dispela buk i no gutpela tumas, dispela buk i helpim planti manmeri bilong Tonga long kisim tok i tru. Mitupela Pam i no trensleta, tasol dispela ekspiriens i kirapim laik bilong mipela long mekim dispela wok.

Pam, yu bai tok wanem long laip long ailan na laip long Australia?

Laip i no wankain! Sampela ples mipela i stap long en i gat planti moskito, rat, ples i hot, mipela i sik, na sampela taim mipela i sot long kaikai. Tasol long pinis bilong olgeta de, mipela i save rileks long fale na lukluk i go long solwara—long tokples Samoa, fale em haus win. Taim mun i lait long nait, mipela inap lukim ol kokonas, na mun lait i save sain antap long solwara. Long kain taim olsem, mipela i save beten na tingim ol blesing mipela i kisim long asainmen bilong mipela.

 Mipela i save laikim tru ol pikinini. Ol i save mekim fani na ol i laik painimaut sampela samting taim ol i lukim mipela ol wait manmeri bilong narapela kantri. Taim mipela i visitim Nue, wanpela liklik boi i rabim han bilong Winston na em i tok: “Mi laikim pisin gras bilong yu.” Dispela boi i no bin lukim man i gat planti skin gras, olsem na em i no save long stretpela tok bilong yusim!

Mipela i sori tru long lukim ol manmeri i stap rabis na laip i hatwok tru. Ol i gat naispela ples, tasol i no gat gutpela helt na ol i no gat gutpela wara bilong dring. Maski i olsem, ol bratasista i stap amamas bikos ol i lain pinis long dispela kain laip. Ol i amamas long famili i stap wantaim ol, ol i gat ples bilong mekim lotu, na ol inap preisim Jehova. Eksampel bilong ol i helpim mipela long tingim ol bikpela samting na abrusim pasin bilong bungim mani kago.

Pam, taim yupela i go long nupela ples, sampela taim yu yet i mas kisim wara na redim kaikai. Olsem wanem yu mekim ol dispela wok?

Mi amamas olsem papa bilong mi i bin trenim mi long ol bikpela samting, olsem wei bilong wokim paia ausait long haus na kuk, na pasin bilong stap wantaim liklik kago tasol. Wanpela taim mipela i visit long Kiribati, na mipela i stap long liklik haus kunai we ol i putim ol korol long floa na banisim long mambu. Taim mi laik kukim liklik kaikai, mi digim hul long floa na mekim i kamap ples bilong laitim paia, na mi putim ol skin kokonas i go insait bilong wokim paia. Taim mi laik kisim wara, mi save go sanap long hulwara wantaim ol asples meri. Ol i yusim stik i longpela inap olsem 2 mita na ol i pasim liklik rop long en na i luk olsem stik bilong huk. Ol i yusim dispela rop long pasim kontena. Olgeta wan wan meri i save tromoi rop i go daun na taim ol i lukim olsem kontena i laik tatsim wara, ol i save tanim han kwik. Taim ol i mekim olsem, kontena i tanim na wara inap go insait long en. Mi ting em isi—i go inap long taim bilong mi. Mi tromoi rop i go daun inap planti taim liklik, tasol kontena i save pundaun antap long wara na trip nating! Olgeta meri i lap, na bihain wanpela meri i helpim mi na pulimapim wara. Ol asples i gat gutpela pasin na ol i save helpim mipela.

Yutupela wantaim i laikim asainmen bilong yupela long ol ailan. Inap yutupela i stori long sampela gutpela ekspiriens?

Winston: Sampela haptaim i lus na mipela i save gut long sampela kastam bilong ol manmeri. Kain olsem, taim ol bratasista i givim kaikai long mipela, ol i save givim olgeta kaikai ol i gat. Pastaim mipela i no save olsem mipela i mas lusim sampela hap kaikai bilong ol. Olsem na mipela i pinisim olgeta kaikai! Bihain, mipela i save gut long kastam bilong ol na mipela i lusim sampela kaikai bilong ol. Maski mipela i mekim ol popaia, ol bratasista i save olsem mipela i lain yet long kastam bilong ol. Ol i save amamas tru taim mipela i mekim sekit wok na visitim ol insait long olgeta 6-pela mun. Mipela tasol i save raun visitim ol asples bratasista, na i no gat rot long ol narapela inap mekim olsem.

