Baibel i stori long sampela taim we ol man i gat strong i daunim ol man i no gat strong. Yumi ken tingim stori bilong Nabot. a Ahap, em wanpela king bilong Israel long yia 950 B.C.E., i larim meri bilong em Jesebel i kilim i dai Nabot na ol pikinini man bilong em na bai king i ken kisim gaden wain bilong Nabot. (1 King 21:1-16; 2 King 9:26) Wai na God i larim ol i mekim kain wok nogut olsem long namba ol i holim?

Yumi ken tingim wanpela as em olsem: God i no inap giaman. (Taitus 1:2) Dispela bai mekim wanem long pasin bilong daunim ol narapela? Long bipo yet, God i givim tok lukaut long ol manmeri olsem pasin bilong bikhet long em bai kamapim samting nogut, em dai. Tok bilong God i tru olgeta, dai i bin painim ol man kirap long taim pasin bikhet i kamap long gaden Iden. Fes man i dai long rot bilong pasin bilong daunim narapela, em taim Ken i kilim i dai brata bilong em Abel.—Stat 2:16, 17; 4:8.

Kirap long dispela taim bipo na i kam inap long nau, Baibel i tok long i stap bilong ol man olsem: “Sampela bikman i wok long daunim ol arapela manmeri na mekim nogut long ol.” (Saveman 8:9) Yu ting dispela tok bilong Baibel em i tru? Jehova i givim tok lukaut long lain bilong em, lain Israel, olsem ol king bilong ol bai daunim ol na ol bai krai long God i ken helpim ol. (1 Samuel 8:11-18) Saveman King Solomon tu i bin kisim planti takis mani long ol manmeri bilong em. (1 King 11:43; 12:3, 4) Ol king nogut, olsem Ahap, ol i bin mekim nogut tru long ol manmeri. Tingim: Sapos God i pasim ol man long mekim kain hatpela wok bos olsem, i olsem em yet i mekim tok giaman, a?

Na tu, tingim, Satan i bin tok ol manmeri i lotuim God bikos ol i tingim ol samting ol inap kisim long em. (Jop 1:9, 10; 2:4) Sapos God i pasim ol man long mekim nogut long lain bilong em, orait dispela bai sapotim tok giaman bilong Satan. Na sapos God i pasim olgeta kain pasin nogut long painim olgeta man, em yet bai sapotim wanpela bikpela tok giaman. Na sapos God i lukautim ol man long ol pasin nogut, planti bai ting olsem ol inap bosim ol yet gut na i no gat wok long God i bosim ol. Tasol Baibel i tok ol man i no inap bosim wokabaut bilong ol yet. (Jeremaia 10:23) Yumi nidim Kingdom Bilong God long i kam na dispela Kingdom tasol bai pinisim ol pasin nogut.

Yu ting dispela i makim olsem God i no mekim wanpela samting bilong pinisim pasin bilong daunim ol narapela? Nogat. Tingim 2-pela samting em i save mekim: Namba 1, em i kamapim klia ol samting nogut i save kamap long pasin bilong mekim nogut long ol narapela. Olsem, Baibel i stori long olgeta samting Jesebel i mekim bilong bagarapim Nabot. Na tu, Baibel i tokaut klia olsem as bilong ol dispela pasin nogut em wanpela man i gat bikpela strong husat i laik haitim em yet. (Jon 14:30; 2 Korin 11:14) Baibel i tok dispela man em Satan. God i kamapim klia pasin nogut, pasin bilong daunim narapela, na as tru bilong ol dispela pasin, na long dispela rot em i helpim yumi long abrusim ol pasin nogut. Em bai lukautim yumi inap oltaim bihain.

Namba 2, God i promis long pinisim pasin bilong daunim narapela na yumi ken bilip tru long dispela promis. Pasin God i mekim bilong kamapim klia, mekim kot, na panisim Ahap na Jesebel na ol narapela man wankain olsem ol, dispela i kirapim yumi long bilip tru long ol tok promis bilong em olsem wanpela taim em bai panisim ol man bilong mekim ol pasin nogut. (Song 52:1-5) Na tu, God i helpim ol manmeri i laikim em long bilip na wetim taim we em bai pinisim ol pasin nogut. b Bilipman Nabot na ol pikinini man bilong em bai stap laip oltaim long Paradais long graun we i no gat pasin bilong daunim narapela.—Song 37:34.