Mi go bikpela long hap bilong ol man i no gat planti mani, long taun Turku. Papa bilong mi i gat nem bilong boksen, na mi wantaim liklik brata tu i save insait long boksen. Long skul, planti taim mi save kirapim pait wantaim ol mangi. Taim mi tineja, mi insait long wanpela lain raskol, na dispela i mekim na mi insait long planti pait i nogut moa. Na tu, mi kirap lain long pilaim hevi metal musik, na mi laik tru long kamap man i gat nem long pilaim rok musik.

Mi baim sampela dram na kirapim wanpela ben, na i no long taim mi man bilong go pas long singsing long dispela ben. Taim mi singsing mi save go wail stret antap long pletfom. Ol lain bilong ben i save paitim strong ol dram samting na ol i luk wail stret, olsem na isi isi planti man i save long ben bilong mipela. Mipela i kirap pilaim musik long ai bilong bikpela odiens tru, na mipela i rekodim sampela singsing, na ol laspela singsing mipela i rekodim em planti man i laikim. Klostu long pinis bilong 1988, mipela i go raun pilaim musik long sampela hap long Amerika na bai ol man i ken save long ben bilong mipela. Mipela i pilai long New York na Los Angeless sampela taim, na mipela i bin pasim tok wantaim sampela bisnisman bilong musik long wok wantaim ol, na bihain mipela i go bek long Finlan.

Tru, mi amamas long insait long ben, tasol mi laik tru bai i stap bilong mi i gat as bilong en. Mi no amamas long pasin bilong ol kampani bilong wokim musik long resis na mekim hatpela pasin, na mi les long i stap bilong mi i no gat as tru bilong en. Mi pilim olsem mi man nogut, na mi pret, nogut mi go long bikpaia. Mi wok strong long painim ol bekim bilong ol askim bilong mi long ol kain kain buk bilong lotu, na tu, mi beten strong long God long helpim mi, maski mi pilim olsem em i no inap laikim mi.

Bilong lukautim mi yet long ol samting bilong skin, mi wok long pos ofis. Wanpela taim mi kisim save olsem wanwok bilong mi em i wanpela  Witnes Bilong Jehova. Mi givim kain kain askim long em. Mi kirap nogut long pasin bilong em long kamapim ol gutpela bekim long Baibel, olsem na mi orait long em i stadi wantaim mi long Baibel. Mi kirap pinis long stadi inap sampela wik, na wanpela kampani i askim mi long ol i laik wokim wanpela gutpela kontrak wantaim ben bilong mi long rekodim singsing na kamapim wanpela nupela CD long Yunaitet Stets. Man! Mi amamas tru na mi ting, nau em sans bilong mi long mekim bikpela samting long laip bilong mi.

Mi tokim dispela Witnes i save stadi wantaim mi long mi laik wokim wanpela CD moa, na bihain bai mi tingting strong long bihainim ol stiatok bilong Baibel. Em i no tokim mi long samting mi mas mekim, tasol em i tokim mi long ritim tok bilong Jisas long Matyu 6:24. Ves i tok: “I no gat wanpela man inap stap wokboi bilong tupela bosman.” Taim mi kisim tingting long mining bilong dispela tok bilong Jisas, mi kirap nogut. Tasol sampela de bihain, tisa bilong mi i kirap nogut! Mi tokim em, mi laik bihainim tok bilong Jisas, olsem na mi lusim ben!

Baibel i olsem wanpela mira na i kamapim klia long mi ol pasin kranki bilong mi. (Jems 1:22-25) Mi lukim olsem pasin bilong mi i nogut tru: Mi gat pasin antap, na maski mi gat planti samting, mi pilim olsem em i no inap yet. Mi save tok nogut, pait, kisim smok, na dring planti. Mi luksave olsem pasin bilong mi i no stret wantaim ol stiatok bilong Baibel, na mi pilim olsem mi no gat rot moa. Tasol maski em i hatwok, mi redi long senisim pasin bilong mi.—Efesus 4:22-24.

Pastaim mi bel hevi tru long ol rong mi bin mekim bipo. Tasol Witnes i stadi wantaim mi i helpim mi gut. Em i soim mi long tok bilong Baibel long Aisaia 1:18, i tok: “Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais.” Dispela ves na sampela ves moa bilong Baibel i strongim mi olsem Papa bilong yumi long heven i gat pasin marimari, na em i laik oraitim bel bilong ol man i bel hevi long ol rong ol i bin mekim na ol i tanim bel.

Taim mi kisim save long ol gutpela pasin bilong Jehova na mi laikim em tru, mi laik givim laip bilong mi long em bilong mekim wok bilong em. (Song 40:8) Mi kisim baptais long 1992 long kibung intenesenel bilong ol Witnes Bilong Jehova long St. Petersburg, long Rasia.

Mi gat planti gutpela pren namel long ol lain i lotuim Jehova. Sampela taim mipela i bung na pilaim ol gutpela musik na amamas long dispela gutpela presen bilong God. (Jems 1:17) Wanpela gutpela samting tru i painim mi, em mi maritim wanpela gutpela meri tru, em Kristina. Mitupela i save amamas na karim ol hevi wantaim, na mi inap kamapim long em ol tingting i stap insait tru long bel bilong mi.

Sapos mi no bin kamap wanpela Witnes Bilong Jehova, ating bai mi dai longtaim pinis. Bipo mi bin mekim nabaut na kisim ol kain kain hevi, tasol nau i stap bilong mi i gat as tru bilong en, na bel bilong mi i gutpela.