LO BILONG MOSES i tokaut long wanem kain taim i stret long man i mekim tok promis. Tasol long taim bilong Jisas, planti manmeri i bihainim pasin bilong mekim tok promis long olgeta de. Ol i save mekim olsem bilong strongim tok bilong ol. Jisas i no orait long dispela pasin, na 2-pela taim em i bin tokaut long dispela. Bihain em i tokim ol: “‘Yes’ bilong yupela i mas minim yes tasol, na ‘Nogat’ bilong yupela i mas minim nogat tasol.”—Mat. 5:33-37; 23:16-22.

Wanpela dikseneri bilong Baibel (Theological Dictionary of the New Testament) i tok olsem, ol rait bilong buk Talmut i stori long “pasin bilong ol Juda long mekim tok promis bilong strongim tok bilong ol.” Dispela buk i stori tu long wanem kain tok promis man i mas mekim na wanem kain tok promis em i no ken mekim.

Ol narapela man tu i bin i gat wankain tingting olsem Jisas long pasin bilong mekim ol tok promis. Flavius Josifas em saveman bilong histori. Em i tok: “Wanpela lain Juda i bilip olsem pasin bilong mekim tok promis i nogut moa long pasin bilong tok giaman. Sapos man i mekim tok promis bambai ol narapela i bilipim tok bilong em, orait dispela man em wanpela man bilong giaman.” Wanpela buk bilong ol Juda em ol i kolim olsem Savetingting Bilong Sirak i tok: “Sapos oltaim man i mekim promis, na em i no truim tok bilong em, orait em i man nogut tru.” Jisas i no orait long pasin bilong tingim tok promis olsem samting nating. Sapos oltaim yumi mekim tok tru, i no gat wok long yumi mekim tok promis long strongim tok bilong yumi.