Paslain long Jisas Krais i go long heven long 33 C.E., em i tok promis long kam bek. Em i tok piksa long em yet i olsem wanpela bikman i go long wanpela ples inap longtaim na em bai kambek wantaim namba bilong mekim wok olsem king. As na Jisas i kam bek em bilong kamapim gutpela gavman bilong bosim ol man.—Ritim Luk 19:11, 12.

Krais i kam bek long wanem kain bodi? Em i bin kirap bek olsem wanpela spirit. (1 Pita 3:18) Orait em i go long heven na sindaun long han sut bilong God. (Song 110:1) Bihain, ol i kisim Jisas i go long God Jehova, dispela “Man bilong bipo bipo yet,” na em i givim strong long Jisas bilong bosim ol manmeri. Olsem na Jisas i kam bek olsem wanpela King long spirit, na i no olsem wanpela man.—Ritim Daniel 7:13, 14.

Taim Jisas i kam bek wantaim ol ensel bilong em olsem spirit, em bai skelim ol man long kot. Em bai bagarapim ol man nogut, tasol em bai givim laip oltaim long ol manmeri i orait long em i stap King bilong ol.—Ritim Matyu 25:31-33, 46.

Wok king bilong Jisas bai mekim graun i kamap Paradais. Em bai kirapim bek ol man i dai pinis na ol bai kisim laip long dispela Paradais long graun.—Ritim Luk 23:42, 43.