Mi tingim yet taim mi liklik pikinini na mipela i stap long hap saut bilong Frans, mi bin amamas tru long stap wantaim papamama long wanpela liklik haus. Papa i wokim wanpela siso bilong mi, na mi save amamas tru long pilai raun long plaua gaden. Long 1966, ol Witnes Bilong Jehova i visitim mipela long haus bilong mipela na ol i stori longpela taim wantaim Papa. Sevenpela mun bihain, Papa i pasim tok long bel olsem em bai kamap wanpela Witnes. I no longtaim na Mama tu i kamap wanpela Witnes, olsem na mi kamap bikpela insait long famili i pas gut wantaim.

Ol hevi bilong mi i kamap bihain tasol long mipela i go bek long Spen, em asples bilong papamama bilong mi. Mi wok long pilim olsem ol han na lek bilong mi i pen nogut tru. Tupela yia bihain long mipela i visitim planti dokta, mipela i lukim wanpela dokta bilong atraitis (sik bilong ol join bilong bun), na em i tokim mipela, “I no gat wanpela samting mipela inap mekim.” Mama i stat long krai. Mi harim dokta i kolim kain kain tok a em mi no bin harim bipo. Maski mi gat 10-pela krismas na mi no save long planti samting, mi save olsem dokta i no inap pinisim sik bilong mi.

Dokta i tok i gutpela mi go stap long haus sik bilong ol pikinini na bai mi ken kisim tritmen long hap. Taim mi kamap long haus sik, mi wari na tingting planti. Ol sister i strik stret: Ol i katim gras bilong mi na givim mi wanpela klos i no gat stail long en. Aiwara i kam daun na mi tingting, ‘Laip bilong mi bai olsem wanem long hia?’

Papamama i skulim mi long Jehova, olsem na mi no insait long ol kastam bilong lotu Katolik long haus sik. Ol sister i hatwok long kliagut long as na mi no insait long ol dispela samting. Mi beten askim Jehova long no ken lusim mi, na olsem  wanpela papa i laikim tru pikinini bilong em na i holimpas em, Jehova i sambai long mi na lukautim mi.

Haus sik i orait long papamama bilong mi i ken visitim mi inap liklik taim tasol long ol Sarere. Ol i save kisim i kam ol buk na nius bilong Baibel bilong mi ken ritim na strongim bilip bilong mi. Ol i tambuim ol pikinini long i gat ol buk bilong ol yet, tasol ol sister i orait long mi gat ol buk na Baibel bilong mi yet em mi save ritim olgeta de. Na tu, mi save stori long ol narapela gels long bilip bilong mi long laip oltaim long Paradais long graun we i no gat wanpela man bai sik. (Revelesen 21:3, 4) Maski sampela taim mi bel hevi na mi pilim wanpis, mi amamas olsem bilip bilong mi long Jehova i wok long kamap strong.

Bihain long 6-pela mun ol dokta i salim mi go bek long haus. Maski sik bilong mi i stap yet, mi amamas long go bek long papamama. Ol join bilong mi i wok long bagarap na dispela i givim bikpela pen moa long mi. Taim mi kamap tineja, sik i wok long pinisim olgeta strong bilong mi. Maski i olsem, taim mi gat 14 krismas mi kisim baptais na mi tingting strong long mekim wok bilong Papa bilong mi long heven inap long strong bilong mi. Tasol i bin gat sampela taim mi bel hevi long Jehova. Mi beten askim em, “Wai mi kisim dispela sik? Plis oraitim mi. Yu lukim bikpela pen na hevi mi karim?”

Taim mi kamap tineja i gat planti hatwok mi mas fesim. Mi mas ekseptim olsem mi no inap kamap orait gen. Planti taim mi save skelim mi yet wantaim ol pren bilong mi em ol i helti na ol i amamas. Mi pilim olsem mi no gutpela tumas, olsem na mi no save bung wantaim ol narapela. Maski i olsem, famili na ol pren bilong mi i sapotim mi. Mi tingim Alicia, em i gat 20 krismas winim krismas bilong mi na em i kamap gutpela pren bilong mi. Em i helpim mi long mi no ken tingim tumas sik bilong mi, tasol mi mas tingim tu ol narapela na helpim ol.

