Mi kamap bikpela long Warialda em wanpela liklik taun long New South Wales, Australia. Warialda em wanpela komiuniti i gat ol fam we ol man i lukautim ol sipsip na ol bulmakau, na ol i groim wit na ol gaden kaikai. Dispela taun i klin na i no gat planti pasin raskol.

Mi fes bon insait long famili i gat 10-pela pikinini, olsem na taim mi gat 13 krismas mi kisim wok mani na bai mi ken helpim famili long sait bilong kaikai samting. Mi no winim bikpela skul, olsem na mi save wok long ol fam. Taim mi gat 15 krismas mi kisim wok olsem man bilong trenim ol wel hos i kamap gutpela hos.

Wok long fam i gat gutpela na nogut bilong en. Gutpela samting em olsem mi laikim dispela wok na ples mi wok long en. Mi save wokim paia long nait na sindaun lukluk long mun na ol sta long heven taim kol win bilong nait i bringim ol gutpela smel bilong ol diwai na bus samting. Mi bin tingim olsem i mas i gat wanpela Man i wokim olgeta dispela gutpela samting. Tasol samting i no gutpela em olsem long fam sampela man i gat ol pasin nogut we inap kalap long mi. Planti taim mi save harim ol man i tok swea, na tu, ol i save smok olsem na em isi long mi kisim ol smok sigaret. I no longtaim pasin bilong smok na kolim ol tok swea i kamap olsem pasin tru bilong mi.

Taim mi gat 18 krismas mi go sindaun long Sydney. Mi laik joinim ami, tasol ol i no orait long dispela bikos mi no bin winim bikpela skul. Mi kisim wok na stap long Sydney inap wanpela yia. Em long dispela taim mi bungim ol Witnes Bilong Jehova. Mi orait long invatesen bilong go long wanpela miting bilong ol, na mi luksave olsem tok ol i skulim ol man long en em i tok i tru.

Tasol bihain long dispela, mi tingting long go bek long bus. Mi go kamap long Goondiwindi, Queensland. Mi kisim wok na mi marit, tasol sori tru, mi stat long dring alkohol.

 Mipela gat tupela pikinini. Bihain long taim tupela pikinini man bilong mi i bon, mi tingting long laip bilong mi bai olsem wanem long bihain. Mi tingim ol tok mi bin harim long miting bilong ol Witnes long Sydney, na mi laik senisim pasin bilong mi.

Mi painim wanpela olpela Wastaua we i gat atres bilong brens ofis bilong ol Witnes Bilong Jehova long Australia. Mi raitim pas na askim long kisim helpim. Ol i salim wanpela Witnes i kam lukim mi. I no longtaim em i stadi Baibel wantaim mi.

Taim mi kirap stadi long Baibel, mi luksave olsem mi mas mekim ol bikpela senis long laip bilong mi. Wanpela ves bilong Baibel i kirapim tru tingting bilong mi em 2 Korin 7:1. Dispela ves i strongim yumi long “rausim olgeta pasin doti bilong skin.”

Mi wokim tingting olsem mi bai lusim smok na pasin bilong dring tumas alkohol. I hatwok long mekim ol dispela senis bikos mi bin insait long ol dispela pasin inap longtaim tru. Tasol mi gat strongpela tingting long bihainim ol pasin em God i orait long en. Samting i helpim mi tru em taim mi bihainim stiatok i stap long Rom 12:2, em i tok: “No ken wokabaut moa long wankain pasin olsem ol man bilong dispela taim i save bihainim. Nogat. Yupela i mas kisim nupela tingting na bai pasin bilong yupela i senis.” Mi luksave olsem bilong senisim ol pasin bilong mi, mi mas senisim tu tingting bilong mi na kisim tingting bilong God, olsem ol dispela pasin inap nogutim mi. Dispela i helpim mi long lusim smok na pasin bilong dring tumas alkohol.

Bikpela hatwok bilong mi em long lusim pasin bilong tok swea. Mi save long tok bilong Baibel long Efesus 4:29 em i tok: “Ol stingpela tok i no ken kamaut long maus bilong yupela.” Maski mi traim long lusim pasin bilong tok swea, dispela pasin i stap yet long mi inap sampela haptaim. Mi kisim helpim long rot bilong tingim tingim long bel ol tok bilong Aisaia 40:26. Dispela ves i tok long ol samting bilong ples antap olsem: “Yupela lukluk i go antap long skai na lukim ol sta samting i stap antap. Husat tru i bin wokim ol? Em Bikpela tasol. Ol dispela samting i olsem lain ami bilong Bikpela. Em i save long namba bilong ol, na em i save long nem bilong wan wan bilong ol, na em i save kolim ol long nem bilong ol. Em i gat olgeta strong, olsem na i no gat wanpela bilong ol dispela samting inap lus.” Mi tingting olsem sapos God i gat bikpela strong na em i wokim yunives we mi save amamas long lukim, orait em bai givim strong long mi long mekim ol senis long laip bilong mi. Mi beten na wok strong, na isi isi mi kontrolim pasin bilong mi long toktok.

Mi save wok olsem man bilong trenim hos na i no gat planti rot i op long toktok wantaim ol narapela bikos i no gat planti man klostu long ol dispela fam mi wok long en. Tasol long rot bilong kisim ol skul i kam long ol miting bilong ol Witnes Bilong Jehova, mi lain long pasin bilong toktok gut. Na tu, dispela skul i bin helpim mi long tokim ol narapela long gutnius bilong Kingdom Bilong God.—Matyu 6:9, 10; 24:14.

Inap sampela yia nau mi amamas long mekim wok olsem wanpela elda insait long kongrigesen. Mi amamas long dispela gutpela wok mi mekim bilong helpim ol wanbilip bilong mi. Gutpela samting tru i painim mi em olsem, mi na meri bilong mi na ol pikinini bilong mi i wanbel wantaim long lotuim Jehova.

Mi tenkyu long Jehova i skulim mi maski mi no winim bikpela skul. (Aisaia 54:13) Mi wanbel tru long tok bilong Sindaun 10:22 olsem: “Bikpela yet i givim yumi planti gutpela samting.” Mi na famili bilong mi i laik kisim sampela save moa long Jehova na mekim wok bilong em inap oltaim.