Planti milion Kristen i no selebretim Krismas. Ol i pilim olsem wanem long disisen bilong ol? Yu ting ol i pilim olsem ol i lus long kisim sampela samting? Ol pikinini bilong ol i pilim olsem papamama i pasim ol long kisim amamas? Skelim tok ol Witnes Bilong Jehova long olgeta hap i mekim long dispela samting.

Tingim Jisas Krais: “Paslain long mi kamap wanpela Witnes Bilong Jehova, mi no save go tumas long lotu. Na sapos mi go, mi save go tasol long taim bilong Krismas o Ista. Maski i olsem, mi no save tingim tumas Krais Jisas. Tasol nau mi no moa selebretim Krismas na mi save go long ol miting Kristen tupela taim long wanpela wik, na mi save skulim ol arapela long ol tok Baibel i mekim long Jisas!”—EVE, AUSTRALIA.

Amamas long givim samting: “Mi save amamas taim ol man i givim presen long mi long taim mi no ting ol bai mekim. Na tu, mi save amamas long mekim ol kat na peintim ol piksa bilong givim long ol narapela bikos dispela i save amamasim ol na i mekim mi tu i amamas.”—REUBEN, NOTEN AIALAN.

Helpim ol taranguman: “Mipela i amamas long redim kaikai bilong ol man i sik. Sampela taim, mipela i givim plaua, kek, o liklik presen bilong amamasim ol. Mipela i amamas long mekim olsem bikos mipela i ken visitim ol maski em i wanem taim bilong yia.”—EMILY, AUSTRALIA.

Lusim haptaim wantaim famili: “Taim ol famili bilong mipela i bung, mipela i sindaun wantaim na ol pikinini i lain gut long ol ankol, ol anti, ol bubu, na ol kasen bilong ol. Mipela i no save bung long wanpela taim stret long yia, olsem na mipela i no pilim presa bilong mekim olsem, na famili bilong mipela i save olsem as na mipela i visitim ol em bikos mipela i laikim ol.”—WENDY, AILAN KEIMAN.

Bel isi: “Long Krismas, ol man i gat planti samting bilong mekim na wan wan man tasol i save tingim bel isi. Nau mi save pinis long tok promis em Baibel i mekim long ol man, olsem na mi stap bel isi. Nau mi save olsem ol pikinini bilong mi bai stap amamas oltaim long bihain.”—SANDRA, SPEN.