“PLANTI kaikai i mau pinis, tasol i no gat planti wokman. Olsem na askim Bosman bilong bungim kaikai long salim ol wokman i go bilong bungim kaikai bilong en.” (Luk 10:2) Jisas i mekim dispela tok inap 2,000 yia i go pinis na dispela tok i stret long wok autim tok long Mianma, we klostu 4,200 pablisa i autim gutnius long 55 milion manmeri.

Jehova em “Bosman bilong bungim kaikai,” olsem na em i kirapim planti handret bratasista long narapela narapela kantri long kam long Mianma na helpim wok autim tok. Wanem samting i kirapim ol long lusim ples bilong ol na i go helpim wok autim tok? Ol i mekim wanem ol samting bambai ol i ken i go long Mianma? Ol i kisim wanem ol blesing? Yumi ken stori long dispela.

Kazuhiro em wanpela painia long Japan. Sampela yia i go pinis em i kisim sik muruk na em i hap indai, olsem na ol i kisim em i go long haus sik. Kazuhiro i kirap nogut taim dokta i tokim em long em i no ken draivim kar inap 2-pela yia. Em i askim em yet: ‘Hau bai mi mekim yet wok painia, em wok mi laikim tru?’ Em i beten strong na askim Jehova long opim rot na bai em i ken mekim yet wok painia.

Kazuhiro i tok: “Wanpela mun bihain, pren bilong mi long Mianma i harim olsem mi gat sik. Em i ringim mi na tok: ‘Long Mianma, planti manmeri i save raun long bas. Sapos yu kam, bai yu mekim yet wok painia na yu no gat wok long draivim kar!’ Mi askim dokta sapos helt bilong mi i orait na mi inap go long Mianma. Mi kirap nogut taim dokta i tok: ‘Long nau yet, wanpela dokta i kam long Mianma na visitim Japan, em i dokta bilong kru. Bai mi tokim dokta long lukim yu. Sapos sik bilong yu i kamap gen, em bai helpim yu.’ Tok bilong dokta i helpim mi long save olsem Jehova i harim beten bilong mi.”

Kwiktaim Kazuhiro i salim pas long brens ofis long Mianma na tokim ol long laik bilong em na meri bilong em long mekim wok painia long dispela hap. Faivpela de bihain, brens ofis i bekim pas na tok: “Kam, mipela i nidim planti painia!” Kazuhiro na meri bilong em Mari i salim 2-pela kar bilong ol, stretim ol visa, na baim ol tiket bilong ol. Nau ol i amamas long helpim grup i mekim tokples Sain long Mandalay. Kazuhiro i tok: “Dispela ekspiriens i strongim bilip bilong mipela long tok promis bilong God long  Song 37:5, em i tok: ‘Yu mas putim laip bilong yu long han bilong Bikpela. Bilip strong long em, na em bai i helpim yu.’”

Long 2014, ol Witnes Bilong Jehova long Mianma i gat spesel kibung. Planti bratasista bilong ol narapela kantri i kam long dispela spesel kibung. Wanpela bilong ol em Monique, em sista i gat 34 krismas na em i bilong Amerika. Em i tok: “Taim kibung i pinis na mi go bek, mi beten askim Jehova long samting mi bai mekim long laip bilong mi. Na tu, mi toktok wantaim papamama long ol mak mi laik winim long mekim wok bilong Jehova. Mipela famili i wanbel long mi ken go bek long Mianma, tasol sampela haptaim i mas lus na mi beten planti long God long disisen mi mekim.” Monique i stori long risen na em i mekim olsem.

“Jisas i kirapim ol disaipel long ‘skelim gut pe’ bilong ol samting. Mi askim mi yet: ‘Mi gat inap mani long i go? Mi gat inap mani long lukautim mi long dispela hap na mi no tromoi bikpela taim long wok mani?’” Em i tok: “Kwiktaim mi luksave olsem mi no gat inap mani long go long dispela hap.” Em i mekim wanem bambai em inap go long Mianma?—Luk 14:28.

Monique i tok: “Wanpela taim, bos i tokim mi long go lukim em. Mi tingting planti bikos mi ting olsem em bai pinisim mi long wok. Tasol bos i tok amamas long gutpela wok mi mekim. Em i tokim mi olsem em i stretim rot long mi inap kisim ekstra mani. Dispela mani em inap stret long helpim mi long bekim dinau bilong mi!”

