Liklik meri Noelle i save laikim ol narapela, na em i save amamas long droim piksa. Wanpela apinun em i wokabaut i go long baksait bilong haus na em i bamim lek bilong em na pundaun i go insait long swiming pul. Em i draun na dai 2-pela wik paslain long em i gat 4-pela krismas.

Charlotte, Daniel, Olivia, Josephine . . . Em nem bilong sampela bilong ol 26 liklik pikinini i gat olsem 6-pela o 7-pela krismas em wanpela kilman i bin sutim ol i dai long wanpela skul long Connecticut, Amerika, long Disemba 14, 2012. Long fiuneral tok bilong ol, Presiden Obama, i tokim ol manmeri olsem: “Dispela kain ol hevi i mas pinis.”

Bano, em wanpela meri i gat 18 krismas, i lusim Irak wantaim famili bilong em long 1996, na i go sindaun long Nowe. Ol pren bilong em i save kolim em Sun Rays. Tasol sori tru, long Julai 22, 2011, Bano em wanpela bilong 77 manmeri em wanpela kilman i bin sutim ol na kilim ol i dai. Dispela man i mekim tok hambak olsem: “Mi sori . . . olsem mi no inap long kilim i dai planti manmeri moa.”