Ples bilong ol bokis mani bilong tempel i stap long Ples Bung Bilong Ol Meri. Buk The Temple—Its Ministry and Services i tok: “I gat wanpela veranda i raunim tempel, na insait long en, klostu long banis, i gat 13 bokis mani, o ‘ol trampet,’ [we] ol man i ken putim kontribiusen long en.”

Ol i kolim ol bokis mani olsem trampet, bikos long antap ol i liklik na daunbilo ol i bikpela. Olgeta bokis mani i gat nem we i soim bokis i bilong wanem kain ofa, na mani ol man i putim long ol bokis i bilong mekim wok ol i makim long en. Jisas i stap long Ples Bung Bilong Ol Meri taim em i lukim planti manmeri na wanpela wido meri tu, ol i putim mani long ol bokis mani.—Luk 21:1, 2.

Tupela bokis mani i bilong baim takis bilong tempel—wanpela bilong dispela yia na narapela i bilong yia i go pinis. Bokis mani namba 3 i go 7 i bilong kisim mani i stret bilong baim ol liklik pisin, ol pisin balus, ol samting bilong kamapim smok i gat gutpela smel, na ol dis gol. Sapos man bilong putim ofa i putim mani ol i makim bilong ol dispela bokis, na sapos i gat sampela mani i stap yet em bai putim long ol narapela bokis. Man i bin baim ofa bilong tekewe sin na sapos sampela mani stap yet, em bai putim dispela mani long bokis namba 8. Sapos man i bin baim ol ofa bilong mekim dai asua, baim ol pisin bilong mekim ofa, mekim ol ofa bilong Promisman, o ol ofa bilong lepraman na sampela mani i stap yet, em bai putim dispela mani long bokis namba 9 i go 12. Bokis mani namba 13 i bilong putim kontribiusen o mani ol man i givim long laik bilong ol yet.

Luk i raitim Gutnius Bilong Luk, na tu, Buk Aposel. Luk i tok em i “mekim gut wok painimaut long ol samting i bin kamap kirap long pastaim,” tasol sampela saveman i gat tupela tingting long ol tok Luk i raitim. (Luk 1:3) So ol tok em i raitim i stret o olsem wanem?

Luk i stori long ol samting bilong bipo em yumi ken painimaut olsem ol i tru o nogat. Olsem, em i yusim sampela biknem bilong ol ofisa bilong Rom, olsem majistret long Filipai; ol hetman bilong taun bilong Tesalonaika; na bosman long Efesus. (Aposel 16:20;17:6; 19:31) Luk i kolim Herot Antipas olsem hetman i bosim distrik, na Sergius Paulus olsem wanpela saveman bilong Saiprus.—Aposel 13:1, 7.

Luk i raitim stret ol biknem i bikpela samting bikos taim senis i kamap long wanpela hap em Rom i bosim, orait biknem bilong edministreta bilong dispela hap tu i senis. Saveman bilong Baibel, Bruce Metzger, i tok: “Ol kain biknem olsem long Buk Aposel i stret long ples na taim em stori i kamap long en.” Saveman William Ramsay i kolim Luk olsem “nambawan man long raitim stret histori.”