Yu Save Long Dispela?
Wanem samting i kamap long Ninive bihain long taim bilong Jona?
LONG yia 670 B.C.E. samting, Asiria i stap olsem strongpela kantri long graun olgeta na nius The British Museum Blog i tok em i “bosim ol ples kirap long Saiprus long hap wes i go inap long Iran long hap is, na inap sampela yia em i bosim tu Isip.” Biktaun bilong en Ninive i stap olsem nambawan biktaun long graun olgeta. Em i gat ol traipela monumen, ol naispela gaden tru, ol naispela haus king, na ol bikpela laibreri. Ol rait long wol bilong Ninive bilong bipo i soim olsem King Asubanipal—wankain olsem ol narapela king—i kolim em yet olsem “king bilong graun olgeta.” Long dispela taim, i luk olsem Asiria na Ninive i stap strong na i no gat wanpela inap daunim ol.
Strongpela Gavman Asiria em nambawan bikpela gavman long graun olgeta long dispela taim
Maski i olsem, taim Asiria i gat biknem tru, Jehova i mekim tok profet long rot bilong profet Sefanaia olsem: “[Jehova] bai . . . bagarapim Asiria, na em bai mekim Ninive i stap ples nating, na em bai kamap drai olsem ples drai nating.” Na tu, profet bilong Jehova, em profet Nahum i tok profet olsem: “Kisim olgeta silva na olgeta gol! . . . Taun i bagarap na i no gat man i stap! . . . Na taim ol manmeri i lukim yu, ol bai ranawe long yu na tok olsem, ‘Ninive i bagarap pinis!’” (Sef. 2:13; Nah. 2:9, 10; 3:7)Taim ol man i bin harim ol dispela tok profet, ating ol i tingting olsem: ‘Tru tru kain samting inap kamap? Ol man bai daunim strongpela kantri Asiria?’ Ating em hatwok long bilipim.
Ninive i kamap ples drai nating!
Maski i olsem, samting ol i no ting long en i kamap tru! Long pinis bilong yia 600 B.C.E., lain Babilon na lain Midia i kam daunim Asiria. Bihain ol man i no stap moa long Ninive na ol man i lusim tingting olgeta long en! Wanpela pablikesen bilong lain The Metropolitan Museum of Art long New York i tok: “Bihain long planti yia, ol man i no stap moa long Ninive na em i pinis olgeta, nau ol man i save long Ninive long rot bilong ol stori bilong Baibel tasol.” Lain Biblical Archaeology Society Online Archive, i tok long yia 1800 samting “i no gat man i save sapos tru tru dispela biktaun bilong Asiria i bin stap bipo o nogat.” Tasol long yia 1845, saveman Austen Henry Layard i digim graun long hap em taun Ninive i bin stap long en bipo. Ol samting em i painim long dispela hap i soim olsem Ninive i bin gat biknem tru long bipo.
Tok profet i kamap tru long Ninive i strongim bilip bilong yumi olsem ol tok profet Baibel i mekim long pinis bilong ol gavman bilong nau, truim bilong ol bai kamap tru.—Dan. 2:44; Rev. 19:15, 19-21.