Kirap long Disemba 2014, Monique i mekim wok painia long Mianma. Em i pilim olsem wanem taim em i go helpim wok autim tok long hap i sot long ol pablisa? Em i tok: “Mi amamas tru long kam long hia. Mi kirapim 3-pela Baibel stadi. Wanpela bilong ol i gat 67 krismas. Oltaim em i save smail na hagim mi taim em i gritim mi. Taim em i kisim save olsem nem bilong God em Jehova, em i aiwara. Em i tok: ‘Dispela em namba 1 taim long laip bilong mi long harim olsem nem bilong God em Jehova. Yu yangpela moa long mi, tasol yu skulim mi long wanpela bikpela tok em mi no bin save long en.’ Mi tu mi aiwara. Ol kain ekspiriens olsem i mekim mi amamas tru olsem mi inap helpim wok long hap i sot long pablisa.” I no longtaim i go pinis, rot i op na Monique i go long Skul Bilong Ol Kingdom Evanselis.

Narapela risen na sampela bratasista i kam long Mianma em olsem, ol i ritim ol ekspiriens i stap long 2013 Yearbook of Jehovah’s Witnesses. Li em wanpela sista i gat winim 30 krismas na em i stap long narapela kantri long saut-is Esia. Em i mekim wok mani fultaim, tasol ol ekspiriens bilong Yearbook i kirapim em long go mekim wok autim tok long Mianma. Em i tok: “Long 2014, taim mi go long spesel kibung long Yangon, mi bungim 2-pela marit em ol i helpim wok autim tok long tokples Saina long Mianma. Mi save mekim tokples Saina, olsem na mi go long Mianma na sapotim grup i mekim tokples Saina. Mi stretim tok wantaim Monique na mipela i go stap long Mandalay. Jehova i blesim mipela na mipela i wok pat-taim long wanpela skul, na tu, mipela i painim wanpela flet i stap klostu. Maski ples i hot na i gat ol narapela hevi, mi amamas long autim tok long dispela hap. Ol manmeri long Mianma i no gat planti samting, tasol ol i gat gutpela pasin na ol i amamas long putim gut yau long gutnius. Em gutpela samting tru long save olsem Jehova i wok long hariapim wok. Mi save olsem em laik bilong Jehova na mi kam stap long Mandalay.”

Planti bratasista i helpim wok autim tok i luksave olsem beten i gat strong. Tingim stori bilong Jumpei, em i gat 37 krismas na meri bilong em Nao i gat  35 krismas. Tupela i bin helpim kongrigesen i mekim tokples Sain long Japan. Bilong wanem ol i go long Mianma? Jumpei i tok: “Mi na meri bilong mi i putim mak long autim tok long hap i sot long ol pablisa. Wanpela brata long kongrigesen bilong mipela long Japan i go long Mianma. Mipela i no gat planti mani, tasol long Me 2010 mipela i go long Mianma. Ol bratasista long Mianma i amamas tru long lukim mipela!” Jumpei i pilim olsem wanem long autim tok long tokples Sain long Mianma? Em i tok: “Ol manmeri i gat bikpela laik tru long harim. Taim mipela i soim ol vidio bilong tokples Sain long ol yaupas, ol i amamas tru. Mipela i amamas tru olsem mipela inap mekim wok bilong Jehova long dispela hap!”

Olsem wanem Jumpei na Nao i gat inap mani long sapotim ol yet? Jumpei i tok: “Insait long 3-pela yia, mipela i yusim olgeta mani, na mipela i no gat inap mani long baim rent bilong haus long neks yia. Mi na meri bilong mi i beten planti taim. Mipela i kirap nogut long brens ofis i salim pas bilong singautim mipela long mekim wok painia salim inap sotpela haptaim! Mipela i bilip long Jehova na mipela i luksave olsem em i no lusim mipela. Em i lukautim mipela long ol samting mipela i nidim.” I no longtaim i go pinis, Jumpei na Nao i go long Skul Bilong Ol Kingdom Evanselis.

