KIRAP BEK bilong Jisas em wanpela bikpela samting i bin kamap bipo na inap helpim yumi long nau. Tok bilong aposel Pol i kamapim klia dispela samting, em i tok: “God i bin kirapim bek Krais long dai. Em i kirap bek paslain long ol arapela man i dai pinis, olsem namba 1 kaikai i redi long gaden. Long rot bilong wanpela man, dai i kamap, olsem tasol long rot bilong wanpela man, ol man bai kirap bek long dai. Long rot bilong Adam ol man i save dai, olsem tasol long rot bilong Krais ol man bai kisim laip.”—1 Korin 15:20-22.

Jisas i bin kirap bek long mun Nisan 16, 33 C.E., long dispela de ol Juda i save givim namba 1 kaikai bilong gaden olsem ofa long God Jehova long tempel long Jerusalem. Taim Pol i kolim Jisas olsem namba 1 kaikai bilong gaden, em i makim olsem i gat sampela man moa bai kirap bek long matmat.

Tok Pol i mekim bihain long dispela i soim yumi long ol samting em kirap bek bilong Jisas i mekim. Em i tok: “Long rot bilong wanpela man, dai i kamap, olsem tasol long rot bilong wanpela man, ol man bai kirap bek long dai.” Yumi bin kisim sin long Adam, olsem na yumi olgeta i save dai. Tasol Jisas i givim laip bilong em i gutpela olgeta olsem pe bilong baim bek ol man, olsem na em i opim rot bambai ol manmeri bilong graun inap lusim kalabus bilong sin na i dai long rot bilong kirap bek long matmat. Pol i kolim klia dispela samting long Rom 6:23, olsem: “Pe bilong sin em dai, tasol presen God i givim em laip oltaim long rot bilong Krais Jisas, Bikpela bilong yumi.”

Jisas yet i tokaut long olsem wanem i dai na kirap bek bilong em i helpim yumi. Em i tok long em yet olsem: “Ol bai hangamapim Pikinini bilong man. Long dispela rot olgeta man i bilip long em ol i ken kisim laip oltaim. God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.”—Jon 3:14-16.

Piksaim long tingting laip i stap oltaim oltaim, i no gat pen, sik, o hevi! (Revelesen 21:3, 4) Em gutpela samting tru bai kamap, a? Wanpela saveman i tok long dispela samting olsem: “Ol ples matmat i kirapim yumi long tingim laip bilong yumi i bilong sotpela taim tasol, tasol kirap bek i makim olsem i dai bilong yumi i bilong sotpela taim tasol.” Tru tumas, long rot bilong kirap bek bilong Jisas ol man bai kisim laip i stap oltaim!