Visit bilong mipela i kirapim tingting bilong ol manmeri. Planti manmeri i ting olsem ol brata i kirapim dispela lotu long laik bilong ol yet. Olsem na taim mipela i visitim ol bratasista, ol asples i luksave olsem lotu bilong mipela em lotu i tru na mipela i tingim tru narapela narapela.

Pam: Mi pilim tru wanpela samting i kamap taim mipela i visitim kongrigesen long Kiribati. I no gat planti pablisa, na ol i gat wanpela elda tasol, Itinikai Matera. Em i save mekim olgeta samting em inap mekim bilong lukautim mipela. Wanpela taim em i bringim wanpela basket i gat wanpela kiau tasol long en. Em i tok: “Em bilong yutupela.” Long dispela taim bipo, wan wan taim  tasol mipela i save kaikai kiau bilong kakaruk. Mipela i pilim tru pasin bilong dispela brata.

Pam, sampela yia bihain yu kisim bel, tasol bebi i dai. Wanem samting i helpim yu long karim dispela hevi?

Mi kisim bel long 1973 taim mitupela Winston i stap long Saut Pasifik. Mipela i go bek long Australia na 4-pela mun bihain, bebi i dai insait long bel. Winston tu i bel hevi bikos em i papa bilong bebi. Isi isi bel hevi bilong mi i go daun, tasol bel hevi i stap yet i go inap long mipela i kisim Wastaua bilong Epril 15, 2009. “Askim” long dispela magasin i tok: “Sapos pikinini i dai long bel bilong mama, yumi ken ting em bai kirap bek?” Dispela atikol i tok Jehova yet bai skelim dispela samting, na oltaim em i save bihainim stretpela pasin, na dispela tok i mekim isi bel bilong mipela. Em bai stiaim Pikinini bilong em (Jisas) long “bagarapim ol samting Devil i kamapim,” na pinisim olgeta pen na hevi yumi karim long dispela taim nogut bilong nau. (1 Jon 3:8) Na tu, dispela atikol i helpim mipela long pilim tru blesing bilong gutpela “pel” mipela i gat olsem ol manmeri bilong Jehova! Laip bilong yumi bai i no gat mining sapos yumi no save long tok i tru bilong Kingdom!

Mipela i kirap gen long insait long fultaim sevis. Inap sampela mun mipela i wok long Betel long Australia, na bihain mipela i kirap gen long mekim wok sekit. Long 1981, bihain long mipela i mekim wok sekit inap 4-pela yia long kantri sait bilong New South Wales na Sydney, ol i invaitim mipela i go long brens ofis long Australia na mipela i wok yet long brens i kam inap long nau.

Winston, yu ting ekspiriens bilong yu long ol ailan bilong Saut Pasifik i helpim wok bilong yu olsem memba bilong Brens Komiti long Australasia?

Yes, em i helpim mi long planti rot. Pastaim, Australia i lukautim Amerikan Samoa na Samoa. Bihain, brens ofis long Nu Silan i bung wantaim Australia na kamap wanpela brens. Long nau brens ofis long Australasia i lukautim wok i kamap long Australia, Amerikan Samoa na Samoa, Kuk Ailan, Nue, Nu Silan, Timor-Leste, Tokelau, na Tonga—mi bin visitim planti bilong ol dispela ples olsem brata em brens i salim. Ekspiriens bilong mi long wok wantaim ol bratasista long ol dispela ailan i helpim mi tru, na nau mi inap stap long brens ofis na mekim wok bilong helpim ol.

Ekspiriens bilong mitupela Pam i kamapim klia olsem i no ol bikpela manmeri tasol i save painim God. Ol yangpela tu i laik kisim “pel i dia tumas” maski ol wanfamili i no laikim dispela pel. (2 Kin. 5:2, 3; 2 Sto. 34:1-3) Jehova em God i gat pasin laikim na em i laik bai olgeta manmeri, ol yangpela na lapun, i kisim laip!

Taim mitupela Pam i stat long painim God winim 50 yia i go pinis, mipela i no save olsem mipela bai kisim ol blesing mipela i gat long nau. Tok bilong kingdom i olsem pel i gat bikpela pe tru! Mipela i laik tru long holim strong dispela gutpela pel!