Simone em wanpela brata i gat 43 krismas na em i bilong Itali, na meri bilong em Anna i gat 37 krismas na em i bilong Nu Silan. Wanem samting i kirapim tupela long i go long Mianma? Anna i tok: “Mipela i ritim ol ekspiriens bilong Mianma long Yearbook bilong 2013!” Simone i tok: “Mipela i amamas tru long stap long Mianma. Mipela i no gat planti samting, olsem na mi inap givim bikpela taim long mekim wok bilong Jehova. Mipela i amamas tru long save olsem Jehova i lukautim mipela taim mipela i mekim wok bilong em long hap i sot long ol pablisa.” (Sng. 121:5) Anna i tok: “Nau mi amamas tru winim long pastaim. Mipela i no gat planti samting. Tasol mi lusim bikpela haptaim long autim tok wantaim man bilong mi, na mipela i pas gut tru. Na tu, mipela i gat ol naispela pren. Ol manmeri i laikim tru ol Witnes, na ol i laik tru long harim tok mipela i autim!” Olsem wanem ol manmeri i amamas long putim yau?

Anna i tok: “Wanpela taim mi autim tok long wanpela yunivesiti sumatin long maket na mi stretim rot long bungim em gen. Taim mi go bungim em, em i kam wantaim wanpela pren. Long narapela taim, em i kam wantaim sampela pren. Bihain, em i kam wantaim sampela moa pren. Nau mi stadi wantaim 5-pela meri olgeta.” Simone i tok: “Ol manmeri bilong dispela hap i gat pasin pren na ol i amamas long putim yau. Planti i gat laik long harim tok. Tasol mipela i no gat taim long stadi wantaim olgeta.”

Ol bratasista i mekim wanem ol samting bambai ol inap go long Mianma? Mizuho i bilong Japan, na em i tok: “Mi na man bilong mi Sachio i laik autim tok long ol kantri i sot long ol pablisa, tasol mipela i no  save bai mipela i go we. Mipela i ritim ol ekspiriens bilong ol bratasista i autim tok long Mianma long Yearbook bilong 2013, na dispela i kirapim mipela long skelim sapos mipela inap autim tok long dispela hap.” Sachio i tok: “Inap 1-pela wik, mipela i raun long Yangon em biktaun bilong Mianma, na lukim ples i olsem wanem. Dispela i kirapim mipela long stap long hia na mekim wok.”

Rodney na meri bilong em Jane i bilong Australia na ol i winim pinis 50 krismas, na ol i gat 2-pela pikinini, em Jordan na Danica. Kirap long 2010, famili olgeta i go helpim wok autim tok long Mianma. Rodney i tok: “Mipela i amamas tru long lukim olsem ol manmeri i hangre tru long kisim save long God. Mi laik kirapim ol narapela famili long helpim wok autim tok long ol kain ples olsem Mianma.” Bilong wanem? Em i tok moa: “Dispela wok i kirapim mipela long i go klostu moa long Jehova! Planti yangpela i lusim bikpela haptaim long yusim fon, raun long kar, wok mani, na mekim ol narapela samting. Ol pikinini bilong mipela i wok long lainim ol nupela tok bilong yusim long taim ol i autim tok. Ol i lain long toktok gut wantaim ol manmeri em ol i no save long tok bilong Baibel na prektis long bekim gut tok long ol miting, na tu, ol i givim bel long mekim ol narapela wok lotu.”

Oliver em brata i gat 37 krismas na em i bilong Amerika. Em i kirapim ol narapela long autim tok long ol hap i sot long ol pablisa. Em i tok: “Taim mi mekim wok bilong Jehova long hap mi no save long en, dispela i kamapim gutpela samting. Mi lusim ples bilong mi na i kam stap long narapela hap, na dispela i helpim mi long bilip long Jehova maski wanem wanem samting i kamap long mi. Mi wok wantaim ol bratasista em mi no save long ol long pastaim, tasol mipela i gat wankain bilip. Dispela i helpim mi long luksave olsem oganaisesen bilong God tasol inap helpim mipela long i stap wanbel.” Nau Oliver na meri bilong em Anna i givim bel yet long autim tok long tokples Saina.

Trazel em wanpela sista long Australia, na em i gat 52 krismas. Em i autim tok long Mianma kirap long 2004. Em i tok: “Ol bratasista em ol i no gat samting i pasim ol, mi laik kirapim ol long i go autim tok long ol hap i sot long ol pablisa. Mi luksave olsem sapos yu gat laik long autim tok, Jehova bai blesim yu. Mi no bin ting olsem mi inap mekim dispela wok. Mi pilim olsem laip bilong mi i gat as bilong en na mi kisim planti blesing.”

Tok bilong ol dispela bratasista i ken strongim yu long helpim ol man i gat gutpela bel em ol i stap long ol hap we i no gat ol pablisa. Tru tumas, ol lain i helpim wok autim tok i mekim dispela tok: “Plis, kam long Mianma na helpim mipela!”