Taim mi gat 18 krismas, sik bilong mi i go bikpela gen, olsem na bihain long mi go long ol miting Kristen mi save pilim taiet tru. Maski i olsem, mi save yusim gut fri taim bilong mi long stap long haus na stadi gut long Baibel. Buk Jop na Buk Song i helpim mi kliagut olsem long nau Jehova i no inap pasim yumi long kisim olkain sik, tasol em bai strongim yumi long karim dispela hevi. Mi save beten oltaim na mi “kisim strong i winim strong bilong yumi ol man” na “bel isi bilong God i winim tru tingting bilong man.”—2 Korin 4:7; Filipai 4:6, 7.

Taim mi gat 22 krismas, mi mas yusim wilsia. Mi tingting planti olsem ol man i lukim mi bai tingim mi olsem sikmeri i stap long wilsia, na ol bai no save mi husat tru. Tasol wanpela gutpela samting i kamap em, mi inap yusim wilsia long mekim ol samting mi gat laik long mekim. Wanpela pren bilong mi, nem bilong em Isabel, i kirapim mi long putim mak long winim 60 aua insait long wanpela mun long autim tok wantaim em.

Pastaim mi ting dispela em longlong tingting. Tasol mi askim Jehova long helpim mi, na famili na ol pren bilong mi i sapotim mi, na mi winim dispela mak. Dispela mun i pinis hariap, na mi luksave olsem mi winim pasin bilong pret na sem. Mi amamas tru long mekim dispela wok, olsem na long 1996 mi kamap wanpela painia oltaim—mi mas winim 90 aua long olgeta wan wan mun long autim tok. Dispela em nambawan gutpela disisen mi bin mekim, mi go klostu moa long God na bodi bilong mi i kisim bek strong. Taim mi autim tok mi inap kamapim bilip bilong mi long planti man na mi inap helpim sampela long kamap pren bilong God.

Long 2001, mi insait long wanpela kar eksiden na tupela lek bilong mi i bruk. Taim mi slip long haus sik mi pilim bikpela pen tru na mi beten olsem: “Plis Jehova no ken lusim mi!” Wanpela meri i slip long bet klostu long mi i askim mi, “Yu wanpela Witnes Bilong Jehova?” Mi no gat strong long bekim, so mi nodim het tasol. Em i tok: “Mi save long yupela! Mi save ritim ol magasin bilong yupela.” Dispela tok i mekim gut bel bilong mi. Maski mi no gat strong, mi inap autim tok bilong Jehova. Na dispela em wanpela blesing!

Taim mi orait liklik, mi kirap autim tok gen. Ol  i simenim tupela lek bilong mi, so Mama i save subim mi long wilsia long haus sik. Olgeta de mipela i visitim sampela sikman na stori wantaim ol na givim sampela Baibel nius long ol. Maski mi pilim taiet bihain long mipela i visitim ol sikman, Jehova i givim mi strong mi nidim.

Inap sampela yia nau, sik atraitis bilong mi i wok long go bikpela, na tu, papa bilong mi i dai na dispela i mekim mi bel hevi tru. Tasol mi traim long stap amamas yet. Hau mi mekim olsem? Taim rot i op, mi save bung wantaim ol pren na ol wanblut na dispela i helpim mi long no ken tingim tumas ol hevi bilong mi. Na taim mi stap wanpis, mi save ritim ol buk, stadi long Baibel, o autim tok long rot bilong fon.

Na tu, mi save amamas long ol liklik samting, olsem win i pas long pes bilong mi o smel bilong ol plaua. Em ol samting mi inap tenkyu long en. Pasin bilong lap tu i helpim mi. Wanpela taim mipela i autim tok na wanpela pren bilong mi i subim mi long wilsia em i stop bilong rait long notbuk. Wantu tasol wilsia bilong mi i spit i go daun long rot na mi bamim wanpela kar. Mitupela i kirap nogut, tasol mipela i lap taim mipela i lukim olsem mi no kisim bagarap.

I gat planti samting long laip nau mi no inap mekim. Em ol samting mi mas wet long mekim bihain. Planti taim mi pasim ai na piksaim long tingting nupela taim em God i tok promis long en. (2 Pita 3:13) Mi piksaim olsem mi stap helti, mi wokabaut na mi stap amamas tru. Mi pilim tru tok bilong King Devit, em i tok: “Yu mas bilip na wetim Bikpela i kam helpim yu. Sanap strong. Yu no ken bel hevi.” (Song 27:14) Maski bodi bilong mi i no strong moa, Jehova i strongim mi. Mi wok yet long kisim strong taim mi nogat strong.